Prócuje so wšitkich zapřijeć
Na njedawnym nowolětnym přijeću Kamjenskeho měšćanosty přepodachu prěni raz Myto Pětra Barta za inkluziju. Ideju za to zrodźił bě Kamjenski ergoterapeut Michael Schiewack. Z mytom zwjazane pjenježne připóznaće 1 000 eurow přińdźe tohorunja z rukow Kamjenčana, kiž so hižo z powołanskich přičin z tym zaběra, štož inkluziju bytostnje wuznamjenja: Wón pomha čłowjekam, tak derje kaž móžno so (zaso) na zjawnym žiwjenju wobdźělić. Jako swoju ideju prěni raz zjawnje předstaji, mjenowaše jeho wyši měšćanosta Lessingoweho města Roland Dantz (njestronjan) „pioněra w naležnosćach inkluzije“.
Michael Schiewack sam praji k nastorkej, myto do žiwjenja zwołać: „Husto słyšach w zašłosći w zwisku ze sportom zbrašenych abo ludźi z handicapom mjeno Pětr Bart. Jako loni wo jeho smjerći zhonich, mje to pohnu počesćenje po nim pomjenować, wšako bě wón prócowar a iniciator na tym polu. Po dorěčenju z mandźelskej Weroniku Bartowej bě jasne, zo je myto za inkluziju woprawdźe hódne, nosyć mjeno Pětra Barta.“
W kolonje jězdźidłow wójska USA je wčera wječor na awtodróze A ...
Krótkopowěsće (09.02.17)
Pjenjezy Zhorjelskej załožbje
Zhorjelc. Sakska krajna direkcija je Zhorjelsku załožbu Měšćanska hala jako prawokmanu załožbu byrgarskeho prawa připóznała. Zaměr załožby je, wobstarać financne srědki za spěchowanje škita a hladanja pomnikow, za wuměłstwo a kulturu. Jako zakładne financowanje připrajichu jej 305 000 eurow.
Gerhard Richter 85tnik
Drježdźany/Köln. Sakska statna ministerka dr. Eva-Maria Stange (SPD) gratuluje Gerhardej Richterej k dźensnišim 85ćinam. Twórby wuměłca, kiž bě w Hornjej Łužicy wotrostł, su dźensa po cyłym swěće znate a najlěpje płaćene. Stange ma wuměłstwo w Kölnje bydlaceho Richtera za wosebje přiwabliwe, dokelž wobhladowaceho do srjedźišća staja.
Dataja namakankow
Praha. W ćahach statneje železnicy České dráhy su pasažěrojo loni 18 000 wšelakich wěcow zabyli. Dokelž ličba lěto wot lěta přiběra, pyta železnica za nowej formu, namakanki registrować. Wokomiknje testuja cyłostatnu internetnu dataju zhubjenych a namakanych předmjetow. Přez nju móhli so potrjecheni cyle jednorje wo swojim zabytym wobsydstwje informować.
Hižo zahe socialnu žiłku začuwała
Wot oktobra 2015 je Lucija Škodźina referentka za dušepastyrstwo młodźiny w serbskich wosadach biskopstwa Drježdźany-Mišno. Swoje dźěłowe městno ma we Worklečanskim Don Boskowym domje. „Ze swojim dźěłom móžu cyrkej žiwu a mnohostronsku wuhotować, a to stajnje po přećach młodostnych“, Lucija Škodźina rozłožuje, „móžu swoju maćeršćinu pěstować. Wěra a rěč słušatej za mnje hromadźe.“
Młoda Serbowka je w Serbskich Pazlicach wotrostła. Hižo zahe začuwaše swoju socialnu žiłku. „Ta leži w swójbje“, měni 23lětna dźensniša Wotrowčanka. „Naša mać skutkuje w Kamjenskim Domje swj. Jurja, kotraž je w nošerstwje Carity. Kaž mać chcych so tež ja za potrěbnych zasadźeć. Začuwach přeće, zbožo, kotrež sama mam, wróćić.“
Krótkopowěsće (08.02.17)
Racija přećiwo reichsbürgeram
Choćebuz. Policija je dźensa rano w Choćebuzu raciju přećiwo tak mjenowanym reichsbürgeram přewjedła. Wosebite komando je wjacore bydlenja a běrowy přepytało, zdźěli rěčnik policije. W srjedźišću akcije steješe 55lětny, kiž je pječa z brónjemi wikował, byrnjež žanu dowolnosć njeměł. Muža zajachu, dokelž mějachu wjacore wukazy za to.
Koncept hač do julija
Berlin. Přistajeni wagonotwarca Bombardier maja hač do julija zhonić, što so z jich twornjemi stanje. Přiwšěm nochce koncern dołhodobne garantije dać, rjekny šef němskeje wotnožki Michael Fohrer nowinarjam. Zaměr je zawody zaso rentabelne sčinić. „Minjene pjeć lět bě bilanca bohužel negatiwna.“ Kelko městnow chcedźa šmórnyć, wón njerjekny.
