Póndźelne čitanja woblubowane
Prawidłownje wotměwaja so we Wojerowskim jězorinowym klinikumje póndźelne čitanja. Přeco w 17 hodź. so wone započinaja a přiwabjeja stajnje něhdźe 50 zajimcow, tež z wokolnych wsow.
Wojerecy (SN/mwe). Kotre moderne terapeutiske móžnosće a metody su, što su přičiny chorosćow, hdy měli k lěkarjej hić – na tele a mnohe dalše prašenja dóstawaja zajimcy wotmołwu na prawidłownych póńdźelnych čitanjach we Wojerowskej chorowni. Přichodne čitanje 20. měrca budźe na temu narunanje bjedroweho zhibadła, a 3. apryla póńdźe wo złamane nadkoleno. Zarjadowarjo proša wo přizjewjenje pod telefonowym čisłom 03571/44 36 45.
Wob lěto wjace hač tysac porodow
Budyšin (SN/mwe). Hornjołužiske kliniki su ze swojimaj chorownjomaj w Budyšinje a Biskopicach moderne strowotniske předewzaće, mjez druhim z nutřkownej medicinu, chirurgiju, urologiju, wóčnym hojenjom a dalšimi kaž tež z institucijemi za diagnostiku a interwenciskej radiologiju a dalšimi. Ze specializowanymi poskitkami a certifikowanymi medicinskimi centrami a jako akademiska wukubłarnja so Hornjołužiske kliniki w regionje dźeń a bóle profiluja. Tuž chorowni w Budyšinje a Biskopicach k optimalnemu zastaranju pacientow přinošujetej.
Cyłkownje maja za pacientow 570 łožow inkluziwnje 30 intensiwnych łožow k dispoziciji. Něhdźe 84 000 stacionarnych a ambulantnych pacientow, mjez nimi pacienća nuzowych padow a nawonarodźene, w Hornjołužiskich klinikach w běhu lěta zastaruja. Wob lěto w Budyskej a Biskopičanskej porodowej klinice přerěznje něhdźe tysac holcow a hólcow na swět přińdźe, mjez nimi bě minjene lěta přerěznje dźesać dwójnikowych porodow – loni samo pjatnaće.
Nowi šeflěkarjo wužadani
Chorownje w Hornjej Łužicy na demografiske wuwiće přihotowane
Wojerecy/Kamjenc (SN). Łužiski jězorinowy klinikum we Wojerecach, chorownja swj. Jana maltezow w Kamjencu kaž tohorunja Hornjołužiske kliniki w Budyšinje a Biskopicach budu tež přichodnje derje na strowotniskopolitiske a demografiske wuwiće přihotowane. „Kaž přilubjene, wotpowědujemy swojej zamołwitosći. Smy medicinske portfolio na potrěbnosće našich pacientow wusměrili, a po tymle wuspěšnym puću dale kročimy.“ Takle zwurazni to njedawno šef Wojerowskeho jězorinoweho klinikuma Jörg Scharfenberg.
Wobzamknjenje přestorčili
Zahajenska bilanca Njeswačanskej gmejnskej radźe starosće načinja
Njeswačidło (JK/SN). Spěchowanskich srědkow je dźeń a mjenje. Kóžda gmejna, kotraž chce jich telko kaž móžno měć, zo by komunalne nadawki zwoprawdźiła, trjeba za to schwaleny hospodarski plan. Za lětsa pak trjebaja gmejny do toho hišće wopodstatnjenu zahajensku bilancu. Tajka bě trěbna w zwisku ze zawjedźenjom gmejnskeho knihowanskeho systema doppik wot lěta 2015. Termin, bilancu předpołožić, bě hižo 2013. Dokelž pak to gmejny přidatnje k swojemu prawidłownemu dźěłu činja, to wězo traje. Mjeztym je tež Njeswačanska gmejna zahajensku bilancu nastajiła, ta pak ma so hišće pruwować. A runje to wuwabi na zašłym posedźenju Njeswačanskeje gmejnskeje rady wótru, ale wěcownu diskusiju.
Haru a proch njewotwisnje měrić
Wotewrjene prašenja wobydlerjow nastupajo přichod Wochožanskeje brunicoweje jamy kaž tež poćežowanja z haru a prochom chce Trjebinska gmejna 23. meje na wobydlerskej zhromadźiznje rozłožić.
