Hromadźa papjeru
Njebjelčicy. Njebjelčanska młodźinska wohnjowa wobora hromadźi přichodnu sobotu dopołdnja staru papjeru w Serbskich Pazlicach a Njebjelčicach. Rady móžeće swoju staru papjeru (nowiny, časopisy, ale žadyn papjerc) w kartonkach abo korbikach před durjemi wotstajić.
Kultura w bróžni
Wochozy. Wochožanske towarstwo Šwjelic bróžnja přeprošuje sobotu, 26. awgusta, na zarjadowanje, na kotrymž předstaji klankodźiwadźelnik Lutz Männel w 16 hodź. hru „Čert z třomi złotymi włosami“. We 18 hodź. sćěhuje kabaret „Der Kaktus“ skupiny „Kaktusblüte“ z Wjazońcy.
Tikety w předpředani
Pěskecy. Na winowym swjedźenju přichodnu sobotu w Pěskecach zahudźi dujerska kapała „Horjany“. Tikety za koncert móža sej zajimcy w Šołćic pjekarni w Róžeńće kaž tež we Wätzigec kwětkowym a gratowym wobchodźe w Serbskich Pazlicach kupić.
Za Angelu Stachowu
Budyšin. Składnostnje 75. posmjertnych narodnin serbskeje spisowaćelki Angele Stachoweje (1948–2022) wotměje so w Budyskej Smolerjec kniharni štwórtk, 24. awgusta, w 19 hodź. literarny wječor. Z twórbow spisowaćelki čita Katka Pöpelec. Po programje powjedźe Marka Maćijowa. Wšitcy lubowarjo serbskeje literatury a dalši zajimcy su wutrobnje přeprošeni.
Za wulět so přizjewić
Worklecy. Wulět dekanatneje młodźiny budźe njedźelu, 3. septembra. Přeprošeni su młodostni wot přichodneho 9. lětnika. Přizjewjenja přijimuje dekanatne dušepastyrstwo hač do jutřišeho, 23. awgusta, na swojej internetnej stronje. Tohorunja su na stronje dalše informacije podate.
Porěča wo sprjewinym mosće
Kedźbu, gymnaziasća!
Budyšin. Přijězd za nowačkow do internata Budyskeho Serbskeho gymnazija budźe njedźelu, 20. awgusta, wot 18 do 21 hodź. Póndźelu po wučbje w 13.30 hodź. wotměje so za nowych wobydlerjow zahajenska zhromadźizna, na kotrejž ma so kóždy wobdźělić. Njech potrjecheni šulerjo tole wobkedźbuja
Lisćiki sej zawěsćić
Pěskecy. Woblubowany winowy swjedźeń z dujerskej kapału Horjany budźe sobotu, 26. awgusta, wot 18 hodź. při Pěskečanskim sportnišću. Zastupne lisćiki w předpředani za wosom eurow dóstanu zajimcy w Róžeńčanskej Šołćic pjekarni kaž tež na Wätzigec kwětkowym a gratowym statoku w Serbskich Pazlicach. Při wječornej kasy płaća lisćiki dźesać eurow.
Přepodadźa čestne myto
Slepo. Swjedźeń za swójby přewjedźe Slepjanska wjesna rada njedźelu, 20. awgusta, wot 14 hodź. na Slepjanskej nawsy. Při tej składnosći chcedźa čestne myto wsy přepodać a tak angažowanych wobydlerjow počesćić. Nimo toho witaja nowonarodźene dźěći. Na jewišću wustupi mjez druhim skupina dujerjow na hońtwjerskim róžku. Dale budźe móžno derje zdźeržanu dźěćacu drastu měnjeć.
Nóc njetopyrjow
Za wulět so přizjewjeć
Worklecy. Wulět dekanatneje młodźiny budźe njedźelu, 3. septembra. Přeprošeni su młodostni wot přichodneho 9. lětnika. Přizjewjenja přijimuja hač do 23. awgusta na internetnej stronje dekanatneho dušepastyrstwa we Worklecach.
Pućować a swjećić
Hrubjelčicy. Serbske ewangelske towarstwo a Maćijec swójba přeprošujetej wšitkich Serbow a dalšich zajimcow sobotu, 26. awgusta, na lětnje pućowanje přez Humboldtowy haj podłu hrodźišća a Sprjewineho doła kaž tež na serbski swjedźeń. Započatk je w 14 hodź. na Jaworkec/Maćijec dworje w Hrubjelčicach, Ćěchorčanska 16. Po swačinje tam přizamknjetej so w 17 hodź. ekumeniska nutrnosć a program z trijom Trojozynk. Přeprošeni su tež wšitcy, kotřiž chcedźa hakle na nutrnosć abo program přińć. Při sylnym dešću započnje so swjedźeń hakle w 17 hodź. w Maćijec bróžni.