Bjeru jědź sobu na dźěło
Policija (08.02.17)
Nadpad wumysleny był
Běła Woda. Štyri njeznate a maskěrowane wosoby su w nocy na njedźelu w Běłej Wodźe pječa 25lětneho muža nadpadnyli. Tole zdźěli pozdatny wopor po tym policiji. Kriminalna słužba Běłowodźanskeho policajskeho rewěra prošeše na to zjawnosć wo pomoc a pad přepytowaše. Při tym so wukopa, zo bě sej 25lětny nadpad jenož wumyslił. Jako jeho přesłyšowachu, wón přizna, zo bě so tak nadźijał, zo policisća jemu taksi za domojjězbu skazaja. Pozdatny wopor je nětko sam podhladny skućićel. Přećiwo njemu zahajichu jednanje wudawanja njeskutka dla.
Za region z wokolnymi gmejnami hromadźe dźěłać
Wojerecy (AK/SN). Město Wojerecy chce zhromadne dźěło z wokolnymi gmejnami zesylnić. Tole podšmórny wyši měšćanosta Stefan Skora (CDU) na zašłym posedźenju měšćanskeje rady. Jeje čłonojo jednohłósnje wobzamknychu, zo ma Stefan Skora „interkomunalnu dźěłowu skupinu“ wutworić. Tak sćěhowachu radźićeljo namjet frakcijow CDU, SPD a Lěwicy kaž tež Łutowskeho měšćanosty Franka Lehmanna. Wopřijimać ma skupina měšćanostow a wjesnjanostow Wojerec, Njedźichowa, Kulowa, Łaza, Sprjewineho Doła, Halštrowskeje Hole a Łutow kaž tež stajnje jednoho do třoch gmejnskich radźićelow.
„Chcemy so jónu w kwartalu zetkać“, rjekny wyši měšćanosta. Najwažniše temy budu wutwarić zwjazkowu dróhu B 97 do směra na Drježdźany, zachować železniski zwisk z Wojerec do Drježdźan a Zhorjelca, Šibojski jězor turistisce wotkryć a wuwiwać, šěrokopasmowu syć za spěšny internet rozšěrić a infrastrukturu na Wojerowskej industrijnej přestrjeni polěpšić.
Wjery we wsy camprowali
Mjenje ludźi w pjeć komunach
Pančicy-Kukow (SN/MWj). Ličba wobydlerjow w pjeć gmejnach zarjadniskeho zwjazka Při Klóšterskej wodźe je loni dale woteběrała. Tole wuchadźa ze statistiskeho přehlada, kotryž je předsyda zwjazka Měrko Domaška nětko wozjewił. Tak zličichu dohromady 7 103 wobydlerjow, lěto do toho bě jich 7 125 a w lěće 2014 hišće 7 149. Njepřetorhnje-li so tónle trend, móhła ličba wobydlerjow za pjeć lět pod 7 000 spadnyć.
Mjeztym zo je w Chrósćicach, Pančičach-Kukowje, Worklecach a Ralbicach-Róžeńće loni mjenje ludźi hač 2015 bydliło, bě jich w Njebjelčicach 15 wjace. To je wuskutk toho, zo bě tamniše wuwiće w kóždym nastupanju pozitiwne. Tak je so w Njebjelčicach 19 dźěći narodźiło, dźesać wjace hač lěto do toho. Dale je tam sydom ludźi zemrěło porno 17 w lěće 2015. 58 wosobow je do gmejny přićahnyło, štož je porno 29 w lěće 2015 nahladne stopnjowanje, přećahnyło pak je 55 ludźi, pjeć mjenje hač lěto prjedy.
Wjace porodow a mjenje zemrětych hač w lěće 2015 drje mějachu na přikład tež w gmejnje Ralbicy-Róžant, tam pak je na wšěch 66 wosobow gmejnu wopušćiło.
Přichodne lěta budu jara lutować
Z dołhodobnym hospodarskim strukturnym konceptom, kiž płaći wot lětušeho hač do lěta 2020, reaguje Slepjanska gmejna na swoje tuchwilne napjate pjenježne połoženje.
Slepo (AK/SN). Hač do lěta 2020 chce Slepjanska gmejna dohromady 219 000 eurow zalutować. Tole předwidźi hospodarski strukturny koncept, kotryž je komornica Carmen Petrick na wčerawšim posedźenju gmejnskeje rady rozłožiła. Lětsa je předwidźane nimale 70 000 eurow zalutować, přichodne lěta stajnje něhdźe 50 000. Z jednym wzdatym hłosom Slepjanscy radźićeljo tomu wčera přihłosowachu.
