Krótkopowěsće (30.01.19)
Wo jasnosć so postarać
Drježdźany. Z widom na brexit chce so sakske knježerstwo ze zakonjom wo prawnisku jasnosć postarać, kaž je europski minister Oliver Schenk (CDU) dźensa w krajnym sejmje wuzběhnył. Po wustupje Wulkeje Britaniskeje z EU maja rjadowanja krajneho prawa za přechodny čas za britiskich staćanow w Sakskej nimo wólbneho prawa na europskej a komunalnej runinje dale płaćić.
Tarifowe jednanja zahajene
Kulow. W Kulowskim meblowym zawodźe Maja su wčera tarifowe jednanja zahajili. Dźěłarnistwo IG metal sej wot předewzaća žada, w Sakskej płaćiwe tarifowe zrěčenje drjewobdźěłanskeje industrije nałožować. W prěnjej rozmołwje wuprajichu so zamołwići za to, spěšne rozrisanje nańć. Přichodne tři dalše terminy jednanjow su hižo jasne.
Nowy wulkan namakali
Z jednym kolesom přemało
Policija (29.01.19)
Kwětki kradnył
Kulow. Štóž je minjenu sobotu w Kulowje abo wokolinje kwětki darjene dóstał, by so radšo prašeć měł, zwotkel wone su. Dopołdnja mjenujcy měješe kwětkowy wobchod na Kulowskim Kolpingowym naměsće njeprošeny wopyt. Tam je njeznaty kwěćel w hódnoće 13 eurow pokradnył. Předawarka runje žonu poradźowaše, jako muž do wobchoda zastupi, so skrótka rozhladowaše a so wotsali. Hakle na to zwěsćichu, zo kwěćel pobrachuje. Po wuprajenju předawarki bě muž něhdźe 180 centimetrow wulki, sylneje postawy a měješe blond, trochu kudźerjate włosy. Woblečeny bě žołto-zeleny kabat. Podobne wopisanje zdźělichu policiji z dalšeju kwětkoweju wobchodow na torhošću. Tam pak so mužej přiležnosć k padustwu skićiła njebě.
Witanske słowa přełožić
Z posedźenja Wulkodubrawskeje gmejnskeje rady
Wulka Dubrawa (CS/SN). Pawšalne spěchowanje 5 000 eurow, kotrež gmejny w němsko-serbskim sydlenskim rumje wot Swobodneho stata Sakskeje za hajenje serbskeje rěče dóstanu, měło so we Wulkej Dubrawje za to nałožić, zo witanske słowa na internetnej stronje gmejny do serbšćiny přełoža. To namjetowachu radźićeljo na swojim zašłym posedźenju. Dale ma wopomnjenski kamjeń w Jatřobje serbski napis dóstać.
Literarna rozmołwa
Budyšin. Z diskusiju wo knize „Doma we wućekach“ z pjera Benedikta Dyrlicha pokročuje Zwjazk serbskich wuměłcow z rjadom swojich wuměłskich rozmołwow pod titulom „tracTare“ jutře, srjedu, we 18 hodź. w hosćencu „Tiroler Stuben“ na Lessingowej 1 w Budyšinje. Zawod do diskusije poda Dietrich Šołta. Na zarjadowanje njejsu jeničce čłonojo ZSW přeprošeni, ale tež dalši zajimcy.
Trochu mjenje ludźi
Kulow (SN). W běhu lěta 2018 je wobydlerstwo města Kulowa wo 19 ludźi woteběrało. Kaž z ličbow z měšćanskeje radnicy wuchadźa, bydleše w měsće a jemu přisłušacych wsach kónc zašłeho lěta 5 764 ludźi. W Kulowje samym bě jich 3 391, lěto do toho hišće 3 416. Koćina ma nětko něšto mjenje hač 200 wobydlerjow, Klóšterska Nowa Wjes mjenje hač 80. Snadnje rozrostła je porno tomu ličba wobydlerjow w Hózku, Salowje, Brěžkach, Kulowcu a Dubrjenku.
Spotorhany móst ludźi rozhorja
Krajne zarjadnistwo spjatych jězorow chcyše pola Delnjeje Hórki kolesowansku šćežku wuchować. Kaž pak je so to stało, za to wobydlerjo žane zrozumjenje nimaja.
Delnja Hórka (UM/SN). Chětro wulke žołmy nastawaja tuchwilu w Delnjohórčanskej hatnej kónčinje. Přičina pak njejsu někajke wichory, ale mosćik za pěškow, kotryž lětdźesatki mjez Cyhelskim a Młynskim hatom přez Mału Sprjewju wjedźeše. Rjaneho dnja bě tón fuk – spotorhany w nadawku krajneho zarjadnistwa spjatych jězorow (LTV), w kotrehož wobsydstwje móst bě.
