„To měło wšudźe tak być“
Annegret Bensch je mějićelka Rakečanskeho wobchoda, w kotrymž bě filiala „Quelle“ zaměstnjena. Dźensa poskića wikowarka nimo drasty pućowanske jězby do cyłeho swěta.
Rakecy (SN/mwe). Hižo při załoženju Rakečanskeje Pawołskeje šule je překupča Annegret Bensch kubłanišćo z jednotnej drastu zastarała. Mjez druhim su to čerwjeny T-shirt a krótke čorne cholowy za sportowu wučbu. „To bě wurazne přeće wjetšiny staršich, zo jich dźěći wšitke w samsnej drasće do šule chodźa. Tak móža so město markoweje garderoby skerje z wukonami w šuli profilować“, wona podšmórnje. „To měło wšudźe tak być“. Při naličenju lěpšin tajkeho rozsuda mjenuje wona nimo mjezsobneho a často bolostneho njetrjebawšeho wuhraća mjez šulerjemi rańše zdrasćenje. „To njetrjebaja dołho přemyslować, kak woblečeni woni do šule du.“ Wot njeje wobstarana a na předań poskićena šulska drasta je poprawom powołanska drasta, mjez druhim z hoteloweje branše.
Policija (30.10.19)
Znowa bankomaty manipulowali
Budyšin. W měsće Budyšinje su njeznaći znowa wjacore bankomaty wšelakich pjenježnych institutow manipulowali. Policija zwěsći při kontroli cyłkownje wosom nastrojow w sprjewinym měsće. Hižo póndźelu bě 22lětny na Žitnych wikach zwěsćił, zo je šacht za wudawanje bankowkow změnjeny, a informowaše zastojnikow. Hodźinu pozdźišo přizjewi 39lětna podobny pad na Bohatej hasy. Kaž policija informuje, běchu paduši šacht za wudawanje pjenjez z pomocu slěborneje šěny tak změnili, zo wostanje zawrjeny a bankowki njewusunje. Kriminalna policija padaj nadrobnje přepytuje.
Serbska wuměłča wustaja
Wojerecy. Na wotewrjenje wustajeńcy pod hesłom „Kunstraum XIV Maja Nagel ungelöst“ z twórbami serbskeje tworjaceje wuměłče Maje Nageloweje su zajimcy pjatk, 1. nowembra, w 19 hodź. do Wojerowskeje Kulturneje fabriki přeprošeni. Wernisaži přizamknje so koncert. Projekt „wuměłstwowy rum XIV“ spěchuje Załožba za serbski lud.
Předawaja kartki za koncert
Malešecy. Župa „Jan Arnošt Smoler“ Budyšin a Załožba za serbski lud přeprošatej na nazymski koncert do Malešanskeho hosćenca „Wódny muž“, kotryž budźe sobotu, 2. nowembra. Program wuhotuja Serbski folklorny ansambl Wudwor kaž tež skupinje Přezpólni a Brankatschki. Zastupne lisćiki dóstanjeće w předpředani za wosom eurow w Budyskej Serbskej kulturnej informaciji, pola Hendrichec w Barće a w Malešanskim wobchodźe Bärbel’s Einkaufseck.
Wo bibliotekach a zběrkach
Gmejna wopłóčkowy plan dale wjedźe
Slepo (AK/SN). Gmejna Slepo ze swojimi wjesnymi dźělemi Rowno, Mułkecy a přichodnje tež z nowym Miłorazom swój koncept za wotstronjowanje wopłóčkow dale wjedźe. To je tamniša gmejnska rada wobzamknyła. „Z planom pokročować je trjeba, hladajo tež na zasydlenje noweho Miłoraza w Slepom. Je to třeće pokročowanje koncepta wo wotstronjowanju wopłóčkow“, rozłoži nawoda zarjada za planowanje, twarstwo a hórnistwo w zarjadniskim zwjazku Slepo Steffen Seidlich. Po planje přizamknu nowy Miłoraz centralnej syći wakuumowych stacijow. Runje tak přizamknu jej tež přichodnu Slepjansku wuchowansku stražu a tamnišu wohnjowobornu gratownju. „Smy ležownosće pruwowali, hač je za nje centralne přizamknjenje wunošne a technisce a hospodarsce móžne. Spěchowanske srědki Sakskeje natwarneje banki su nam za wopłóčkowe naprawy dale k dispoziciji“, Steffen Seidlich wuzběhny.
Partnerske zwiski rozšěrić
Wjesela so na hosći ze zapadoafriskeho Benina
Njebjelčicy (SN/mwe). Z wjetšinu hłosow su Njebjelčanscy gmejnscy radźićeljo njedawno tomu přihłosowali, požadać so wo projekt towaršnosće Engagement Global. Powšitkownowužitna tzwr je za trajne mjezynarodne komunalne poćahi a partnerske dźěło zamołwita. Z něhdźe 20 000 eurami spěchowanskich pjenjez chce gmejna partnerske styki do zapadoafriskeho Benina rozšěrić. To rěka, zo so delegacije po šěsć wosobach mjez sobu wopytuja. Tak bychu hižo 11. nowembra afriskich hosći rady w Njebjelčicach witali, jich tydźeń pohosćili a jim dwurěčne komunalne žiwjenje zbližili. Gmejnska rada wupraji wuměnkarce Marlies Richter dowěru, w nadawku gmejny projekt nawjedować.
