Lipa spěwa pod lipami
Baćoń. Chór Lipa z Pančic-Kukowa wuhotuje pjatk, 23. junija, w 20.30 hodź. w Baćonju beneficny koncert pod lipami na zahrodźe při cyrkwi. Wunošk wužiwaja za ponowjenje tamnišich pišćelow.
Planuja kulturnu kofejownju
Njebjelčicy. W Heldec hospodźe w Njebjelčicach ma so 16. septembra wotewrěć kulturna kofejownja. Kóždu prěnju a třeću sobotu měsaca wot 15 do 19 hodź. móža so tam zajimcy zetkać. Změja składnosć zhromadnje kofej pić, hry hrać a swójsku kreatiwitu wuwiwać. Iniciatorojo pytaja ludźi kóždeje staroby a wšelakeho pochada z Njebjelčic a wokoliny, kotřiž chcedźa kofejownju ze swojimi idejemi wobohaćić. 30. junija we 18 hodź. wotměje so prěnja wuměna idejow w Heldec hospodźe. Na to su wšitcy wćipny a zajimowani přeprošeni. Kulturna kofejownja Njebjelčicy nastanje w zhromadnym dźěle towarstwa Sowutu a Sakskeho statneho dźiwadła a je dalšim kooperaciskim partneram wotewrjena.
Terra preta w srjedźišću
Lipa spěwa pod lipami
Baćoń. Chór Lipa z Pančic-Kukowa wuhotuje pjatk, 23. junija, w 20.30 hodź. w Baćonju beneficny koncert pod lipami na zahrodźe při cyrkwi. Wunošk wužiwaja za ponowjenje tamnišich pišćelow.
Hudźba na mnohich městnach
Budyšin. Město Budyšin wobdźěli so jutře znowa na hudźbnym swjedźenju Fête de la Musique. Na třoch městnach młódši a starši hudźbnicy wot 15 hodź. zahudźa, a to na Hłownym torhošću, na Hrodowskej kaž tež na Bohatej. Při tym zaklinči dujerska hudźba runje tak kaž folk, country a pop. Po nutřkownym a starym měsće poćehnje Worklečanska kapała „Fünf an der Feier“ a na wjacorych městnach zahudźi.
Kamjenc. Hižo wjele lět je Fête de la Musique kruty wobstatk kulturneho žiwjenja w Kamjencu. Tam zaklinči wot 15 hodź. hudźba na dohromady dwanaće městnach, mjez druhim na Butrowych wikach, na Šulskim torhošću, w piwowej zahrodźe Seibelec puba, na zahrodźe Muzeja zapadneje Łužicy a w Marinej cyrkwi.
Přednošuje wo Africe
Do akademije pohladnyć
Budyšin. Zajimcy za dualny studij su jutře, sobotu, wot 9 do 13 hodź. na dźeń wotewrjenych duri do Budyskeje statneje studijneje akademije přeprošeni. Hromadźe ze swojimi partnerami z praksy předstaja studijne poskitki, wobsahi a wuměnjenja za studij w Budyšinje.
Za bus na festiwal so přizjewić
Chrósćicy. Na program folklorneho festiwala pjatk, 7. julija, w Hochozy pojědźe z Hornjeje Łužicy bus. Wón wotjědźe w 17.15 hodź. w Radworju a w 17.30 hodź. w Chrósćicach. Domoj wotjědźe bus w 23.30 hodź. Zajimcy měli so hač do 30. junija w regionalnym běrowje Domowiny w Chrósćicach pod telefonowym čisłom 035796/ 96 254 přizjewić. Jězba płaći na wosobu dźesać eurow.
Po parku so wuchodźować
Smochćicy. Smochčanske kubłanišćo swj. Bena přeprošuje jutře w 14 hodź. na wodźenje po hrodowym parku. W 16.30 hodź. přizamknje so beneficny koncert bigband Drježdźanskeho gymnazija swj. Bena. Z wodźenjom a koncertom podpěra załožba Carity w Drježdźansko-Mišnjanskim biskopstwje Kamjensku měnjensku bursu dźěćaceje drasty.
Dudy a přećeljo
Dalši wječor na zahrodźe
Budyšin. Kulturna zahroda Serbskeho ludoweho ansambla startuje jutře do třećeho tydźenja. Rjad z wotměnjacymi koncertami z wulkotnymi wuměłcami wotměje so před rjanej kulisu Budyskeho stareho města. Jutře, štwórtk, wustupi w 19.30 hodź. Jazz-Duo Focus. Hižo někotre lěta hudźitaj młodaj wuměłcaj hromadźe a staj w tutym času mnoho aranžementow a swójskich spěwow napisałoj. Publikum móže so tuž na zajimawy program wobstejacy z jazza, popa, funka a soula wjeselić.
