60 njezbožow sněha dla

Budyšin. Nic jeno sobudźěłaćerjo zymskeje słužby a mějićeljo ležownosćow mějachu wčera ze sněhom ruce połne dźěła. W Budyskim a Zhorjelskim wo­krjesu dyrbješe so policija wo tójšto wobchadnych njezbožow starać. Hač do wčerawšeho pózdnjeho popołdnja přizjewichu Zhorjelskej policajskej direkciji 60 zražkow zymskich poměrow na pućach dla. Zwjetša wosta při blachowej škodźe. W někotrych padach pak so wodźerjo abo sobujěducy snadnje zranichu. Wot wobchadnych njezbožow potrjechene jězdźidła sunychu so do přirowow, wobhrodźenjow, wobchadnych znamjenjow, sćežorow a amplow, ale tež do tamnych wozydłow.

Chrósćicy (SN/MWj). Warjenske a zežiwjenske kursy, kotrež Křesćansko-socialny kubłanski skutk (CSB) w zežiwjenskej a zelowej zahrodźe w Pančicach-Kukowje kaž tež na Wojerowskej dźěćacej a młodźinskej farmje přewjeduje, su woblubowane zarjadowanja. Hdyž so zajutřišim prěnje lětuše w rjedźe „Klewernje a kreatiwnje warić“ we Wojerecach wotměje, wuhladaja wopytowarjo nowe mjezwočo. Wotnětka tam mjenujcy zežiwjenska wědomostnica Elžbjeta Hojerjowa skutkuje.

Po maturje na Serbskim gymnaziju je Chróšćanka w Halle zežiwjenske wědomosće studowała a na to chwilu w Drježdźanach bydliła. W tym času dźěłaše w Riesaskej nudlowej fabrice, hdźež je we warjenskim studiju k najwšelakorišim temam zarjadowanja přewjedła. Ale čehodla so runje ze zežiwjenskimi wědomosćemi zaběra? „Snano tohodla, dokelž je nan ratar a žiwidła produkuje a mać lěkarka.­ Zežiwjenske wědomosće su za­jimawa kombinacija wobeju wobłukow“, Elžbjeta Hojerjowa rozłoži.

Minjene měsacy a lěta bě kaž zwučeny ritual, zo agentura za dźěło za Hornju Łužicu kóždy měsac mjeńše ličby bjezdźěłnych přizjewi. Nětko je jich zaso trochu wjace. To pak ma sezonalne a nic strukturne přičiny, kaž nowinarjam zdźělichu.

Budyšin (CK/SN). W Hornjej Łužicy bě w januaru 20 438 ludźi bjez dźěłoweho městna registrowanych. To je 2 011 wjace hač kónc lěta 2018. Bjezdźěłnosć je předewšěm sezonalnych přičin dla přiběrała, rjekny Ilona Winge-Paul při njedawnym předstajenju najnowšich ličbow z dźěłowych wikow. To bě tež hižo w zašłych lětach takle wobkedźbować. „Štwórćina tych, kotřiž so jako bjezdźěłni přizjewja, přińdu z wysoko- a hłuboko­twarstwa kaž tež z branšow nutřkowneho wutwara“, rozłoži zastupowaca šefina Budyskeje agentury za dźěło. Přiwšěm je 1 572 mjenje nowych přizjewjenjow hač hišće před lětom.

Zasněžena njedźela z wobćežnosćemi, ale tež z wjeselom

Budyšin (SN). Hižo dołho Hornja Łužica dožiwiła njeje, zo je so w běhu tak krótkeho časa telko sněha našło. Wot 8.30 hodź. so wčera bjez přestawki sněhowaše, tak zo je woršta běłeje pychi hižo hač do připołdnja na někotre centimetry narostła. Sobudźěłaćerjo zymskeje słužby w komunach kaž tež w nadróžnych mištrownjach njemóžachu wšudźe naraz być, zo bychu sněh z pućow storkali. Dokelž dyrbja so při tym po krutym planje měć, so z městnami sta, zo dyrbjachu wobydlerjo při pódlanskich pućach trochu dlěje čakać, prjedy hač so před jich ležownosćemi rumowanske awto zjewi. Wobkedźbować tohorunja bě, zo so na přikład w Budyšinje na někotrych pućach dołho ničo stało njeje, tak zo awta napadany sněh kruće zjězdźichu. Z tejle lodowej worštu drje změja so šoferojo hišće někotre dny bědźić.