Kaž tule w Bjerwałdźe su swójby minjeny kónc tydźenja tež w ...
Nowy železniski koncept
Choćebuz (SN). Na delnjołužiskich dwórnišćach w Radušu, Gołkojcach a Kósobuzu (Kunersdorf) móhli bórze zaso ćahi zastawać. Tole předwidźi we Wětošowje předstajeny wobchadny koncept, nastaty w nadawku města Wětošowa a gmejny Gołkojce. Tak měła so wobstejaca najdlěša ekspresowa železniska čara Braniborskeje do dweju linijow rozrjadować. Jedna dyrbjała wjesć z Choćebuza k coowej w Berlinje a druha z Wismara na Berlinske wuchodne dwórnišćo. Tak bychu ćahi wjace ludźi transportować móhli a bychu nimo toho dypkowniše byli, štož by zastaće na mjenowanych dwórnišćach dowoliło. W Radušu, Gołkojcach a Kósobuzu hižo wot lěta 2015 žane ćahi wjace njezastawaja. Šmórnjenje zwiskow běchu z tym wopodstatnili, zo chcedźa zapozdźenjam ćahow zadźěwać.
Z nowej studiju zaběraja so nětko w ministerstwje za wobchadnu infrastrukturu. Hač so wobšěrny planowanski proces ze wšitkimi wobdźělenymi gmejnami, ministerstwami a nošerjemi zajimow zahaji, njeje hišće jasne.
Countdown za póstnicy běži
Krótkopowěsće (21.02.17)
Mjenje mloka produkowali
Drježdźany. Plahowarjo dejkow w Sakskej su loni niskich płaćiznow dla mjenje mloka produkowali. Cyłkownje 164 ratarskich zawodow je wot oktobra hač do decembra 2016 tohodla wo pjenježnu pomoc EU prosyło, kaž ratarske ministerstwo zdźěla. Při tym jedna so wo 13 500 tonow mloka. Zawodam su cyłkownje 1,85 milionow eurow wupłaćili.
Program wikow předstajeny
Lipsk. Zamołwići Lipšćanskich knižnych wikow a literarneho festiwala „Lipsk čita“ wočakuja lětsa 260 000 wopytowarjow. Cyłkownje 2 100 nakładnistwow so tam wot 23. měrca ze swojimi nalětnimi programami prezentuje. Ně- hdźe 3 300 awtorow chce na 3 400 zarjadowanjach ze swojich knihow čitać. Budyske Ludowe nakładnistwo Domowina so tohorunja wobdźěli.
Čěske mólby w Japanskej
Praha/Tokio. „Słowjanska epopeja“, kolekcija wulkoformatnych wobrazow čěskeho molerja Alfonsa Muchi ze spočatka 20. lětstotka, je jako požčonka japansku stolicu docpěła. Tam budu mólby wuznamnych podawkow słowjanskich stawiznow tři měsacy wustajene. Wěstotnych přičin dla běchu wobrazy w třoch lětadłach do Tokija dowjezli.
Měnjenska symjenjowa bursa mnohich přiwabiła
Njebjelčicy (aha/SN). W mjenje towarstwa za zachowanje mnohotnosće wužitnych rostlin a Njebjelčanskeje gmejny witaše Tomaš Nowak wčera wulku syłu zajimcow, kotřiž su sej na 2. měnjensku symjenjowu bursu dóšli.
Hižo 1986 běchu entuziasća, kotřiž starosćiwje na pozhubjowace so družiny wužitnych rostlin zhladowachu, čestnohamtsce skutkowace towarstwo załožili. Zaměr je zachować kulturny pokład na witalnych a robustnych regionalnych rostlinach. Jeho čłonojo dźě wědźa, zo genetiska mnohotnosć zežiwjenje čłowjeka a skotu zaruča a zo leži w njej potencial za dalewuwiće a regionalne přiměrjenje rostlinskich družin tež hladajo na klimatiske změny.
Njebjelčanski wjesnjanosta Tomaš Čornak (CDU) bě wčera jara spokojom. Wjac hač 150 wopytowarjow, w přiběracej měrje tež ludźo gmejny, je składnosć wužiło a so wot něhdźe dźesać poskićerjow symjenjow poradźować dać. Radlubje chcedźa so nětko tež w plahowanju robustnych družin pospytać.
Policija (20.02.17)
Z domu za płunom smjerdźało
Biskopicy. Na Karla Liebknechtowej w Biskopicach je dźensa dopołdnja chětro za płunom smjerdźało. Hnydom wołachu wobydlerjo wohnjowu woboru. Kameradojo z měrjenskim aparatom zwěsćichu, zo stupaše amoniak ze zemskopłunoweje syće w pincy. Dokelž pak njebě mnóstwo přewulke, dosahaše pincu přewětrić. Na to wohnjowi wobornicy ENSO informowachu.
Kuriozny připad
Smělna. W Smělnej bě so minjeny pjatk z dotal njeznateje přičiny Peugeot dospołnje wupalił. 15 wohnjowych wobornikow njezamó tam hižo ničo wuskutkować. Při kontroli zastojnik Biskopičanskeho policajskeho rewěra zwěsći, zo njebě awto scyła přizjewjene, zo njeměještaj jeho młodaj wobsedźerjej zawěsćenski škit a běštaj bjez jězbneje dowolnosće po puću. Nimo toho bě na jězdźidle falšowane znamjo přičinjene, kotrež běštaj mužej internetnje pola Amazon skazałoj.
Spěšne kompjutery wužadane byli
Po dlěšej přestawce je mustwo BKA wokoło Měrćina Bulanka, Feliksa Brězana a Křesćana Grutki zaso derje wopytanu Lan-party w Chrósćicach organizowało. Minjeny štwórtk hižo běchu blida za kompjutery nastajeli, kable za milinu a kompjuterowu syć składli a rumnosće k zastaranju wobdźělnikow přihotowali.
Wubagruja błóto z hrjebje
Třeće zetkawanske popołdnjo NSLDź
Krótkopowěsće (20.02.17)
800 nowych mištrow
Drježdźany. W Sakskej je loni 800 rjemjeslnikow swoje mišterske pruwowanje złožiło. Najebać woteběrace ličby wostanje mišterske wopismo njeparujomny pječat kwality, zdźěli dźensa sakski rjemjeslniski zwjazk. Mjez absolwentami bě 108 žonow, jasnje mjenje hač 2015 (144 žonow). Wot lěta 1990 su w Sakskej 38 200 mišterskich wopismow přepodali. Wjace hosći w młodownjach
Kamjenica. Młodownje w swobodnym staće su dale woblubowane. Loni móžachu tam 352 000 přenocowanjow zličić, sydom procentow wjace hač lěta 2015. Jednaćel zwjazka młodownjow Alexander Ladwig je sej wěsty, zo je wuspěch młodownjow tež wuslědk noweho wusměrjenja na dowol, kotryž dźeń a wjace ludźi doma přežiwja.
Jubilej „Jizerskeje padesátki“
Liberec. „Jizerská padesátka“, najwuznamniše čěske wubědźowanje w sněhakowanju na dołhich čarach, je kónc tydźenja 50. róčnicu docpěła. Popularny masowy běh na 50 kilometrow po Jizerskich horinach wotmě so lětsa při njewšědnje dobrych wuměnjenjach. Běh je wot lěta 1999 tež dźěl swětoweje sněhakowarskeje serije Worldloppet.
Pjate złoto za Dahlmeier
