Kulow (UH/SN). Wutrobnje su wčera wječor młodźi Kulowscy wohnjowi wobornicy zhromadnje ze swojej nawodnicu Ingeborg Zomack witali sakskeho ministerskeho prezidenta Stanisława Tilicha (CDU). Najmłódši čłonojo běchu hosćej zdobom móst k aktiwnym wobor- nikam Kulowa a wokolnych wsow.

Spěšnje přińdźechu do rozmołwy, wšako bě ministerski prezident w prěnim rjedźe přijěł, jónu wosobinsce so dźakować žonam a mužam wohnjoweje wobory za jich njesprócniwe dźěło. Wysoko hódnoćeše wón jich hotowosć a spušćomnosć kaž tež přikładne skutkowanje za dorost. Spušćomnosć je po słowach Tilicha najwažniša kajkosć, přetož njehladajo na pomoc při wohenjach abo wobchadnych njezbožach je wažnosć aktiwnych wobornikow wšudźe začujomna.

Frontalnje do so zrazyłoj

Wopaka. Na dalnodróze B 96 mjez Wopakej a Wurbisom je so wčera rano ćežke njezbožo stało. 57lětna wodźerka awta marki Kia zajědźe w prawej křiwicy předaloko na lěwu stronu dróhi a zrazy do napřećo přijěduceho busa. Šoferka so ćežko zrani, a ju dyrbjachu z helikopterom do chorownje dowjezć. 41lětny busowy šofer so snadnje zrani. B 96 bě nachwilnje dospołnje zawrjena.

Do składa so zadobyli

Steina. Njeznaći su so w minjenym času do składa firmy w Steinje pola Kamjenca zadobyli. Z objekta při hłownej dróze zhubichu so mjez druhim jadrowy njeboz a wšelake specielne nastroje. Hódnota kradnjeneho grata wučinja pjećcyfrowu sumu. Wěcna škoda 70 eurow je porno tomu snadna. Kriminalni technikarjo objekt za móžnymi slědami přepytuja. Policija je slědźenje za paduchami zahajiła a z pomocu swědkow za skućićelemi a gratom pyta.

Wojerecy (SN). Wot spočatka awgusta běži třeća projektowa namołwa, zwoprawdźić wuwićowu strategiju programa Leader tež w spěchowanskim regionje łužiska jězorina. K tomu słušeja mjez druhim gmejny Hamor, Halštrowska Hola, Łuty, Łaz, Slepo a město Wojerecy.

Wo spěchowanje za swoje projekty we wobłuku koncepta požadać móža so wobydlerjo, předewzaća, towarstwa a komuny. K spěchowanju projektow za wjesne wuwiće ma Leaderowy region 9,3 miliony eurow hač do lěta 2020 k dispoziciji.

W minjenymaj dwěmaj wotrězkomaj bu hižo 22 projektow k spěchowanju namjetowane. Mjez druhim dźe wo to, polěpšić turistisku infrastrukturu a wu­tworić načasne bydlenja na wsach na zakładźe wutwara a přetwara starych chěžow. Spěchowali su naprawy, kotrež žiwjenske wuměnjenja na wsy polěpšeja. Na mnohich wsach zarjadowachu městnosće, hdźež haja a skrućeja wjesnu zhro­madnosć, hdźež pěstuja kulturne namrěwstwo z wosebitym widom, zachować w spěchowanskim regionje serbsku rěčnu a kulturnu substancu.

Bórkhamor (JoS/SN). Tajke něšto njebě Motorska konwencija łužiskeje křiwicoweje ligi (Motorradconvention der Kurvenliga Lausitz) hišće dožiwiła. Sedmy raz zetkachu so bikerojo minjenu sobotu k najwjetšemu zarjadowanju gmejny Sprjewiny doł z dokładnje 210 motor­skimi. Do zhromadneje wuprawy bě nawal hoberski a organizatorojo dyrbjachu krótkodobnje při Jantarowym jězoru přidatne­ móžnosće připrawić, zo móhli motorscy swoje mašiny porjadnje wotstajić.