Krótkopowěsće (04.07.16)
Nigel Farage wotstupił
London. Předsyda prawicarskopopulistiskeje britiskeje strony Ukip Nigel Farage je dospołnje njewočakowano wotstupił. „Chcu swoje žiwjenje wróćo měć“, rjekny wojowar za wustup kraja z EU dźensa w Londonje. Farage bě sobu najwuznamniši zastupnik přećiwnikow EU do referenduma 23. junija. Swoju stronu chcył přiwšěm dale podpěrać.
Myto Bachmann spožčene
Celovec. Spisowaćelka Sharon Dodua Otoo je dobyćerka mjeztym 40. myta Ingeborg Bachmann. W Berlinje rodźena Wulkobritančanka z ghanaskimi korjenjemi dósta myto wčera w awstriskim Celovecu (Klagenfurt) za swój satiriski tekst wo wšědnym žiwjenju w Němskej. 25 000 eurow hódne myto je sobu najwuznamniše literarne počesćenje po wšěm němskorěčnym rumje.
Chcedźa litium wudobywać
Policija (04.07.16)
Prawicarske parole bjakali
Budyšin. Po koparskim public viewingu je sobotu wječor na Budyskich Žitnych wikach k rozestajenju mjez Budyšanom a požadarjom azyla dóšło. Něhdźe 50 ludźi je na naměsće dobyće němskeho mustwa swjećiło. Při tym dóstaštaj so 20lětny Lybičan a 43lětny Budyšan do włosow, při čimž młódši na staršeho popjerjowy spray pryskaše a z předešćinikom do njeho biješe. Što bě dokładna přičina rozestajenja, policija hišće přepytuje. Zastojnicy zapisachu sej personalije wobdźěleneju a pósłachu ludźi domoj. 20lětneho požadarja azyla dowjezechu do jeho kwartěra. Bórze na to informowaše swědk policiju, zo na Bohatej skupina něhdźe dźesać ludźi před jednym domom prawicarske parole bjaka. Po wšěm zdaću spytachu so mužojo do domu zadobyć, w kotrymž 24lětny Syričan bydli. Tón bě do toho na rozestajenju na Žitnych wikach wobdźěleny a bě 20lětneho Lybičana přewodźał. Policisća znowa přijědźechu a tež tule skupinu rozpušćichu. Přećiwo 15lětnemu młodostnemu přepytuja nětko wobškodźenja wěcow dla. Do padu zapřijaty decernat za statny škit pyta nětko za swědkami.
Jedyn wjeršk honi druhi
Towarstwo tež w lěću aktiwne – lětsa z trochu mjeńšim swjedźenjom
Nowa Wjeska (BW/SN). Z wobhladanjom hry europskich koparskich mišterstwow Francoskeje přećiwo Islandskej je so wčera 41. Nowowješćanski wjesny swjedźeń skónčił. Wot pjatka běchu sej při towarstwowym domje na kromje wsy organizowali volleyballowy turněr, wječorne reje, dźěćacu zabawu, rańše piwko a wčera popołdnju pisany program. W nim dožiwi něhdźe 300 wopytowarjow serbskeho dudlowarja Bena Nowaka z Róžanta, aerobikowu skupinu třoch holcow, skeč młodych žonow a nic naposledk tradicionalne sadźenje, při kotrymž běchu tónraz młodostni na rjedźe. W tymle programowym dypku mějachu woni sceny z kinowych filmow napodobnić a při tym tohorunja jězdźidła sobu zasadźeć. Tak bě za kóždu starobu skupinu něšto zajimawe pódla, štož je kóžde lěto znowa wužadanje, rjekny předsyda towarstwa Wjesna zhromadnosć Křesćan Korjeńk. Wšako spytaja wjesnjenjo sami žortny a wotměnjawy program na nohi stajić, byrnjež lětsa w tróšku mjeńšej formje było, dokelž su mnozy hižo w dowolu.
Nimale 30 młodostnych je so lětsa z fararjom Tomaszom Dawidowskim po ...
Pod hołym njebjom rejwać
Nowy slěd zarjadowanjow je so wčera w Małym Wjelkowje zahajił. Tam móžeš nětko stajnje njedźelu popołdnju wot 14 do 19 hodź. na zahrodźe tamnišeje sotrownje rejwać a k tomu čaj a kofej pić.
Mały Wjelkow (CS/SN). Po dobrym wothłosu lońšeje lětnjeje kofejownje na zahrodźe Małowjelkowskeje sotrownje je sej wobydler Mike Salomon za lětsa nowosć wumyslił. W zajimawej atmosferje runje tak dźiwjeje kaž romantiskeje zahrody móžeš sej přichodne njedźele kofej, čaj tykanc słodźeć dać a k tomu rejwać. Za to je Salomon ekstra rejwanske jewišćo natwarił. Te wšak wužiwaštej po wčerawšim dešćiku najprjedy raz dwaj porikaj sotrow z Drježdźan. Jich starši běchu do Małeho Wjelkowa přijěli, dokelž přisłušeja Drježdźanskej tango-scenje. Z interneta běchu zhonili, zo tu DJ tež tango-hudźbu hraje.
