Wojerecy (AK/SN). Lětušu Plaketu Konrada Zusy spožči město Wojerecy swojemu bywšemu wyšemu měšćanosće Horstej-Dieterej Brähmigej. To je měšćanska rada wčera jednohłósnje wobzamknyła. Z plaketu počesći město angažement Brähmiga za hajenje a šěrjenje namrěwstwa čestneho měšćana a wunamakarja kompjutera Konrada Zusy (1910–1995). Bywši wyši měšćanosta bě so bytostnje za zaměstnjenje noweho Zusoweho kompjuteroweho muzeja na Dietricha Bonhoefferowej we Wojerowskim nowym měsće zasadźał. Jako předsyda towarstwa Forum Konrada Zusy je Brähmig nastaće, wobsahowe wusměrjenje a financowanje muzeja hłownje sobu zmóžnił. Nimo toho je lěta 2007 Zusowy seminar za gymnaziastow do žiwjenja zwołał. Tehdy podachu so šulerjo w dźěłarničkach prěni raz na slědy wunamakarja kompjutera.

Chrósćicy (JK/SN). Na njedawnym posedźenju Chróšćanskeje gmejnskeje rady jewješe so mjez druhim prašenje za tym, w kotrej měrje so twarske dowolnosće, kotrež gmejna wudawa, dodźerža. Nastork k tomu dachu wjacore priwatne twarske naprawy, kotrež so zdźěla wot toho rozeznawaja, štož bě gmejna dowoliła. W tym zwisku potwjerdźi předsyda zarjadniskeho zwjazka Při Klóšterskej wodźe Měrko Domaška, zo maja so ći, kotřiž dowolnosć gmejny za twarsku naprawu dóstanu, na to dźeržeć, štož je dowolene. W padźe, zo so woprawdźity twar wot dowoleneho rozeznawa, hrozy přikaz, zo ma so spotorhać. Wokrjesny twarski zarjad ma kóždy čas prawo, twarske naprawy kontrolować, po tym zo stej pak gmejna pak zarjadniski zwjazk twarskej próstwje přizwoliłoj.

Před 20 lětami sportowu a wjacezaměrowu halu „Slavia“ přepodali

Radwor (SN/MWj). Kak spěšnje čas postupuje, wuwědomjeja sej tele dny wobydlerjo Radworja. Dźensa je tomu dokładnje 20 lět, zo su tam sportowu a wjacezamě­rowu halu „Slavia“ oficialnje přepodali. Wužiwali běchu ju šulerjo Radworskeju šulow hižo tydźenje do toho, zo móhli w njej program za pře­podaće nazwučować.

Tehdy bě so Radworčanam dawny són spjelnił, přetož staru sportownju pódla hrodu sy lědma tajku mjenować móhł. Spjelniła je so tohorunja nadźija, zo nowa hala jeno šulskemu sportej njesłuži, ale tež najwšelakorišim sportowym a kulturnym zarjadowanjam. Tak pře­wjeduja w „Slaviji“ sokołske volleyballowe turněry a kóždolětny Mikławšowy koparski turněr runje tak kaž dwulětne adwentne wiki Radworskeju šulow, ptačokwasne zarjadowanja Serbskeho ludoweho ansambla a dalše po­dawki. Dale wotměchu tam sakske mišterstwa zbrašenych blidotenistow, sakske mišterstwa w tekwando a judo kaž tež podobne sportowe eventy, kotrež hranicy Radworskeje gme­jny přesahachu.

20 lět je w stawiznach poprawom jenož miknjenje. Hdyž pak pomysliš, zo Ra­dworska sportowa a wjacezaměrowa hala „Slavia“ hižo telko lět steji, so zaso raz prašeš, hdźe su lěta wostali. Z połnym prawom pak smě so rjec, zo běchu to dobre lěta, w kotrychž mějachu a maja šulerjo wulkotne wuměnjenja za sportowu wučbu a najwšelakoriše towarstwa za swoju wólnočasnu sportowu zaběru. Tež na wulke zarjadowanja njeměło so zabyć. Hala słuša wšitke lěta runje tak do wsy kaž šula a cyrkej w susodstwje. Najskerje jenož mało ludźi dźensa hišće wě, kajke wupadachu něhdyša šulska zahrodka a pódla njeje priwatne zahrodki, na kotrychž městnje „Slavia“ nětko steji. Zo so tehdyša­ inwesticija hač do dźensnišeho na gmejnske financy wuskutkuje, toho­runja jenož mało ludźi wě. Njemóže tuž škodźeć, sej tež tole při kulojtym jubileju wuwědomić. Marian Wjeńka