Policija (01.07.16)
Buggyje a kwad pokradnyli
Mułkecy. Z terena firmy w Mułkecach su njeznaći w nocy na srjedu pjeć buggyjow a kwad pokradnyli. Bě to druhi tajki pad w běhu třoch tydźenjow w samsnej firmje. Paduši mějachu sej při tym chětro lochko. Přezpólne jězdźidła stejachu w jednorych garažach, do kotrychž so skućićeljo zadobychu. Wottam dowjezechu je do bliskeho lěska, hdźež je na nakładne awto, transporter abo připowěšak stajichu a wottransportowachu. Policajski pos móžeše hač tam slědy čuchać. Hódnotu pokradnjenych jězdźidłow trochuja na 100 000 eurow. Po wuhódnoćenju wobstejnosćow a slědow policija z toho wuchadźa, zo běchu wjacori skućićeljo „při dźěle“. Woni běchu derje organizowani a běchu objekt do toho wu- skušowali. Wočiwidnje je tónle pad runje tak wotběžał kaž prěni 10. junija. Tehdy běchu paduši na samsne wašnje wosom kwadow pokradnyli a 70 000 eurow škody načinili. W jednym z přichodnych wusyłanjow „Kripo live“ telewizija MDR wo tym tohorunja rozprawja.
Policija (30.06.16)
Zwisk mjez ćěkanjom a wohenjom
Słona Boršć. 23lětneho, kiž je so zawčerawšim na awtodróze A 4 mjez Połčnicu a wotpočnišćom Hornja Łužica pola Słoneje Boršće z awtom policajskej kontroli wuwinył a ćeknył, je sudnik Budyskeho hamtskeho sudnistwa do přepytowanskeje jatby tyknył. Kaž w nowinskim wozjewjenju rěka, jemu wumjetuja, zo je so ze swojim Renaultom zaměrnje na policista měrił. Tón móžeše so jeno z tym wuchować, zo nabok skoči. Nimo toho je młody muž na strašne wašnje do nadróžneho wobchada zapřimnył.
Prěnje indicije pokazuja na to, zo wobsteji zwisk mjez wohenjom wutoru rano w Połčnicy a nimale samsny čas so wotměwacej honjeńcu na awtodróze. Kriminalisća pak wobaj padaj hišće přepytuja. Předewšěm dyrbja zwěsćić, kak bě woheń dokładnje wudyrił a kotru rólu wodźer Renaulta při tym hraješe.
Identita dweju komplicow, kotrajž běštaj na ćěkanju z Renaulta wuskočiłoj a kotrejuž při pytanju namakali njejsu, dotal znata njeje. Tež w tymle padźe policija přepytuje.
Policija (29.06.16)
Dźiwja honjeńca po awtodróze
Połčnica/Słona Boršć. Po něhdźe 25 kilometrow dołhej honjeńcy za ćěkacym Renaultom je policija wčera rano jeho wodźerja nachwilnje zajała. Krótko po třoch chcychu zastojnicy w Pólskej přizjewjene awto kontrolować, šofer pak stupi na płun, wotjědźe z wulkej spěšnosću na awtodróhu a dale do směra na Zhorjelc. Sobujěducy w Renaulće mjetachu po puću bencinowe kanistry a dalše wěcy na jězdnju. Mjez Porchowskej horu a wotpočnišćom Hornja Łužica awto dwójce zasta, njeznatej wosobje z njeho wuskočištej a ćeknyštej do ćmy. Renault jědźeše dale a zasta skónčnje krótko do awtodróhoweho wotpočnišća Hornja Łužica. Tam da so 23lětny šofer bjez spřećiwjenja wot policistow zajeć. Po puću ćeknjenej wosobje je policajski helikopter hač do pózdnjeho dopołdnja podarmo pytał.
Policija (28.06.16)
Při grilowanju so ćežko zranił
Rakecy. Dokelž so gril prawje palić nochcyše, je 33lětny minjeny kónc tydźenja w Rakecach ze spiritusom trochu popomhać chcył. Při tym pak dóńdźe k sapacemu płomjenju, kotrež 28lětneho přećela mjezwoči trjechi a ćežko zrani. Jeho dyrbjachu do specialneje chorownje dowjezć.
