Krótkopowěsće (05.09.16)
Zmóžnja cyrkwinski azyl
Pančicy-Kukow. Klóšter Marijina hwězda w Pančicach-Kukowje zmóžnja jezidiskej swójbje z Iraka cyrkwinski azyl. Tole wozjewichu na wčerawšich Božich mšach w klóšterskej cyrkwi. Šěsćwosobowej swójbje z dźěsćomaj hrozy wotsunjenje do jich domizny a tam wěry dla smjerć. Sotry konwenta su so tuž rozsudźili, swójbu nachwilnje přiwzać. Štóž chce jej pomhać, njech so w klóštrje přizjewi.
Dohladuja wjac dźěći
Kamjenc. W sakskich dźěćacych dnjowych přebywanišćach dohladuja dale a wjac dźěći. Tole zdźěli dźensa statistiski krajny zarjad ze stejnišćom w Kamjencu. Porno lońšemu je to cyłkownje 7 886 dźěći wjac. 176 824 z 296 170 dohladowanych hišće do šule njechodźi. W Sakskej je 2 928 dźěćacych dnjowych přebywanišćow.
Afghanjanka wopor njeskutka
Wojerecy. 25lětna Afghanjanka, kotruž su we Wojerowskim domje za požadarjow azyla mortwu našli, je so z woporom njeskutka stała. To zdźěli Zhorjelska policija dźensa po jeje obdukciji. Po wšěm zdaću bě 32lětny mandźelski žonu morił, kotrehož su ze štyrjomi dźěćimi w starobje třoch do dźewjeć lět w Madźarskej našli.
Z ludźimi wěcownje rěčeć
Budyšin (CS/SN). 1. Budyske tydźenje demokratije pod hesłom „Přidaj swój žonop“ zahajichu so wčera na Žitnych wikach. Bohužel njeje wjedro ze zazběhowym zarjadowanjom derje měniło. Sylny dešć je wopytowarjow wottrašił, znajmjeńša na narěč wyšeho měšćanosty Alexandera Ahrensa (njestronjan) poskać. Wón zwěsći, zo hrozy demokratija tuchwilu pod kolesa přińć. Přećiwo čemuž su, to móža mnozy zwuraznić. Rjec pak, za čo su, je jim ćim ćešo. Tohodla je nadawk demokratiskich mocow, ze wšěmi rěčeć, wosebje z ludźimi, čejichž měnjenja njejsu. Dźe wo wěcowne rozestajenje z aktualnymi temami. Jedne z najnapjećišich zarjadowanjow budźe zawěsće forum 14. septembra, hdźež zaběraja so z dźěłom medijow. „Stejimy před ćežkimi a kompleksnymi prašenjemi, kotrež hodźa so jeno zhromadnje rozrisać“, wuzběhny wyši měšćanosta. Wćipne čini nimo toho zarjadowanje „Demokratiju sej zwažić: Serbski sejm – prěni parlament Serbow“ dźensa we 18 hodź. w Budyskim Kamjentnym domje.
Policija (05.09.16)
W křiwicy do so zrazyłoj
Łazk. Třo zranjeni a tójšto wěcneje škody je wuslědk wobchadneho njezboža, kotrez sta so sobotu popołdnju mjez Smjerdźacej a Łazkom. Tam zajědźe 41lětny ze swojim VWjom w lěwej křiwicy na napřećiwnu jězdnju a zrazy do napřećo přijěduceho Daewoowa. Tón so na to zwróći a wosta na třěše ležo. Mjeztym zo so wodźer VWja njezrani, dyrbjachu 75lětneho wodźerja Daewoowa kaž tež jeho sobujěducej w starobje 73 a 39 lět ambulantnje zastarać. Wobě wosobowej awće so dospołnje skóncowaštej. Kaž Zhorjelska policajska direkcija zdźěli, trochuja wěcnu škodu na wjacore dźesaćtysacy eurow. Policija pad nětko přepytuje.
Na dźěl stawiznow njezabyć
Z nutrnosću přesydlenje Miłoraza před poł lětstotkom wopominali
Slepo (AK/SN). Mjeńšinu dołho knježeše ćišina, jenož Miłoraski zwón bě słyšeć. „Prosymy za politisce zamołwitych, zo bychu sobučłowjesce a rozumnje jednali za přichod Miłoraza a za přichod našeje wosady“, předčita wjesny předstejićer Waldemar Locke wčera w Slepjanskej cyrkwi jednu ze štyrjoch próstwow. Z hnujacej Božej słužbu dopominaše tamniša wosada hromadźe z Miłoraskej wjesnej radu na prěnje dźělne přesydlenje Miłoraza před połsta lětami a na přeměstnjenje jeho pohrjebnišća.
Lěta 1966 měješe Miłoraz hišće 545 wobydlerjow. Z wotewrjenjom Wochožanskeje brunicoweje jamy bu najprjedy Nowoměšćanska štwórć wsy přesydlena, štož potrjechi 21 statokow ze 135 wobydlerjemi. Jich přesydlichu do bydlenjow w Slepom a Běłej Wodźe kaž tež do Trjebina, Krušwicy, Mužakowa a druhdźe. „Woni dóstachu lědma wotrunanje. Runje za staršich potrjechenych bě to ćežki čas“, dopominaše so wčera 74lětny Hans-Peter Krause. Tehdy běštej so tež sportnišćo a bywše knježe kubło zhubiłoj.
