Tójšto zapřahow po puću byli
Spontanje a ludźom k wjeselu serbske pěsnje hudźili
Budyšin/Salow/Hórki/Radwor (CS/SN/BŠe/JaW). Tež lětsa su na swjatym dnju Božeho spěća mužojo po puću byli, ale nic jenož. Na mnohich městnach běchu tež skupinki žonow widźeć a dźeń, kotryž wšak je jako nanowy dźeń znaty, wuwiwa so dale a bóle na dźeń za cyłu swójbu. Tuž bě wčera na dróhach a šćežkach znowa tójšto wobchada. Předewšěm mužojo běchu sej swojeho groćaneho konika zesedłali a zgratowali, ale tež swójby wužiwachu słónčny dźeń za wulěty abo zhromadny piknik. Nadpadnyło wčera tohorunja je, zo běchu mnozy ze zapřahami abo na konjach jěchajo po puću. Škitne naprawy koronawirusa dla su nimale wšudźe w dalokej měrje dodźerželi. Policija wšak je tež zaměrnje kontrolowała a bě ze swojimi zasadźenskimi awtami časćišo tež na serbskich wsach po puću.
Škody skórnika dla přeco hišće jara wulke
Zhorjelc (AK/SN). Skórnik načinja we łužiskich lěsach dale wulku škodu. „Połoženje je chutne a jara kritiske. Aktualne mnóstwo škodowaneho drjewa wučinja ze 317 000 kubiknymi metrami pjećinu wšeho škodowaneho drjewa w Sakskej. Smy w najchutnišim połoženju nastupajo škody w lěsach po 1945/46, a to nic jenož w Sakskej, ale po wšej Němskej“, rjekny Sylvia Knote, nawodnica wokrjesneho lěsnistwoweho zarjada tydźenja w Zhorjelcu. Wosebje ćežko potrjecheny je wobstatk chójnow, šmrěkow a larikow. Jara kritiske je połoženje w Kotmarskej kónčinje, na Limasu a w nišich kónčinach Žitawskich horin.
Najrjeńše wjedro na wčerawšim dnju Božeho spěća wabješe ...
Starši a wokrjes płaća za kubłanje
Ze zahajenjom šulskeho lěta 2020/2021 dyrbja wužiwarjo poskitkow na Budyskej wokrjesnej hudźbnej šuli kaž tež Budyskej wokrjesnej ludowej uniwersiće hłubšo do kapsy přimnyć. Wokrjesny sejm je zańdźenu póndźelu zwyšenje popłatkow wobzamknył.
Budyšin (SN/MiR). Dotalne popłatki zwyša lětsa wo 15 procentow a klětu wospjet wo runje telko. To rěka, zo płaća wužiwarjo poskitkow wot šulskeho lěta 2021/22 hač do 30 procentow wjace hač hišće za šulske lěto 2019/2020. Zwyšenje na dwě lěće rozdźělić bě namjet Swobodnych wolerjow po masiwnej diskusiji w kulturnym a kubłanskim wuběrku Budyskeho wokrjesa. Wšitke frakcije a wjetšina radźićelow su předłoze přihłosowali. Zwyšenje pak njezměja jeničce wužiwarjo njesć. Tež wokrjes chce swoje financielne wobdźělenje zwyšić.
Krótkopowěsće (22.05.20)
Pjeć nowych inficěrowanych
Budyšin. Budyski wokrjes je korona-hotspot w Sakskej. Ličba natyknjenych zwyši so wčera wo pjeć na 480. Z nich je 114 schorjenych. Z dalšim smjertnym padom je nětko dohromady 17 mortwych korony dla. Aktualnje je strowotniski zarjad 310 karantenow postajił. W Zhorjelskim wokrjesu je dale 268 wobkrućenych koronapadow, nowe tež wčera žane njeběchu, 22 ludźi dotal zemrě.
Za dalšu wuměnu so wuprajił
Budyšin. Budyski krajny rada Michael Harig (CDU) referowaše wčera na mjezynarodnej wědomostnej konferency „Sacharowe čitanja 2020: ekologiske problemy 21. lětstotka“ mjez druhim wo tudyšich naprawach korony dla a wo kóncu wudobywanja brunicy a sćěhach toho za łužiski rewěr. Konferencu online wuhotowała je Běłoruska statna uniwersita. Zdobom wupraji so Harig za dalšu hospodarsku a kulturnu wuměnu Němskeje z wuchodoeuropskimi statami.