Za wobydlerjow Delnjeje Hórki a jich wjesnu radu je to njesłyšana wěc. „Dlěje hač sto lět bě na tymle městnje mosćik“, rozłožuje wjesny předstejićer Siegfried Spank. Po nim dóstachu so ludźo po krótkim a njestrašnym puću k znatemu symbolej swojeje wsy, k hoberskemu dubej. Po wšěm zdaću je to najstarši štom cyłeho Budyskeho wokrjesa a zdawna woblubowany cil wulětnikarjow. Nětko dyrbja wobydlerjo najprjedy čwak po zwjazkowej dróze B 156 hić, hdźež je wjele wobchada.
Krótkopowěsće (29.01.19)
Z třomi Serbami-kandidatami
Budyšin. Z Eriku Bulankowej, Tomaszom Nawku a Benjaminom Wirthom maja třoch Serbow mjez 15 kandidatami SPD za wólby noweje Budyskeje měšćanskeje rady 26. meje. Městne towarstwo SPD Budyšin a wokolina je jich minjeny štwórtk nominowało. Spočatk februara chcedźa wólbny program zestajeć a jón potom wozjewić.
Přehlad aktualizowany
Budyšin. Pjeć sakskich wobchadnych zwjazkow je swój zhromadny plan kolijowych syćow aktualizowało, kaž wobchadny Zaměrowy zwjazk Hornja Łužica-Delnja Šleska dźensa zdźěli. „Železnicy w Sakskej“ zaručeja přehlad wo wšitkich železniskich čarach w swobodnym staće, informacije wo tarifach a móžnosćach skontaktowanja. 15 železniskich towaršnosćow je aktualnje w Sakskej po puću.
Za čas smoga darmotnje jězdźić
Policija (28.01.19)
Jandźel pěston kedźbował
Ćisow. Z dotal njeznateje přičiny je zawčerawšim popołdnju 43lětna wodźerka wosoboweho awta na zwjazkowej dróze B 97 mjez Wojerecami a Njedźichowom při wotbóčce do Ćisowa na lěwy bok puća zajěła. Tam zrazy do dweju štomow, při čimž so ćežko zrani. 21 měsacow stare dźěćo měješe porno tomu kedźbliweho jandźela pěstona a wosta njezranjene. Wosobowe awto pak bě dospołnje skóncowane.
W duchu po Hornjej Łužicy
Budyšin. Hač do nowembra 2019 poskića Budyske staroměšćanske towarstwo rjad zajimawych přednoškow. Jutře, wutoru, su stawiznisce zajimowani na turu „Kołowokoło Hornjeje Łužicy“ přeprošeni. Pod mjenowanym hesłom přednošuje dr. Gabriele Lang wot 19 hodź. w Budyskej měšćanskej bibliotece. Wona wěnuje so wšelakim kónčinam Hornjeje Łužicy a zaběra so při tym z hornjołužiskim hraničnym wopismom z lěta 1241 runje tak kaž z dźělenjom Łužicy 1815. Zastup je darmotny.
Tójšto namjetow zapodali
Wojerecy. Za tak mjenowany wobydlerski etat města Wojerec 2019 je cyłkownje 180 namjetow do radnicy dóšło, nimale sto z nich z wokolnych wsow. Wot měšćanskeje rady zasadźena wosebita skupina měješe pruwować, kotre ideje předpisanym kriterijam wotpowěduja. Hladajo na mnóstwo namjetow dyrbješe so gremij wjacekróć zetkać. Tohodla móža hakle w februaru měšćanskej radźe lisćinu předpołožić. Kotre namjety so na kóncu přesadźa, rozsudźa wobydlerjo sami.
Wjace družin a nowoplahowanja
Při dundanju po Wojerowskej coologiskej zahrodźe móža wopytowarjo dokładnje 938 zwěrjatow w 129 družinach wuhladać. To je lětuša inwentura wunjesła, kotraž bě tamnišich sobudźěłaćerjow minjene tydźenje zaběrała.
Wojerecy (SN). Přirunujo z lětom 2017 maja we Wojerowskim coowje nětko wjace družin. „Tři nowe družiny ptačkow a štyri družiny cycakow móžemy ludźom předstajić“, praji nawoda zwěrjenca Eugène Bruins. Nimo pasowca (Gürteltier) Güntera a jeho partnerki Gwendolyn je to lěniwc (Faultier) Carlo. Loni su štyri pawy do coowa zaćahnyli, kotrež budu wot lětušeho widźeć.
Pola něhdźe dwaceći družin běchu loni při plahowanju wuspěšni. Najspektakularniši drje bě porod małych kubaskich krokodilow. Dorost mějachu tohorunja mjez druhim pola hadow, žorawjow, wopičkow, žabkow a kokošow. Wulki dźěl nowych wobydlerjow pak wotedachu zwěrjencam w Francoskej, Šwicarskej, Słowakskej a Danskej.
