Wjesnu zhromadnosć wobchować
Po rozsudźe energijoweho koncerna LEAG, wjes Miłoraz wotbagrować, nadźija so něhdźe dwěsćě potrjechenych wobydlerjow spěšnych jednanjow za swoje přesydlenje.
Miłoraz (AK/SN). Najwažniši cil přichodneho časa je, so po móžnosći zhromadnje přesydlić a wjesnu zhromadnosć dalokož móžno zachować, podšmórny předstejićer Waldemar Locke na wčerawšim posedźenju Miłoraskeje wjesneje rady. Na potrjebu wobydlerjow za rozmołwu reaguja zamołwići koncerna LEAG z rěčnymi hodźinami přichodnu srjedu a potom kóždy štwórtk.
LEAG změje so dale po lěta 2013 wujednanych, ale tehdy njepodpisanych wuměnjenjach za předań priwatnych ležownosćow. „Wobsahi njetrjebamy změnić. Rěčeć pak dyrbimy wo terminach a časowych dobach“, rjekny zamołwity za přesydlenski management LEAG Thomas Penk. Wobsahi komunalneho dźěla chcedźa porno tomu hišće raz dokładnje pruwować.
Krótkopowěsće (07.04.17)
Planowanje čary wupisane
Drježdźany. Němska železnica je předplanowanja za elektrifikaciju čary z Drježdźan do Zhorjelca hač k pólskej mjezy a za wutwar čary spěšnosće hač do 160 km/h wupisała. Wutwar dobre sto kilometrow dołheje dwukolijoweje čary je jedne z najwažnišich twarskich předewzaćow Sakskeje.
Do kupjelow z lětadłom
Karlovy Vary/Düsseldorf. Zapadočěske kupjele Karlovy Vary maja prěni raz direktny lětadłowy zwisk ze zapadnej Europu. Runje zahajena linija towaršnosće Germania powjedźe wottam dwójce wob tydźeń do Düsseldorfa. Lisćik za tam- a wróćolět płaći 98 eurow. Karlovarske lětanišćo nadźija so w zwisku z nowej liniju, zo wurunaja tak pomjeńšacu so ličbu turistow z Ruskeje.
Braniborske kokoše pilne
Policija (06.04.17)
Z pukom alarm „zawinił“
Běła Woda. K njewšědnemu zasadźenju wołachu zawčerawšim wječor wohnjowu woboru a policiju do lodoweje hale Běłowodźanskich Liškow. Tam bě wohnjowa připrawa alarm přizjewiła. Na městnje zwěsćichu, zo bě hašenska woda na lodowe hrajnišćo ćekła. Što bě so stało? Při treningu bě hrajer po wšěm zdaću z pukom sprinklerowy pryskowak trjechił. Na to awtomatiska woheń přizjewjaca připrawa zaskoči, samostatnje wohnjowu woboru informowaše a – štož je jeje nadawk – hašensku wodu do objekta pryskaše. Njeličomne litry wody su tak na hrajnišćo wuběželi.
Saněruja Wojerowski hród
Žorawje nětko ćicho lahnu
Hdyž přiroda wotuća a žorawje so nawróćeja, je nalěćo. Prěnje su so srjedź februara ze swojeho španiskeho zymskeho kwartěra do Hornjeje Łužicy wróćili. 21. februara sy mjez Radworjom a Łupoju dźesać tychle ptakow wobkedźbować móhł, nazajtra bě jich hižo wjace hač 20. Dny po tym běchu poriki na łukach při hatach blisko swojich hnězdow ze zašłych lět při tokanju widźeć. Hižo rano zahe sy jich na trompetu podobny zwuk słyšał. Žorawje wostawaja jako porik cyłe žiwjenje hromadźe. Wot kónca měrca wone swoje hnězda wobsadźeja a lahnyć započinaja. Potom je ćicho wokoło nich a wuhladaš jenož jednotliwe eksemplary abo młode poriki, kotrež njejsu splažnu zrałosć hišće docpěli.
28 hač do 31 dnjow staršej zwjetša dwě jejce lehnjetej a kónc apryla wuhladaš prěnje poriki z jednym abo dwěmaj młodźatomaj. Žorawje su jara kedźbliwe a spłóšiwe zwěrjata, kotrež hižo ćeknu, prjedy hač sy je wuhladał.
Wosebity pad chutnje brać
Runje tak kaž zawčerawšim w Slepom stejachu najnowše rozsudy energijoweho koncerna LEAG tež na dnjowym porjedźe wčerawšeho posedźenja Trjebinskeje gmejnskeje rady.
