„Ně“ k wotbagrowanju kruće zapisać
Slepo (AK/SN). Po wozjewjenju rewěroweho koncepta LEAG wočakuja wot hórnistwa potrjecheni Slepjanskeje gmejny zawjazowace wotmołwy za přichod. Tole podšmórny zastupowacy wjesnjanosta Jörg Funda na wčerawšim posedźenju tamnišeje gmejnskeje rady. „Koncern dyrbi so wo to starać, zo ‚ně‘ k wotbagrowanju tež ‚ně‘ wostanje. Tole dyrbi so prawnisce zawěsćić. Dlěje hač dźesać lět w njewěstosći žiwy być dosaha“, Funda rjekny. Wobydlerjo maja wjele prašenjow. Kak hodźa so samsne žiwjenske poměry tych docpěć, kiž běchu wot hórnistwa potrjecheni, a tych, kotřiž to njeběchu? Što budźe z wotstorkowanymi inwesticijemi na priwatnych twarjenjach? Kak z wopłóčkami dale póńdźe? A što budźe ze saněrowanjom komunalnych dróhow, mostow a twarjenjow?
Pruwuja wšelake móžnosće
Za přichodny hort chcedźa w Njebjelčicach nowe rumnosće zarjadować
Njebjelčicy (JK/SN). Zhromadnje z Křesćansko-socialnym kubłanskim skutkom jako nošerjom a zastupjerku krajneho młodźinskeho zarjada chcyše sej Njebjelčanski wjesnjanosta Tomaš Čornak (CDU) zawčerawšim móžne rumnosće za přichodny šulski hort w Njebjelčanskej pěstowarni wobhladać. Dokelž pak bě sobudźěłaćerka młodźinskeho zarjada zadźěwana, wotměje so tónle termin nětko hakle w juniju. Najebać to je wěste, zo dźěl horta Worklečanskeje šule w Njebjelčicach zarjaduja.
W Koslowje chcedźa wobchad ličić
Njeswačanscy gmejnscy radźićeljo su wčera na swojim posedźenju zakłady hospodarskeho plana wobjednali. Při tym dyrbjachu so z jara wjele ličbami zaběrać.
Njeswačidło (JK/SN). Na swojim wčerawšim posedźenju dyrbjachu radźićeljo Njeswačanskeje gmejny wulku wutrajnosć měć. Sobudźěłaćerka financneho wotrjada gmejny Liliana Wetzko rozłoži jim zakłady, pozadki a zestawu hospodarskeho plana. Wšitke pozicije na njeskónčnej lisćinje ličbow maja so při planowanju gmejnskich financow a nadawkow wobkedźbować. Wjesnjanosta Gerd Schuster (CDU) přispomni, zo drje su minjene lěta mjenje časa trjebali plan nastajić, za to pak su dźensa wšelake pozicije wo tójšto komplikowaniše w zestawje. Přiwšěm budu w gmejnje sčasom wurunany plan nastajić móc. Wažne při tym budźe, w kotrej měrje dóstanu klučowe připokazanki wokrjesa, wosebje tak mjenowane inwestiwne klučowe připokazanki. Z nimi maja zwoprawdźić winowatostne nadawki, kaž na přikład nastupajo wohnjowu woboru.
Krótkopowěsće (09.05.17)
Zahaja filmowy festiwal
Žitawa. Z koprodukciju „Centaur“ wo kirgiziskim paduchu koni zahaja dźensa wječor w Žitawje mjezy přesahowacy Nysowy filmowy festiwal. Hač do njedźele, 14. meje, pokazaja w třikrajowym róžku Němskeje, Pólskeje a Čěskeje 130 hrajnych a dokumentarnych filmow. Za cyłkownje 10 000 eurow spožča wosom mytow. Zarjadowanja planuja w 23 hrajnišćach na 13 městnach, mjez druhim w Budyšinje.
Prěnja žona z generalom so stała
Praha. Składnostnje róčnicy kónca Druheje swětoweje wójny je čěski prezident Miloš Zeman nowych generalow powołał. Mjez nimi je prěni raz w stawiznach čěskeje armeje tež žona – Lenka Šmerdová, poradźowarka načolnika generalneho staba a zamołwita za rekrutow. Podźěl žonow w čěskim wójsku wučinja tuchwilu 13 procentow.
