Krótkopowěsće (28.11.18)
Recepty nětko delnjoserbske
Budyšin. Kniha Ludoweho nakładnistwa Domowina „Warimy z Tomašom“ je nětko tež w delnjoserbšćinje wušła. Přełožk je Margot Hašcyna wukonjała. Kuchar Tomaš Lukaš rozłožuje dohromady 55 receptow, kak sej jědźe krok po kroku přihotować. Serbsko-němski kuchinski słownik publikaciju wudospołnja. Na předań je kniha mjez druhim w Smolerjec kniharni a Choćebuskej Lodce.
Debata wo e-sporće
Wiesbaden. Hessenski nutřkowny minister Peter Beuth (CDU) žada sej wopřijeće „e-sport“ wotstronić. W dźeniku Darmstadtske Echo posłownje rěka, zo nima hraće na kompjuteru ničo ze sportom činić a zo ma so tele wopřijeće „wuraděrować“. Na platformje Twitter reagowaše Hans Jagnow ze zwjazka e-sporta Němskeje a wumjetuje Beuthej „njewuprajomnu retoriku“, kotraž poćah k sportej wobćežuje.
Čěska klětu hóstny kraj wikow
Policija (27.11.18)
Młodemu mužej pomhali
Wojerecy. Dokelž bě zawčerawšim wječor krótko do połnocy blisko zahrodnišća při zwjazkowej dróze B 96 we Wojerecach wołanje wo pomoc słyšała, informowaše žona policiju. Ta tam za prawym pohladny a namaka zymu mrějaceho 28lětneho muža. Wón zastojnikomaj powědaše, zo bě w swojim zahrodowym domčku spał, jako so njeznaći tam zadobychu a jemu něšto mjezwoči pryskachu. 28lětneho dowjezechu na to do chorownje. Nětko pyta policija swědkow, kotřiž su njedźelu wječor něšto podhladneho wobkedźbowali. Pokiwy přijimuje pod telefonowym čisłom 03571/ 46 50.
Policajska šula twarnišćo
Najprjedy bagry stare twarjenja spotorhaja, pozdźišo nowe domy nastanu
Budyšin (UM/SN). Kontejnery na Müntzerowej, kotrež je dotal Budyski awtodróhowy policajski rewěr wužiwał, su minjeny pjatk torhać započeli. To je prěni krok za rozšěrjenje wysokeje šule sakskeje policije w sprjewinym měsće.
Sakski financny minister Matthias Haß (CDU) je zhromadnje z Budyskim šefom statneho imobilijoweho zawoda (SIB) Norbertom Seibtom za powjetšenje policajskeje šule zelenu swěcu dał. „Zaručić nutřkownu wěstotu je jedyn z najwažnišich nadawkow stata“, praji minister Haß. „To je tež jedne z ćežišćow sakskeho dwójneho etata 2019/2020. Tak wobě městnosći kubłanišća – w Budyšinje a Rózborku – skrućimy.“ Plany su hotowe, tuchwilu dźěła wupisaja. „Wšako jedna so wo jara wulki a kompleksny projekt“, podšmórny Norbert Seibt. Jeničce přetwar areala policajskeje wysokeje šule na Budyskej Kantowej na campus płaći 70 milionow eurow a ma hač do lěta 2024 trać. 7,5 milionow eurow chcedźa klětu a 2020 wudać.
W swětłej cyrkwi Božu mšu swjećili
„Rěčće z dźěćimi a wnučkami“
Stawiznisku hodźinu par excellence dožiwi nimale 50 zajimcow minjeny pjatk na Ralbičanskim „Radlubinje“. Woni sej wuwědomichu, zo běchu masowe demonstracije w NDR jenož posledni krok k politiskemu přewrótej 1989. Zakłady za to běchu wjele zašo połožene.
Ralbicy (SN/MWj). Najwažniši datum za politiski přewrót w NDR bě 16. oktober 1978, jako sta so pólski kardinal Karol Wojtyła z bamžom Janom Pawołom II. Wón na swojim prěnim wopyće w pólskej domiznje napominaše: „Wobnowće wobličo zemje, tuteje zemje!“
Druha wažna wosobina bě nowy muž w Sowjetskim zwjazku Michail Gorbačow. Prěni je politiske reformy nastorčił, druhi je dopušći. Tole rjekny bywši korespondent telewizijneho sćelaka ZDF Joachim Jauer minjeny pjatk na Ralbičanskim „Radlubinje“. Přez wosobinski kontakt z redaktorom Katolskeho Posoła Rafaelom Ledźborom w Towaršnosći katolskich publicistow a na přeprošenje sekcije Wěda a skutk Towarstwa Cyrila a Metoda porěča Jauer wo tym, kak je k towaršnostnemu přewrótej w NDR a we wuchodnej Europje dóšło.
Na twarnišću powjetšeneho Budyskeho kina su dźensa zběhanku ...
Šansu zapasli
Krótkopowěsće (27.11.18)
Chce mandat zakitować
Wojerecy. Zapósłanc Frank Hirche chce swój direktny mandat při klětušich wólbach Sakskeho krajneho sejma znowa zakitować. Wobdźělnicy wólbnowokrjesneje zhromadźizny CDU su 57lětneho minjeny pjatk we Wojerecach za direktneho kandidata CDU w tamnišim wólbnym wokrjesu 55 wuzwolili. Hirche přisłuša krajnemu sejmej wot lěta 2009.
Bernardo Bertolucci njeboh
Rom. Wuznamny filmowc Bernardo Bertolucci je wčera 78lětny zemrěł. Mjez jeho často wuznamjenjenymi twórbami najznaćiše su „Posledni Tango w Parisu“, drama „1900“ a „Posledni kejžor“. Składnostnje spožčenja Čestneje palmy za žiwjenski skutk we wobłuku filmoweho festiwala w Cannesu lěta 2011 počesćichu jeho jako „najskerje najsławnišeho italskeho režisera přitomnosće“.
VW Passat přichodnje z Čěskeje
Nowa atrakcija přirodoweje wučbneje šćežki nastawa
Hućina (SN). Šćežki kołowokoło Hućinjanskich hatow su cyłe lěto idyliske blečki, hdźež móžeš přirodu woměrje wobkedźbować. Wosebje dobru składnosć k tomu skići 8,3 kilometry dołha přirodowa wučbna šćežka. Přez mosćiki abo po pućikach wuhlada wopytowar najwšelakoriše žiwjenske rumy a charakteristiske zwěrjata a rostliny. Nimo zymskich měsacow móžeš tam tež rybarjam při dźěle přihladować. Wjace hač 30 stacijow přeproša ke krosnowanju, hrajkanju, hladanju, nuchanju a přimanju. Z pomocu interaktiwnych elementow móžeš sej přirodu tamnišeje hatneje krajiny derje wotkryć.
Policija (26.11.18)
Elektrokolesy pokradnyli
Wojerecy. Dokelž su z elektromotorom podpěrane kolesa jara woblubowane, so tež paduši často na tajke měrja. We Wojerecach su nětko njeznaći hnydom dwě elektrokolesy z pincy wjaceswójbneho domu pokradnyli a so z nimaj zhubili. Škoda wučinja něhdźe 4 000 eurow.