Melodija zwonohry změnjena
Dosć wulke inwesticije trěbne
Mnozy angažuja so za to, zo by dźesaćlětna holca móhła chodźić na šulu, kotruž je sej wona wupytała
Kotre prašenja steja w srjedźišću, dźe-li wo to, zmóžnić šulerce pod njewšědnymi wuměnjenjemi na jednej wyšej šuli wuknyć? Je to woprawdźe prašenje wutroby abo rozuma? Před nim steji Bulankec swójba z Prawoćic. Dźěsći Isabelle a Tobiasa Bulanka, Měrka a Florian, dyrbitej so wobě před słónčnymi pruhami na kedźbu brać, dokelž matej genetiski defekt xeroderma pigmentosum. Jeju koža reaguje wo 2 000 króć sylnišo na UV-pruhi hač ta nimale kóždeho druheho čłowjeka. Tuž dyrbitaj so wšědnje a wšudźe wosebje škitać, tak tež w pěstowarni a šuli. Hdyž to nječinitaj, hrozy jimaj schorjenje na raka. „Měrka běše runje lětko stara, jako bě jednoho dnja po hrajkanju ze słónca chětro spalena. Lěkarku, kotruž wo pomoc prošachmoj, přepokaza ju hnydom specialistej, a tón je tule rědku chorosć pola njeje zwěsćił.“ Takle rysuje Tobias Bulank situaciju, kotraž nětko wšědny žiwjenski rytmus swójby postaja.
Spěchowanje za koncept
Kulow (AK/SN). Sobudźěłaćerjo města Kulowa maja w přichodnych lětach směrodajny a dołhodobny wuwićowy koncept komuny zdźěłać. To podšmórny měšćanosta Markus Posch (CDU) na minjenym wuradźowanju měšćanskeje rady. „Rozsudźacy gremij Leaderoweho regiona Hornjołužiska hola a haty (OHTL) je nam start signalizował. Smy přihłosowanje z Budyskeho krajnoradneho zarjada kaž tež přizwolenje wokrjesa dóstali. Za Kulow ma nětko tak mjenowany integrowany měšćanskotwarski wuwićowy koncept (INSEK) nastać.“ Za njón dóstanje město spěchowanje. Wopřijeć ma koncept mjez druhim wuprajenja wo turizmje, drobnowikowanju w měsće, wo kulturje a sporće. „Derje by było, nastajimy-li sej směrodajny program. Wobydlerjow dyrbjeli do procesa zapřijeć. Jich mysle a předstawy su prašane“, wuswětli měšćanosta.
Prazwěrjenc zaso wotewrjeny
Mały Wjelkow (SN/JaW). Dypkownje k jutřišemu swjatemu dnjej je Małowjelkowski prazwěrjenc nětko zaso wotewrjeny. Wo tym informuje Budyska wobdźělenska a wobhospodarjenska towaršnosć (BBB) w nowinskej zdźělence.
Koronawirus swjaty dźeń njeznaje
Budyšin (SN/JaW). Hdyž podadźa so jutře znowa mužojo z kolesami na swoje kóždolětne jězby na dźeń muži, njebudźe wšak to kaž minjene lěta. Tež w tejle starodawnej tradiciji ma lětsa mjenujcy koronawirus słowčko sobu rěčeć. Tohodla dyrbja mužojo a tež wšitcy dalši wulětnicy tójšto škitnych naprawow a prawidłow dodźeržeć.
Derje wšak je, zo maja hosćency a korčmy wot 15. meje zaso wočinjene. Tam pak płaća razne naprawy a hygieniske předpisy, kotrež zarjady a policija tež dokładnje pruwuja. Přiwšěm pak změja mnohe z nich jutře na Božim spěću wotewrjene a poskićeja pućowacym wotpočink a wočerstwjenje. Mjez druhim změja Dinarjecy w Nowoslicach swoju piwowu zahrodu wot 11 hodź. wočinjenu. Runje tak budu tež w Šunowskej Fabrikskej hospodźe wonka wočerstwjenje porjedźić, wězo z trěbnym předpisanym wotstawkom.
Policija (20.05.20)
Předjězbu njewobkedźbowała
Nowa Łuka/Hory. Při njezbožu na křižowanišću mjez Nowej Łuku a Horami pola Wojerec su so póndźelu tři wosoby ćežko zranili. 64lětna wodźerka VW Golfa njeje předjězbu Peugeota wobkedźbowała a zrazy do njeho. Wona bě awto přewidźała, kaž policija zdźěli. Při zražce so 56lětna šoferka Peugeota, jeje 84lětna sobujěduca kaž tež šoferka Golfa zranichu. Škodu trochuje policija na něhdźe 20 000 eurow. Přichodny tydźeń započnu křižowanišćo na kružny wobchad přetwarić.