Chcedźa zjawnje diskutować
Wo podrywanju demokratije
Kulow. „Kedźbu pasle! Kak prawicarscy ekstremisća a reichsbürgerojo demokratiju podrywaja“ rěka hesło zarjadowanja, kotrež wotměje so srjedu, 14. junija, wot 19 hodź. w Kulowskim Jakubetzowym wustawje. Referentaj budźetaj dr. Harald Lamprecht, społnomócnjeny za prašenja swětonahlada Ewangelsko-lutherskeje krajneje cyrkwje Sakskeje, a Christian Schäfer, ze Syće za demokratiju a wšelakorosć w Budyskim wokrjesu.
Přednošuje wo Klukšu
Klukš. Wo Klukšu jako mjezynarodnym nabožnym centrumje we 18. lětstotku přednošuje historikarka w Serbskim instituće dr. Lubina Malinkowa srjedu, 14. junija, w 19.30 hodź. w Klukšanskej cyrkwi. W srjedźišću přednoška steja Klukšanski seminar a z nim zwjazane wosobiny a podawki. Wobliwowane wot Franckowych wustawow w Halle a Bratrowskeje jednoty w Ochranowje nasta w Klukšu seminar, na kotrymž so němscy, serbscy a čěscy duchowni a wučerjo wukubłachu. Chowancy seminara přełožichu nimo toho knihi do serbšćiny a přihotowachu šulerjow na wopyt wyšeje šule. Přednošk wotměje so w němskej rěči.
Při pomniku rjedźa
Přećeljo hudźby zaspěwaja na statoku
Ćisk. We wobłuku rjada Ćišćanske wotewrjene wokno, kotrež tamniše kulturne towarstwo organizuje, wustupi jutře, sobotu, w 15 hodź. wokalny ansambl „Amici della musica“ (Přećeljo hudźby) na Ćišćanskim statoku. Wosom spěwarkow a spěwarjow ma šěroki repertoire, kiž saha wot starych mištrow přez ludowe spěwy hač k modernemu popej. Zastup płaći dźesać eurow.
Na kreatiwne popołdnjo
Wojerecy. Dekoraciju z hliny zhotowić a připódla so w serbšćinje wukmanić móža zajimcy póndźelu, 12. junija, we Wojerowskim domje Domowiny. Wot 13.30 hač do 15 hodź. abo wot 15.30 do 17 hodź. su tam wopytowarjo pod hesłom „Wuměłstwo a rěč w bróžni“ na serbske kreatiwne popołdnjo z Mariju Šołćic přeprošeni. Zajimcy njech přizjewja so pod . Wobdźělenje płaći dźesać eurow na wosobu.
Z kolesom po katolskej kónčinje
Horni Wujězd. We wobłuku wustajeńcy „Čej’ da sy“ w Budyskim Serbskim muzeju wotměje so sobotu, 10. junija, prěni dźěl kolesowanskeje jězby „Klóšterski kraj – serbski raj“ pod nawodom Tadeja Šimana. Wona powjedźe po južnym dźělu klóšterskeje kónčiny. Započatk něhdźe 25 kilometrow dołheje tury je w 10 hodź. na parkowanišću w Hornim Wujězdźe. Wobdźělnicy njech přinjesu sej něšto k jědźi a piću sobu. Přizjewjenja přijimuja pod abo telefonisce pod 03591/ 270 87 00.
Wirtuelna bjesada
Wojerecy. Motiwatorka za serbsku rěč Marija Šołćic poskićuje wotnětka kóždu póndźelu wot 18 hodź. serbsku wirtuelnu bjesadu pod https://meet.jit.si/rjanaserbskabjesada23. Zaměr je podpěru poskićeć wšitkim, kotřiž so zajimuja za serbšćinu, kotřiž chcedźa snano pomoc paralelnje ke kursam serbšćiny abo kotřiž chcedźa po wotzamknjenju kursow prosće zhromadnje serbować.
Wustajeńca w nakupowanišću
Wojerecy. „Serbske nałožki“ rěka wustajeńca, kotruž wotewru jutře, štwórtk, w 11.30 hodź. na swětłowym dworje Wojerowskeho Łužiskeho centera. Přehladka dopomina na korjenje, hódnoty a tradicije, kotrež zhromadnosć wobydlerjow zesylnjeja. Wona je hač do 24. junija we Wojerecach widźeć a potom na druhe městna pućuje. W zwisku z wustajeńcu budźe móžno, zastupnej lisćikaj za lětuše Krabatowe swjedźenske hry dobyć.
Jubilejny koncert brigady
Pančicy-Kukow. Chór 1. serbskeje kulturneje brigady wuhotuje sobotu, 17. junija, we 18 hodź. swjedźenski koncert składnostnje 775. załoženskeho jubileja klóštra Marijineje hwězdy w klóšterskej cyrkwi. Nawod změje cyrkwinskohudźbny direktor Friedemann Böhme, na klawěrje přewodźa spěwarjow Gina Hentsch. Mjez druhim zaklinča twórby Jana Pawoła Nagela, Korle Awgusta Kocora, Antona Brucknera a Měrćina Weclicha. Zastup je darmotny, zarjadowarjo pak proša wo kolektu za wuprawu chóra, kotryž wospjetuje koncert 21. junija w baroknej katedrali w Ljubljanje.
