Hórnikecy (AK/SN). Moderne hašenske jězdźidło typa TLF 4 000 maja Hórnikečanscy dobrowólni wohnjowi wobornicy dóstać. To su Wojerowscy měšćanscy radźićeljo na swojim zašłym posedźenju wobzamknyli. Jězdźidło wotpowěduje tuchwilnym wulkim wužadanjam wobornikow při zasadźenjach w padźe lěsnych wohenjow. Awto płaći 272 000 eurow. Z toho nadźijeja so 153 000 eurow spěchowanskich srědkow Budyskeho wokrjesa. „Zbytk“ zapłaći město Wojerecy ze swójskeje kasy. Měšćanscy radźićeljo wyšeho měšćanostu Stefana Skoru (CDU) społnomócnichu, ze sakskim nutřkownym ministerstwom trěbne kroki dorěčeć. Spěchowanske srědki su mjeztym přizwolene.

Spočatnje bě planowane, zo maja Hórnikečanscy wobornicy jězdźidło typa TLF 3 000 dóstać. Te pak bychu hišće přetwarić a tak mjenowanym DIN-normam přiměrić dyrbjeli. Skónčnje pak so za wjetše awto rozsudźichu, dokelž hodźi so wone lěpje zasadźić. Nimo toho za nje wjace spěchowanskich pjenjez dóstanu. Pla­nowane je, zo ma nowe TLF 4 000 kónc lěta 2019 do Hórnikec přijěć.

Konjecy. Kóždolětny zhromadny wječor za wšěch, kotřiž chcedźa zaso jónu bli­dotenis hrać, wotměje so jutře, pjatk, na žur­li Konječanskeho towarstwoweho domu. Započatk za dźěći je wot 17 hodź. a za dorosćenych wot 19 hodź. Konječanske blidotenisowe towarstwo wšitkich zajimcow wutrobnje přeprošuje.

Kak štomiki wotbyć?

Budyšin. Hižo druhi dźeń noweho lěta je Budyski wokrjes wčera w nowinskim wozjewjenju na to skedźbnił, kak móža wobydlerjo swoje hodowne štomiki najlěpje wotbyć. Tak móža je rozkus­kować a do sudobja za biowotpadki ćisnyć. W ja­nuaru hodźi so hodowny štomik nimo toho cyły pódla wotpadkoweho sudobja stajić. Za to njesmědźa žana lameta abo druhe wěcy­ na šmrěku abo jědli wisać. Štomiki, wjetše hač 1,50 metrow, dyrbja přikrótšene być, hałžki pak maja na nich wostać. Wotrězane hałžki wotpadkowe awto žane sobu njebjerje.

Na Horu w Bóščanskej gmejnje přijědu njedźelu historiske jězdźidła

Hora (SN/MWj). Najwjetši dźěl něšto wjace hač 80 wobydlerjow wopřijaceje Hory w Bóščanskej gmejnje budźe njedźelu, 6. januara, na nohach, hdyž wočakuja tam něhdźe tysac wopytowarjow zymskeho zetkanja historiskich jězdźi­dłow. Mjeztym pjaty raz Horjenjo tónle po­dawk přihotuja, při čimž pomha nimale 60 ludźi, wě Robert Ryćer jako jedyn z hłownych přihotowarjow.

Nastała ideja je, jako so před lětami swojich přećelow z Koblic we Łazowskej gmejnje prašachu, hač nochcyli woni swój kóždolětny zymski wulět ze sta­ry­mi traktorami raz na Horu přewjesć. Wot toho časa je zymske zetkanje kóžde lěto rozrostło. Loni bě tam 160 histo­riskich jězdźidłow wot traktorow přez awta­ hač k Lkw-jam a motorskim widźeć. Tónraz liča z 200 jězdźidłami. Samo z Gubina, Kamjenicy a Załomja chcedźa přijěć. Hłowny sponsor je Rjedźic ratarski zawod, kotryž za tónle podawk mjez druhim wulku łuku přewostaja.

Choćebuz (SN/JaW). Wozjewjenje města Choćebuza, w kotrymž wupraja so za wotsunjenje kriminelnych wukrajnikow, je zjawnu diskusiju pozdatnje prawicarskeho nastajenja města dla zbudźiło a jemu tójšto kritiki wunjesło. Pozadk je nadpad na Choćebužana w nowolětnej nocy.