Trjebin (AK/SN). Zrěčenje Vattenfalla z Trjebinskej gmejnu nastupajo Miłoraz z lěta 2013 ma zakład za nowe jednanja energijoweho koncerna LEAG być. „Hdyž k wotbagrowanju Miłoraza dóńdźe, přewozmjemy trěbnu zamołwitosć“, rjekny zamołwity za přesydlenski management w předewzaću LEAG Thomas Penk na wčerawšim posedźenju Trjebinskich gmejnskich radźićelow.
„Mamy w Miłorazu nětko wulki problem“, Peter Krause z wjesneje rady rozłoži, „młode swójby, kotrež běchu před 25 lětami sem přićahnyli, chcedźa so přesydlić. Mamy pak tež 70- a 80lětnych. Woni su we wsy hłuboko zakorjenjeni a nochcedźa so přesydlić.“ Krause sej tohodla žada, zo měli zamołwići LEAG swoje rěčne hodźiny direktnje pola potrjechenych w Miłorazu přewjesć, a nic jenož w Trjebinje.
„Originalny“ křižer w SKI
Jutrowna stolica Hornjeje Łužicy na najwažniši wjeršk lěta přihotowana
Budyšin (SN/MWj). Hotele a pensije we a wokoło Budyšina su dawno wuknihowane, wukładne wokna jutrownje pyšene a zdźěla přidatnje z wulkimi drastowymi klankami wuhotowane, wobšěrna brošurka na mnohich městnach wupołožena a wosebita digitalna karta zestajana. Takle je sprjewine město jako tajna jutrowna stolica Hornjeje Łužicy na nawal wopytowarjow přihotowane. Nanajwjetši dźěl ludźi přijědźe wězo křižerjow dla, wě Dietmar Stange z měšćanskeho turistiskeho towarstwa. Jim pak skića hromadźe z partnerami retomas dalšich zajimawostkow. Mjez nimi su tajke znate kaž jejkakulenje na Hrodźišku a jutrowna studnja na Mjasowych wikach, ale tež někotražkuli nowosć.
Kromolanski park dobra kulisa
Krótkopowěsće (06.04.17)
Změna 180 000 městnow zničiła
Budyšin. Wostrózbjaca je bilanca zapósłanca CDU w Sakskim krajnym sejmje Marka Šimana nastupajo wuwiće strukturnje słabych kónčin na wuchodźe Němskeje. Jeničce w Hornjej Łužicy je strukturna změna w 1990tych lětach 100 000 dźěłowych městnow zničiła, po wšej Łužicy 180 000. „Trjebamy nowy kurs“, rjekny Šiman dźensa w Budyšinje.
Zwjazk spěchuje saněrowanje
Lubij. Ze 103 000 eurami chce Zwjazk saněrowanje Schminkoweho domu w Lubiju spěchować. To zdźěli zapósłanča zwjazkoweho sejma Caren Lay (Lěwica), kotraž bě so za podpěru zasadźiła. Wot Hansa Scharouna (1883–1972) naćisnjeny Schminkowy dom słuša k wuznamnym twarjenjam klasiskeje moderny.
Předawarki wosebje wohrožene
Düsseldorf. Dźěłarnistwo ver.di warnuje před hrožacej chudobu w starobje pola mnohich sobudźěłaćerjow we wikowanju. W žanej druhej branši njeje riziko tak wulke, zo sy po zakónčenju powołanskeho žiwjenja chudy, rjekny čłonka zwjazkoweho předsydstwa ver.di Stefanie Nutzenberger dźensa nowinarjam. Wosebje wohrožene su žony. Dźeń a mjenje předawarnjow płaći ludźi po tarifje.
Kónc tydźenja z kolesom po čěske rohlíki jězdźił
Swojich kedźbyhódnych sportowych wukonow dla je sej Smjerdźečan Gerat Krawc hižo jako šuler w Ralbicach kedźbnosć mjez wučerjemi a připóznaće swojich sobušulerjow zdobył. Wot šulskeho hač do młodźinskeho časa njeje jenož kopańcu hrał, ale so tež lochkoatletice wěnował – a to přewažnje běhanju srjedźnych a dołhich čarow hač do 10 000 metrow. Na wokrjesnej olympiadźe w 9. lětniku docpě nahladne 2. městno w běhu na 3 000 metrow.
Jako 43lětny přesta Gerat Krawc kopańcu hrać a rozsudźi so z kolesom jězdźić. Wot lěta 2006 nětko kóždolětnje registruje, kelko kilometrow je do pedalow stupał a kelko metrow wysokosće je přewinył. Dotal bě to něhdźe 120 000 kilometrow, z čimž je potajkim ekwator trójce wobjěł. Spočatnje bě to wob lěto 5 300 kilometrow, pozdźišo zliči wón samo 13 500 kilometrow puća. Zwjetša wuhladaš jeho njedźelu kolesować. Jeho najdlěša čara bě 256 kilometrow dołha a wjedźeše nimo třoch putniskich městnow: Róžanta we Łužicy, Krupki a Filipova w Čěskej.