Kaž je znate, gmejna Njebjelčicy hižo wjacore komunalne partnerstwa w Europskej uniji wudźeržuje a zaměrnje pěstuje. Nětko planuje tajke do Afriki, konkretnje do Benina. Nazhonjenja skutkowneje komunalneje politiki maja pomhać, prud migracije zadźeržeć a regionalne wuwiće w mjezsobnej wzajomnosći podpěrać.
Swój mjeztym 8. kirbsowy swjedźeń su wobydlerjo Běłeje Góry ...
Rěč sobu …, ale kak? (17)
Štó a što tči za serbskimi projektami, kotrež buchu we wobłuku wubědźowanja Sakskeho fondsa „Čiń sobu!“ mytowane? W lětušim serialu Serbskich Nowin je předstajamy.
Rěč sobu! Aktualnych temow je dosć, problemow drje tež a hišće wjace prašenjow, kak móhli je jako jednotliwcy rozrisać, abo móhli to docyła. Potrjeby rěčeć, so aktiwnje rozestajeć, su njeličomne. Přemało je druhdy konkretnych wužadanjow, to tež činić. W hrajnej dobje 2019/2020 Němsko-Serbskeho ludoweho dźiwadła Budyšin přewjedu nowy format pod hesłom RĚČsobu!, kotryž wěnuje so hłownje temam wobswět, fastfashion, smartphone a demokratija. Přez cyłe lěto maja so mjeńše zarjadowanja wotměć. A to nic kaž zwučene w dźiwadle, ale tam, hdźež so młodostni zetkawaja. Madleńka Šołćic je projekt lětsa za wubědźowanje Sakskeho fondsa „Čiń sobu!“ zapodała. Jako zastupjerka intendanta za serbske dźiwadło NSLDź pyta wona nowy přistup k młodźinje, chce so jeje temam bližić, temy poskićeć a so zdobom temam wotewrěć, kotrež móhli tež inspiracija za inscenaciju serbskeho profesionalneho dźiwadła być.
Krótkopowěsće (30.10.19)
Dale pod šěsć procentami
Budyšin. We wuchodnej Sakskej bě w oktobrje 16 078 bjezdźěłnych, 210 mjenje hač měsac do toho. Tak wostanje kwota bjezdźěłnosće we wobwodźe Budyskeje agentury za dźěło z 5,7 dale pod šěsć procentami. Nazymske wožiwjenje a z nim zwjazane pozitiwne wuwiće na dźěłowych wikach dale trajetej. To zwěsći Thomas Berndt, předsyda jednaćelstwa tudyšeje agentury za dźěło.
Wuznamjenjenje dóstali
Swětłe. Spěchowanske towarstwo wuwozneho mosta F 60 dósta wulke počesćenje swojeho dźěła. Wopytowarska jama w Swětłom (Lichterfeld) bu z Němskim mytom za pomnikoškit wuznamjenjene, kaž braniborski zarjad wčera oficialnje zdźěli. Spěchowanske towarstwo je móst na wuznamny turistiski objekt a zdobom na symbol strukturneje změny regiona wuwiło.
Čěska armeja a truty
Policija (29.10.19)
Móraka lepili
Wojerecy. Zo móranja na sćěnach a druhdźe jenož młodostni njezawinuja, su wobydlerjo a policisća njedawno we Wojerecach zwěsćili. Na nowym torhošću wobkedźbowaše pasant w nocy na minjenu njedźelu 54lětneho, kak něšto na sćěnu chěže pryska. Dalšemu móranju zadźěwa wón z tym zo jeho kruće dźeržeše, doniž přiwołana policija móraka njepřewza. Wjetšej škodźe bu tak tohorunja zadźěwane. Nastata škoda wučinja něhdźe 50 eurow. Lepjeny pak dyrbi z jednanjom wobškodźenja wěcow dla ličić.
Planuja projekt
Čorny Chołmc (SN). Towarstwo Krabatowy młyn prócuje so wo spěchowanske srědki Swobodneho stata Sakskeje. Z pjenjezami z krajneho programa za „Ideje we wjesnych kónčinach“ chcedźa w Čornym Chołmcu wosebity wobswětowy projekt přewjesć. Kaž z towarstwa rěka, chcedźa z dźěćimi a młodostnymi na łuce před Krabatowym młynom štomy a kerki nasadźeć a tak mjenowanu sadowcowu zahrodu zarjadować. Dale chcedźa farski hat we wsy renaturěrować.
Swoje plany je Čornochołmčanske towarstwo njedawno wjesnej radźe rozłožiło. Čłonojo gremija drje namjet towarstwa připóznawaja, maja pak přiwšěm brjušebolenje. Woni dwěluja na tym, zo 25 000 eurow, kotrež móža maksimalnje z krajneho programa dóstać, za zwoprawdźenje předewzaća dosaha, zo móhli tež farski hat zaso sporjadkować.
