Zmylk pilotki bě přičina smjertneho njezboža z płujadłom w meji na Klukšanskim lětanišću. Tole wuchadźa z kónčneje rozprawy Zwjazkoweho zarjada za přepytowanje lětanskich njezbožow (BFU). Wina druhich abo techniski defekt njepředležitej.

Što drje je sej młoda płujadłowa lětarka z Braunschweigskeje kónčiny mysliła, jako so wony zahubny dźeń, 3. meje, po zmištrowanym wubědźowanju Klukšanskemu lětanišću bližeše? Piloća mějachu dwě móžnosći přizemić: pak hnydom na městnje pak po přidatnym kole w separatnym wobłuku. „Kaž ze škričkowanja z lětadłom wuchadźa, je pilotka po docpěću ciloweho banta planowała, skrótšene koło nad lětanišćom lećeć. To by prawidłam wotpowědowało“, rozłožuje nawoda přepytowanja Frank Stahlkopf z BFU. Potom pak drje je so 21lětna ­krótkodobnje hinak rozsudźiła. „Swědcy wobkedźbowachu, kak je wona bjez wusunjenych kolesow dźesać metrow wysoko nad lětanišćom lećała. Nadobo pak płujadło hižo runje njelećeše, ale so dele měrješe a skónčnje z cockpitom na zemju zrazy“, Frank Stahlknopf wuswětla. Pilotka hišće na městnje njezboža zemrě.

W kupnicy hewrjekali

Kamjenc. Krótko do toho, prjedy hač je Kamjenska kupnica Kaufland na Willyja Muhlowej zawčerawšim wječor začiniła, tam štyrjo mužojo hewrjekachu. Mjez druhim twory z polcow po kupnicy mjetachu. Do přiwołanych stražnikow a policistow dwaj z nich samo biještaj. Jako mějachu jich skónčnje tola pod kontrolu, so wukopa, zo běchu hewrjekarjo dospołnje pjeni.

Šulske stawizny Njebjelčic sahaja hač do spočatka 17. lětstotka. Wot toho časa mjenujcy je tam w běhu dweju lětstotkow šěsć muži ze swójbnym mjenom Pjetaš wuwučowało.