Nowy rozmach w solarnej branši
Modelowe miniatury čakaja na wopytowarjow
Njeswačidło (ML/SN). Něhdźe sto požčonkow, mjez nimi 75 modelow, je hobbyjowy pasler a zběraćel Michael Noack z Wjelećina Njeswačanskemu domizniskemu muzejej za 35. wosebitu wustajeńcu přewostajił. Bywši dróhotwarc, twarski inženjer a nětčiši wobchadny policist na awtodróhach je hižo jako młodostny rady paslił a so wosebje modelam jězdźidłow a dalšich pohibowacych so eksponatow wěnował. Jeho prěni paslenski wudźěłk bě drjewjany traktor. Wuhladamy we wustajeńcy tójšto miniaturowych železnicow, samotwarjenych modelowych wosobowych a nakładnych awtow kaž tež dioramy twarnišćow a twarjenjow.
Policija (09.05.17)
Kólnja so paliła
Chasow. Njeměrne hodźiny mějachu w nocy na póndźelu w Chasowje. Tam je w drjewjanej kólni z dotal njeznateje přičiny woheń wudyrił. W kólni běchu trawnikowy traktor z připowěšakom, syčawa a wšelki druhi elektriski grat. Na zbožo so nichtó zranił njeje.
Motorskaj do so zrazyłoj
Jitk. Ćežko zraniłoj staj so zawčerawšim popołdnju wodźerjej motorskeho pola Jitka. Tam chcyše 53lětny ze swojej MZ nalěwo do směra na Ralbicy wotbočić. W tym wokomiku pak přesćahny jeho 32lětny muž na swojej Kawasaki. Wobeju motorskeju dyrbjachu z ćežkimi zranjenjemi do chorownje dowjezć. Škoda na jězdźidłomaj wučinja 3 500 eurow.
W klóštrje štom lěta sadźili
Swědči wo spokojnosći
Starši sobu rozsudźili, štó ma w kubłanišćach wobjed poskićeć
Budyšin (CK/SN). Za koncesije k zastaranju z wobjedom wot šulskeho lěta 2017/2018 je Budyska měšćanska rada nětko zelenu swěcu dała. Za 15 kubłanišćow w nošerstwje města bě zarjadnistwo wukony w jědnaće losach wupisało. Při tym jedna so wo 450 porcijow w pěstowarnjach, 800 na zakładnych šulach, 300 na wyšich a spěchowanskich šulach kaž tež 470 na gymnazijach. Pjeć zajimcow z Drježdźan, Zhorjelca a Połčnicy je so wo tónle nadawk prócowało. Do posudźowanja jich poskitka zapřijachu radźićeljo koncept a płaćiznu po 30 procentach kaž tež jědźny plan k 40 procentam. Tele kriterije běchu hižo před lětami po dlěšej diskusiji wo šulskej jědźi takle wobzamknyli. To samsne płaći za žadanje, zo maja zastupjerjo staršich a personala sobu rozsudźić. Kaž so nětko pokaza, dóstanjetej jeničce Fichtowa a Curiejowa zakładna šula noweho zastaraćela. To swědči po wuprajenju zarjadnistwa „wo wěstej spokojnosći“.
Połoženje wostanje dale napjate
Sakske komuny maja sej dźeń a ćešo swoje financy solidnje rjadować. Hospodarski plan nastajić je tuž wšo druhe hač jednore. Tole so wčera tež w Hamorje pokaza.
Hamor (AK/SN). Z jednym napřećiwnym a štyrjomi wzdatymi hłosami je Hamorska gmejnska rada wčera dwójny etat 2017/2018 wobzamknyła. Loni dyrbjachu wjace hač dźesać milionow eurow přemysłoweho dawka wróćić. „Za lěto 2017 liči gmejna z tym, zo dyrbi znowa 300 000 do 500 000 eurow wróćić“, rěka w rozprawje k etatej. Hakle wot lěta 2018 změja po wšěm zdaću zaso dochody něhdźe 1,2 milionow eurow z přemysłoweho dawka.
Ćežišća aktualneho hospodarskeho plana su dalše turistiske wuwiće při Bjerwałdskim jězoru, wohnjoškit, dźěćace dnjowe zarjadnišća a wudźeržowanje gmejnskich pućow. Za to dóstanu wot Swobodneho stata Sakskeje lětsa 7,4 miliony eurow klučowych připokazanjow. Klětu budźe to jenož 25 000 eurow a w třoch dalšich lětach stajnje něhdźe 60 000 eurow. „Komplikowane połoženje njeje Hamorska gmejna sama zawiniła. Hłowna přičina je bjezbóžny dawk bohatych, kotryž mamy Sakskej płaćić“, podšmórny radźićel Horst Jannack, bywši nawoda hłowneho zarjada gmejny.
