We wodźe najwjace wjesela
Hdyž su prózdniny a lěćo nam pokazuje, što słónco wšo zamóže, da njeje ničo rjeńše, hač so při horcych temperaturach we wodźe wokřewić. Zo maja dźěći při tym najwjace wjesela, to hodźi so tuchwilu na wšitkich łužiskich jězorach, hatach a w kupjelach wobkedźbować, tež tule na Rogeńskim jězoru. Byrnjež so druhdy trochu podešćowało, powšitkowne pozitiwne połoženje ćopłeho wjedra to njezměni. Foto: Michael Helbig
Krótkopowěsće (28.07.16)
Sakska najbóle profituje
Drježdźany. Sakska wot minimalneje mzdy bóle profituje hač druhe wuchodoněmske zwjazkowe kraje. Tole wuchadźa z přepytowanja hospodarskeho ministerstwa. W swobodnym staće je wjace firmow wot noworjadowanja potrjechenych hač druhdźe. To płaći tež za ličbu sobudźěłaćerjow, kotřiž wot lońšeho 8,50 eurow na hodźinu dóstawaja.
Arcybiskop Hrušovský njeboh
Nitra. Słowakski arcybiskop Dominik Hrušovský je 90lětny zemrěł. Tole zdźěli Słowakska biskopska konferenca. Hrušovský bě za čas socializma w romskim eksilu. Po přewróće wróći so do domizny, hdźež su jeho za generalneho sekretara biskopskeje konfereny wuzwolili. Lěta 1996 sta so z pósłancom bamža Jana Pawoła II. w Běłoruskej.
Policist nima tetowěrowany być
Praha. Štóž chcył so w Čěskej z policistom stać, njesmě tetowěrowany być. To je jedne z wuměnjenjow přistajenja. Mjeztym přiběrajcy kritizuja, zo zakaz tójšto zajimcow wot policajskeje słužby wottraša. Po najnowšim woprašowanju pak njeby 90 procentow ludźi w kraju z tetowěrowanymi policistami žadyn problem měło.
Policija (28.07.16)
Pokradnjenej awće napadnyłoj
Horni Wujězd. Wčera rano su policisća slědźenskeje skupiny (GFG) na awtodróze A 4 dwě pokradnjenej wosobowej awće zawěsćili a jeju šoferow zajeli. Zastojnikam běštej jězdźidle marki Honda Jazz z Geraskim čisłom napadnyłoj. Jedne awto zadźeržachu zastojnicy pola Wujězda, tamne pola wotbóčki Budyšinje-zapad. Při kontroli woni spóznachu, zo běchu zamki awtow manipulowane. Kaž so wukopa, buštej awće jenož hodźiny do toho w Gerje pokradnjenej. Wobsedźerjej njeběštaj to ani hišće pytnyłoj. 22 a 23 lět stareju skućićelow policija zaja. Wosebita komisija pad nětko přepytuje.
Młodźi wobornicy zahoriće zwučowali
Na Narćanskej krajnej wohnjowobornej šuli a kubłanišću za katastrofowy škit wotmě so njedawno 16. wukubłanski tydźeń. Wobdźěliło je so tam dohromady 120 młodych wobornikow.
Narć (UH/SN). W dwanaće skupinach zwučowachu młodźi wohnjowi wobornicy z cyłeho swobodneho stata, mjez nimi tež Serbja. Wšitcy chcychu pruwowanje wobstać a sej tak zdobyć wukonowu spinku – najwyši kwalitny stopjeń w młodźinskej woborje.
Wobstatk pruwowanjow běchu hašenje, spěšnosć, staflowy běh, kulostork kaž tež rozmołwa. Dokelž wobhladuja wuspěšne wukony jako wobšěrnu praktisku a teoretisku wědu, mjenuja młodźinske wobory wukonowu spinku rady „rjemjeslniski list“. To je 16- a 17lětnych wězo wosebje motiwowało.
Pjenjezy rozsudne byli
Gmejna Wulka Dubrawa, kotraž bě dotal stawniske naležnosće Radworskeje gmejny rjadowała, je jej to wupowědźiła. Nětko rozsudźichu so Radworčenjo za noweho partnera.
Radwor (SN/BŠe). Stawnistwo w Malešecach budźe přichodnje zamołwite za wobydlerjow Radworskeje gmejny. Tole wobzamknychu zawčerawšim radźićeljo na swojim wuradźowanju. Do toho diskutowachu woni wo móžnych alternatiwnych poskitkach Njeswačanskeho a Rakečanskeho stawnistwa. Budyske njeje gmejnje žadyn poskitk dało.
Wučer Jurij Wjela w Komorowje spomóžnje skutkował
W Komorowje pola Rakec nańdźemy dwě bywšej šuli, kotrejž stej derje zdźeržanej a dźensa jako bydlenja wužiwanej. Hižo 1822 natwarichu na sewjernej kromje wsy do směra na Stróžu a Wulke Ždźary w něhdyšej piwarni knježeho dwora prěnju šulu w tehdy hišće ryzy serbskej wsy. Znate je, zo běchu dźěćom do toho w priwatnym domje při Dwórnišćowej dróze, kotryž je mjeztym potorhany, zakładne znajomosće w čitanju, pisanju a ličenju posrědkowali.
To so jeno dźiwaš
Rjane swjedźenje w Nižej Wsy
Šulske puće do dalokej měrje wěste
We Wojerecach dóńdźe loni k 968 wobchadnym njezbožam, 833 sta so direktnje w nutřkownym měsće. Z tym je ličba porno lětu 2014 z 933 njezbožemi snadnje přiběrała.
Wojerecy (AK/SN). „W zašłych pjatnaće lětach njeje so na wobchadnym wuwiću ničo bytostneho změniło. Spektakularnych kopjenjow hižo njeje“, Ingrid Stille, nawodnica Wojerowskeho wobydlerskeho zarjada, wčera na předstajenju lońšeje statistiki wobchadnych njezbožow podšmórny. „Měšćanska kónčina ma jasne strukturowanje. Wobdźělnicy wobchada so často z pomocu amplow wjedu.“
Alternatiwa za šulerjow
Budyšin (SN). Ze zakónčenjom lětnich prózdnin 8. awgusta zahaji so za šulerjow a wukubłacych nowe šulske lěto. Za šulskich nowačkow, sobujědujcych w busu, železnicy abo tramwajce, to woznamjenja, zo podadźa so po njeznatych pućach k šuli. Tomu so tež wobchadne předewzaća kaž wobchadny zwjazk Hornje Łobjo (VVO) přiměrja a poskićeja staršim za tuńšu alternatiwu płaćizny jězdźenkow. Wužiwajo potuńšene tydźenske, měsačne a lětne lisćiki, trjebaja woni potom kartu kupcow. Tajku dóstanu bjezpłatnje pola VVO a dalšich wobchadnych předewzaćow.
Kładu nowe špundowanje
Biskopicy (SN). Wot dźensnišeho hač do pjatka kładu rjemjeslnicy w ambulancy za nuzne pady Biskopičanskeje chorownje nowe špundowanje. Z tym su wězo wobmjezowanja zwjazane. To rěka, zo měli so zranjeni w chirurgiskej praksy dr. Lehmann a dr. Viehriga w Biskopicach přizjewić. Zdobom měli so pacienća z chutnymi symptomami tež do Kamjenskeje chorownje maltezow, do Budyskeho kaž tež Wojerowskeho klinikuma podać abo nuzoweho abo domjaceho lěkarja zazwonić.
Wjace njezbožow