Wo zetkanju kultowych awtow w holi
Jězdźidła najwšelakorišeho razu móža ludźi na wosebite wašnje zwjazować. To bě kónc tydźenja w Komorowje pytnyć. Tam zetkachu so znowa wobsedźerjo awtow typa VW Käfer.
Komorow (HN/SN). Swoje 30lětne wobstaće swjećeše kónc tydźenja Budyski Käferowy klub na swjedźenišću při bywšej šuli w Komorowje pola Klukša. Po wšěm zdaću je to najstarše towarstwo tohole razu we wuchodnej Němskej. Něhdźe 300 awtow typa VW Käfer z Němskeje, Čěskeje a Pólskeje bě na jubilej do hole přijěło. Z 800 kilometrami najdlěši puć měještaj mandźelskaj z Mazurow.
Sobuzałožer a wjelelětny předsyda towarstwa kaž tež kóždolětnych zetkanjow je dźensa 72lětny Ehrenfried Toppe, kiž měješe wjele lět w Delnjej Hórce zamkarnju za VW Käfery. Wón so hišće derje dopomina, zo běchu na prěnich zetkanjach za čas NDR stajnje někotři wuskušowarjo stasi pódla. Po 25 lětach je Ehrenfried Toppe nawodnistwo do młódšich rukow přepodał. Andrea Jurk, Katrin Toppe-Servos a Katrin Linke maja mjeztym ze swojimi mnohimi pomocnikami wšitke nitki kruće w horšći.
Krasnu lětnju nóc dožiwichu sobotu wopytowarjo Njeswačanskeho ...
Krótkopowěsće (02.09.16)
Łódź polěpša kwalitu wody
Zły Komorow. Po jednym lěće twarskeho časa je saněrowanska łódź Łužiskeje a srjedźoněmskeje towaršnosće hórnistwoweho zarjadnistwa dźensa dźěłać započała. Prěnja stacija je Parcowski jězor na saksko-braniborskej mjezy. Nowowuwita łódź ma kwalitu wody w nowonastatych jězorach wokoło Złeho Komorowa polěpšić. Pozdźišo planuja ju na dalšich wodźiznach łužiskeje jězoriny zasadźić.
Maja 195 wučomnikow
Hamor. 195 młodostnych započina tele dny swoje wukubłanje w koncernje Vattenfall. Wosmjo z nich rozsudźichu so za dualny studij, kaž předewzaće wčera zdźěli. Zo bychu so wučomnicy a wukubłarjo lěpje zeznali, přewjeduja nětko přihotowanski tydźeń.
FDP ma noweho předsydu
Policija (02.09.16)
Mortwu namakali
Wojerecy. 25lětnu wobydlerku Wojerowskeho domu za požadarjow azyla su zawčerawšim mortwu w jeje stwě namakali. Dokelž njeje přičina jeje smjerće znata, su ćěło obdukowali. Pokiwy na złóstnistwo policija tuchwilu nima. Hdźe su mandźelski zemrěteje a jeje štyri dźěći, njeje znate. Kaž policija zdźěli, pak njeje 32lětny mandźelski podhladny. Tukanja, zo je něchtó žonu morił, su po dotalnych dopóznaćach wopačne. Kriminalna policija pad přepytuje.
Pod Mnišoncom koncertowali
Něhdźe 80 wopytowarjow nóžkowaše tydźenja po sewjernej skłoninje Małeho Pichowa hač k najwyšemu statokej Čornych Noslic na koncert pod hołym njebjom. Tradiciju, kotraž nasta na iniciatiwu skupiny seniorow, haja tam hižo 24 lět. Koncert wotměwa so zdźěla na dworje Juršec swójby kaž tež na pólnym pućiku, wjeducym na Mnišonc.
Wuhotowarjej koncerta běštej tež lětsa zaso Hornjohórčanske muske spěwne towarstwo a pozawnowy chór ewangelskeje wosady z Budestec. Ćělesy zanošowaštej domizniske pěsnje, narodninske kaž tež znate zabawne title wokalneje skupiny Comedian Harmonists z 1930tych lět. Pozawnisća zawjeselichu připosłuchowarjow z cyrkwinskimi melodijemi. Nawjedowałoj staj cyłkaj Marika Matthes-Hartmannowa, kotraž bydli nětko sto kilometrow zdalena w Rudnych horinach, a Udo Golbs z Budestec. Moderaciju přewza šefowka skupiny seniorow Hildegard Renner. Wopytowarjow posłužowachu žony a holcy z rybičkowymi całtami. Hosćo dźakowachu so za połdrahodźinski koncert z wutrobnym přikleskom a pjenježnymi darami. Helmut Gros
Pěstowarnju ponowja
Nadawki za saněrowanje dźěćaceho dnjoweho přebywanišća rozdawali
Pančicy-Kukow (SN/MWj). Sćěhi wulkeje wody po sylnych zliwkach w meji a juniju tohole lěta su čłonow gmejnskeje rady Pančicy-Kukow na jich wčerawšim posedźenju na wjacore wašnje zaběrali. Po tym zo bu Wotrowska pěstowarnja dwójce wot wody a błóta zapławjena, steješe chutnje na hračkach, hač móža ju dale wjesć. Tale starosć je mjeztym z blida.