Trjebin (AK/SN). Spočatk decembra 2016 běchu Trjebinscy gmejnscy radźićeljo šefej sakskeje statneje kenclije dr. Fritzej Jaeckelej (CDU) list pósłali a w nim na hoberske poćežowanja komuny přez haru, proch, spadowacu dnownu wodu a wupowědźene komunalne poradźowanje skedźbnili. Na wčerawšim posedźenju předčita jim wjesnjanostka Kerstin Antonius (Trjebinske wolerske zjednoćenstwo) wotmołwu dr. Jaeckela. Wón zwuraznja swoje zasadne zrozumjenje za starosće wobydlerjow, nima pak za trěbne, haru a proch dokładnišo pruwować dać, tohorunja nic drobny proch. Z problemom, zo ma Trjebinska gmejna tójšto přemysłoweho dawka wróćić, ma so přisłušny referat statneje kenclije zaběrać.
Policija (09.03.17)
Žonje žiwjenje wuchowali
Kamjenc. 31lětnej žonje w Kamjencu su policisća zawčerawšim po wšěm zdaću žiwjenje wuchowali. Wona bě hladarnju w měsće wopušćiła a bě w psychisce napjatym połoženju. Policisća za njej blisko dwórnišća pytachu a namakachu ju při zachodźe do tunla, hdźež steješe na kolijach a čakaše na bližacy so ćah. Zastojnicy lokomotiwnika warnowachu a sćahnychu žonu z kolijow. Bjez tajkeho wobhladniweho jednanja by najskerje k tragiskemu njezbožu dóšło, kaž w policajskej rozprawje rěka.
Po třoch měsacach přestawki ma Slepjanski hosćenc „K hadźacej ...
Prěje wumjetowanja
Wojerecy (dpa/SN). Morjenja swojeje mandźelskeje dla ma so wot dźensnišeho ćěkanc z Afghanistana před chłostanskej komoru Zhorjelskeho krajneho sudnistwa zamołwić. 33lětnemu wumjetuja, zo bě loni spočatk awgusta we Wojerowskim přebywanišću za požadarjow azyla mać štyrjoch dźěći po rozkorje ze zawkom zadusył. Pozadk toho bě, zo chcyše so mandźelska wot njeho dźělić, kaž rěčnik sudnistwa zdźěli. Po njeskutku je muž ze swojimi dźěćimi ćeknył. Hakle spočatk septembra lepichu jich na madźarsko-serbiskej mjezy. Wot přepodaća 15. septembra sedźi Afghaničan w přepytowanskej jatbje.
Na zahajenju procesa je wobskorženy dźensa wšitke wumjetowanja statneho rěčnistwa prěł. Jeho mandźelska ćerpješe pod epilepsiju a je na jeje sćěhi zemrěła, wón rjekny. Za jednanje hač do spočatka apryla je cyłkownje šěsć dnjow předwidźanych. 33lětnemu hrozy jastwo na čas žiwjenja.
Čuja so zludani
Přepytowanja zakónčene
Drježdźany (SN/at). Drježdźanske generalne statne rěčnistwo je přepytowanja přećiwo třom podhladnym w padźe nadpada na planowany dom požadarjow azyla Husarenhof w Budyšinje zakónčiło. Wo tym informuje dźensa w nowinskej zdźělence.
Podhlad wobwinowanym napřećo złožuje so předewšěm na wuprajenja jednotliweho swědka. Tón pak njebě njeskutk sam wobkedźbował, zdźěli najwyši sakski wobskóržbny zarjad. Dalše přesłyšowanja na zakładźe toho, štož bě wony swědk słyšał, njejsu tele informacije wobkrućili, ale su je samo wuwróćeli.
„Tež přepytowanja a wuhódnoćenje objektiwnych forensiskich slědow, kaž na přikład porstowych wotćišćow, slědow DNA atd., runje tak kaž dalše dopokazowanske srědki njejsu k tomu wjedli, zo móžachu wobwinowanym wobdźělenje na njeskutku dopokazać“, rěka w nowinskej zdźělence. Wuchadźišća za dalše přepytowanje tuchwilu žane nimaja.
W nocy na 21. februar 2016 bě w kózłach Husarenhofa woheń wudyrił.