Krótkopowěsće (01.07.16)
Najstarša hornjoserbska fraza
Budyšin. Při slědźenjach w Budyskim tachantskim archiwje wotkry historikarka dr. Madlena Malinkec najstaršu dotal znatu a wěsće datowanu hornjoserbsku frazu z lěta 1534. Fraza je wobstatk chronikaliskeho zapisa w „Annales Budissinenses“. Wopisuja so ponowjenske dźěła při wěži Pětrskeje cyrkwje. Přitomni serbscy burja přiwołachu mištrej, kiž dyrbješe na wěžu zalěsć, warnowace abo wobdźiwace „Helle lube helle, ho o o“ (Hlej, luby, hlej, ho ho ho).
Dźěl sydlišća zaso přistupny
Łaz. Ponowjejo Hórnikečanski jězor su dalšu kročel wotzamknyli. Kaž Sakski wyši hórniski zarjad zdźěli, je wot dźensnišeho dźěl sydlišća bungalowow při jězoru zjawnosći zaso přistupny. Jězor sam a tamne dźěle pobrjoha pak wostanu dale zawrjene. Dźěła při jězoru traja hač do lěta 2022. Jězor je wot 2014 zawrjeny.
Wólby prezidenta wospjetować
Policija (01.07.16)
Buggyje a kwad pokradnyli
Mułkecy. Z terena firmy w Mułkecach su njeznaći w nocy na srjedu pjeć buggyjow a kwad pokradnyli. Bě to druhi tajki pad w běhu třoch tydźenjow w samsnej firmje. Paduši mějachu sej při tym chětro lochko. Přezpólne jězdźidła stejachu w jednorych garažach, do kotrychž so skućićeljo zadobychu. Wottam dowjezechu je do bliskeho lěska, hdźež je na nakładne awto, transporter abo připowěšak stajichu a wottransportowachu. Policajski pos móžeše hač tam slědy čuchać. Hódnotu pokradnjenych jězdźidłow trochuja na 100 000 eurow. Po wuhódnoćenju wobstejnosćow a slědow policija z toho wuchadźa, zo běchu wjacori skućićeljo „při dźěle“. Woni běchu derje organizowani a běchu objekt do toho wu- skušowali. Wočiwidnje je tónle pad runje tak wotběžał kaž prěni 10. junija. Tehdy běchu paduši na samsne wašnje wosom kwadow pokradnyli a 70 000 eurow škody načinili. W jednym z přichodnych wusyłanjow „Kripo live“ telewizija MDR wo tym tohorunja rozprawja.
Wokołopuć hač do kónca lěta
Pytaja wučerja za kurs
Budyšin. Rěčny centrum WITAJ (RCW) poskića wobstajnje wosebite rěčne kursy k nawuknjenju serbšćiny, kotrež su myslene za staršich tych dźěći, kotrež serbšćinu wuknu, a za dalšich zajimowanych dorosćenych. Nětko pytaja zajimcow, kiž chcyli tajki zakładny kurs wot septembra w Budyšinje nawjedować. Štóž ma lóšt a sej to přicpěwa, njech zazwoni na Michaelu Hrjehorjowu w RCW pod telefonowym čisłom 03591/ 550 414 abo napisa jej mejlku pod adresu . Wona na wšitke prašenja rady wotmołwja.
Swjeća při jězoru
Halštrowska Hola. Jako kulturne wulkozarjadowanje městow Złeho Komorowa a Wojerec kaž tež gmejny Halštrowska Hola wotměje so jutře, sobotu, při Parcowskim jězoru festiwal New Sealand. Wot soboty w 11 hodź. hač do njedźele ranja w třoch chce tam dwanaće DJjow najwšelakorišu elektronisku pophudźbu hrać a wopytowarjam, kotrychž wočakuja samo z Lipska a Drježdźan, porjadnje zapyrić.
Listowe znamki měnjeć
Z dudlawu sej són spjelnił
Zaklinči-li přichodny čas na wjesnym, swójbnym abo druhim swjedźenju dudlawa z „Dobry wječor, maćerka“, Hančička wowčerjowa“, „Lubka lilija“ abo hinašej serbskej pěsnju, móže to jenož z hudźbneho nastroja Bena Nowaka z Róžanta być. 65lětny smě so nětko prěni a jenički serbski dudlowar mjenować. Na chětro njewšědne wašnje je sej wón žiwjenski són spjelnił, kotryž bě 1998 na Dnju Saksow we Wojerecach zrodźił. Tam zetka Róžeńčan dweju dudlowarjow, a wot toho wokomika jeho myslička přewodźeše, sam tajki instrument wobsedźeć.
Zwoprawdźił pak je ideju hakle pozdźišo, dokelž je sej takrjec sam wjacore wuměnjenja stajił. Jónu měješe to wulka překwapjenka być, wo kotrejž ani mandźelskej ani nikomu druhemu ničo přeradźił njeje. Na tamnym boku chcyše swój nowy hobby tež porjadnje wukonjeć. Tohodla njerozsudźi so za trjebanu, ale za nowu dudlawu, kotruž sej w Berlinje kupi. Z tamnišeho zawoda tajke do wjace hač 40 krajow předawaja. Potajnstwo wobchować wšak druhdy cyle lochko njebě, hdyž dyrbješe na přikład awto raz do porjedźernje a w kófrowym rumje bě hišće dudlawa nutřka.