Policija (27.06.16)
Puć lěpjaty był
Bórk. Njebě to wobchadne njezbožo, ale lěpk, kotryž postara so minjeny pjatk wječor wo poćeženje wobchada mjez Budyšinom a Bórkom. Tam bě něchtó bow z uniwersalnym lěpkom zhubił. Wěko bowa so wočini a lěpk wuběža na dróhu. Naslědne awta jón na to po něhdźe 50 metrach rozjězdźachu. Policija a wohnjowa wobora stej wotrězk zaraćiłoj, dokelž dyrbješe specialna firma rjedźić přijěć. Wěstoty dla bě puć hač do dźensnišeho ranja zawrjeny.
Policija (24.06.16)
Podhlad morjenja
Radeberg. W Ullersdorfje pola Radeberga přepytujetej Zhorjelske statne rěčnistwo a tamniša policajska direkcija podhlada morjenja dla. Kaž policija zdźěli, je swědk wčera popołdnju w jednym bydlenju ćěšenka našoł, kiž hižo njedychaše. Sobudźěłaćerjo alarmowaneje wuchowanskeje słužba spytachu něhdźe dwaj měsacaj stareho hólčka do žiwjenja wróćo zwołać, bohužel bjez wuspěcha. Prěnje wuslědki hnydom zahajeneho přepytowanja kriminalneje policije wobkrućichu podhlad, zo jedna so wo morjenje. W tym zwisku 33lětnu mać dźěsća jako podhladnu nachwilnje zajachu. Statne rěčnistwo a policija pad dale přepytujetej. Dalše nadrobnosće, što je so w Ullersdorfje stało, pak njemóžetej přepytowansko-taktiskich přičin dla zdźělić. Hakle dźensa w běhu dnja chcychu zjawnosć wobšěrnišo wo tym informować.
Policija (23.06.16)
Pěška ćežko zranjena
Běła Woda. Dwě rentnarce běštej zawčerawšim na wobchadnym njezbožu w Běłej Wodźe wobdźělenej. 80lětna wodźerka Toyoty chcyše na křižowanišću nalěwo wotbočić, njewobkedźbowaše pak, zo tam runje 76lětna žona při ampli za pěškow puć přeprěči, a zrazy do njeje. Pěška so při tym ćežko zrani. Ju dyrbjachu runje tak do chorownje dowjezć kaž 80lětnu, kotraž poćerpje šok. Škoda na awće wučinja tysac eurow.
Policija (22.06.16)
Z kolesom do awta zrazył
Wjazońca. Ćežko zranił je so zawčerawšim dwanaćelětny kolesowar we Wjazońcy. Wón wujědźe z pódlanskeho puća na hłownu dróhu. Njewobkedźbowaše pak předjězbu 20lětneje wodźerki Peugeota, do kotrehož na to zrazy.
Policija (21.06.16)
Awto rubił a znjezbožił
Wjelećin. Na Mnišonskej dróze we Wjelećinje je dźensa we 8.30 hodź. młody muž na jězdnju skočił a awto zadźeržał. Wodźerku Suzukija kaž tež sobujěducu wón z jězdźidła storhny a twochny z nim do směra na Hornju Hórku. Kilometer dale pak wón kontrolu nad wodźidłom zhubi a zwróći. Muž drje hišće pěši ćekny, policija pak jeho pozdźišo dosahny.
Policija (20.06.16)
Do chorobneho awta zajěł
Wojerecy. Dokelž njebě předjězbu wobkedźbował, je minjeny pjatk 59lětny wodźer Renaulta we Wojerecach na křižowanišću Heinowa/Kamjentna do chorobneho awta zrazył. Jeho 52lětny wodźer a 26lětna sobujěduca so při tym snadnje zraništaj. Na zbožo njebě žadyn pacient w awće. Wěcnu škodu trochuja na něhdźe 15 000 eurow. Při wobdźěłanju njezboža napadny policistam „chorhojčka“ 59lětneho, tak zo přewjedźechu pola njeho alkoholowy test. Tón wunjese 2,52 promilow, a to krótko do 14 hodź. Jězbnu dowolnosć muža sej zastojnicy hnydom zdźeržachu.