Přeprošuja na namšu
Choćebuz. Serbsko-němska namša pod hołym njebjom wotměje so sobotu, 19. awgusta, w 14 hodź. při wopomnjenskim kamjenju za wotbagrowanu wjes Liškow. Tam rozžohnuja serbskeho dušepastyrja Ingolfa Kśenku. Wopisanje přijězda namakaja zajimcy pod .
Spěwaja na horje
Wuježk. Chór Budyšin zanjese njedźelu, 20. awgusta, w 14.30 hodź. při hosćencu na Čornoboze na swojim mjeztym tradicionalnym lětnim koncerće zaso serbske, němske a mjezynarodne spěwy. Zastup je darmotny, chór pak prosy wo obolus za podpěru swojeje dźěławosće. Wšitcy su wutrobnje přeprošeni.
Hudźa w hosćencu
Budyšin. Budyski hosćenc „Sprjewina pensija“ wuhotuje pjatk, 18. awgusta, wot 19 hodź. piwarniski a lětni swjedźeń. Na nim zahudźi kapała „Jolly Jumper“. Zastupne lisćiki předawaja jeničce při wječornej kasy. Rezerwowanja móžne njejsu.
Za wučerjow a kubłarjow
Róžant. Wšitcy wučerjo a kubłarjo kaž tež něhdyši a přichodni pedagogojo su jutře, wutoru, we 18 hodź. na Božu mšu do Róžanta přeprošeni. Je to poskitk, so w poslednim prózdninskim tydźenju tež duchownje a z Božim žohnowanjom na nowe šulske lěto nastajić. Po Božej mši přeprošuje Serbske šulske towarstwo k zetkanju na zahrodźe při cyrkwi.
Radźićeljo wuradźuja
Radwor. Přichodne posedźenje Radworskeje gmejnskeje rady wotměje so srjedu, 16. awgusta, we 18.30 hodź. w jědźerni šule „Dr. Marja Grólmusec“. Mjez druhim budu radźićeljo plan naprawow za turistiske wuwiće gmejnow Radwor, Wulka Dubrawa a Malešecy rozjimować. Na dnjowym porjedźe steji dale diskusija wo podźělnym zapłaćenju wučbnicow, su-li je šulerjo skóncowali. Wobydlerjo su wutrobnje přeprošeni.
Organizuja zaso wiki
Radwor. Čaporowe wiki a měnjenska bursa za dźěćacu drastu wotmějetej so sobotu, 2. septembra, wot 14 do 18 hodź. na Radworskej kupje. Po dlěšej přestawce a tójšto naprašowanjach chce kupowe zjednoćenstwo tele zarjadowanje pjaty raz přewjesć. Za nje pytaja hišće wikowarjow. Popłatk płaći dźesać eurow. Wotpowědnje wulke blido měł sej kóždy sam sobu přinjesć. Zajimcy njech přizjewja so hač do 26. awgusta pod telefonowym čisłom 0173 90 25 365 abo e-mailnje pod .
Lisćiki sej zawěsćić
Pěskecy. Woblubowany winowy swjedźeń z dujerskej kapału Horjany budźe sobotu, 26. awgusta, wot 18 hodź. při Pěskečanskim sportnišću. Zastupne lisćiki w předpředani za wosom eurow dóstanu zajimcy w Róžeńčanskej Šołćic pjekarni kaž tež na Wätzigec kwětkowym a gratowym statoku w Serbskich Pazlicach. Při wječornej kasy płaća lisćiki dźesać eurow.
Wospjet techno a wjac při skale
Stare traktory so zetkaja
Koblicy. 20. raz wotměje so přichodny kónc tydźenja w Koblicach pola Wulkich Ždźarow zetkanje historiskich a nowšich traktorow, tak mjenowanych wlečakow. K tomu je towarstwo přećelow wlečakow wobšěrny program přihotowało. Pjatk wot 18 hodź. přeprošuja na wubědźowanje wohnjowych wobornikow. Sobotu w 13 hodź. započnje so kołojězba wobdźělenych mašinow. W 15.30 hodź. demonstruja, kak su něhdy žito młóćili. W połnocy startuja motory traktorow. Njedźelu wot 9 hodź. přewjedu wubědźowanja starych traktorow. W 13 hodź. přizamknje so bój gigantow.
Na hornčerske wiki
Hózk. 19. hornčerske wiki wotměja so sobotu a njedźelu, 12. a 13. awgusta, w Hózku. Stajnje wot 10 do 18 hodź. poskićuja hornčerjo z cyłeje Němskeje swoje wudźěłki. Za to su wšelake atrakcije přihotowali.
