Dźakne kemše njebudu
Přirodoškit sylnišo spěchować
W Dubjanskim lěsu tuchwilu štomy pušćeja
Połpica (SN/JaW). Na arealu wotnožki Němskeje zwjazkoweje załožby wobswět (DBU) přirodne herbstwo w Dubjanskim lěsu pola Połpicy (Halbendorf/Spree) tuchwilu z ćežkej techniku dźěłaja. Kaž DBU, kotraž je wobsedźerka Dubjanskeho lěsa a k tomu słušaceho bywšeho wojerskeho zwučowanišća, w nowinskej zdźělence informuje, „pušćeja lěsni dźěłaćerjo suche chójny a šmrěki podłu wokrjesneju dróhu mjez Połpicu a Lemišowom (Lömischau) a z Połpicy do směra na Lichań (Spreewiese) kaž tež do směra na Nowu Wjes (Neudorf)“. Zdobom zamołwići připowědźeja, zo dochadźa na tychle wotrězkach k poćežowanjam wobchada, dokelž dyrbja tam dróhu wěstotnych přičin dla dźělnje zawrěć. Na to měli so wobydlerjo kaž tež šoferojo nastajić.
Prěni stresowy test wobstali
Zhorjelski krajny rada Bernd Lange widźi wuspěchi w koronapandemiji
Zhorjelc (AK/SN). W Zhorjelskim wokrjesu su prěnje wuspěchi w boju přećiwo koronapandemiji widźomne. „To je woprawdźite pruwowanje. Smy pak tónle stresowy test wobstali“, rjekny krajny rada Bernd Lange (CDU) spočatk tydźenja nowinarjam. Hač do njedźele mějachu we wokrjesu 266 wobkrućenych padow korony, z nich je 93 schorjenych, třoch lěkuja w chorowni. 165 potrjechenych je w karantenje, 153 je wustrowjenych. Dwacećo su na koronawirus zemrěli.
„Prěni pad zwěsćichu 10. měrca pola muža, kiž bě so z dowola w Južnym Tirolu nawróćił. Kónc měrca so pady kopjachu. Na to dóńdźe k infekcijam w hladarnjach, fyzioterapijach a w gymnaziju“, rozłoži Annegret Schynol, nawodnica strowotniskeho zarjada a hamtska lěkarka wuwiće minjenych tydźenjow. „Smjertne pady jewjachu so předewšěm mjez wosobami, staršimi hač 60 lět – stajnje w zwisku z ćežkimi předschorjenjemi.“ Potrjecheni su pak tež sobudźěłaćerjo hladarnjow w starobje 35 do 59 lět.
Wosebity dypk za měšćanske dźěle
Wojerecy (AK/SN). Wjesnym předstejićelam Brětnje/Michałkow, Němcow, Hórnikec, Čorneho Chołmca a Ćiska přisteji we wobłuku posedźenjow Wojerowskeje měšćanskeje rady wotnětka prawidłowna hodźina za naprašowanja. Wotpowědne wudospołnjenje dnjowych dypkow je rada wčera z wjetšinu hłosow frakcijow CDU, Lěwicy, Aktiwne Wojerecy/Zeleni a SPD wobzamknyła. Jědnaće radźićelow AfD a Swobodnych wolerjow/Přichod města namjet wotpokaza, Dirk Nasdala (Swobodni wolerjo) so hłosa wzda.
„Zhromadne dźěło mjez městom a jeho dźělemi docpěje nowy schodźenk. Wobydlerjo měšćanskich dźělow dožiwja, zo rada jich naležnosće na wědomje a chutnje bjerje. To móže wuraz hišće lěpšeho wobydlerskeho wobdźělenja być“, we wobkrućenju schwaleneho namjeta rěka.
Sebastian Dömmel (AfD) kritizowaše: „Nažel njeběchmy do zdźěłanja namjeta zapřijeći. To zbudźa zaćišć, zo njeńdźe wo wjesnych předstejićelow, ale skerje wo to nam škodźeć. Mamy namjet za ryzy politisku bitwičku. Wjesni předstejićeljo móhli bjeze wšeho regularnu hodźinu naprašowanjow wužiwać, za to wosebity dnjowy dypk trěbny njeje.“
Krótkopowěsće (06.05.20)
Snadny přirost infekcijow
Budyšin/Zhorjelc. Ličba z koronawirusom natyknjenych w Budyskim wokrjesu je na 361 (+3) přiběrała. Z nich je 85 schorjenych, štyrjoch lěkuja w chorowni. 263 (+2) ludźi je so wustrowiło. Tuchwilu je 163 wosobow w karantenje. W Zhorjelskim wokrjesu je z dalšej wosobu dohromady 267 inficěrowanych. Z 85 schorjenych přebywa wosom w klinice. Dohromady 162 natyknjenych je tam mjeztym zaso strowych.
Festiwal dudakow wupadnje
Strakonice. Woblubowany Mjezynarodny festiwal dudakow w južnočěskich Strakonicach koronapandemije dla lětsa njebudźe. Wo wotprajenju za kónc awgusta planowaneho podawka je tamniša radnica informowała. Nastupajo termin přichodneho festiwala njejsu zamołwići dotal ničo zdźělili, najskerje pak festiwal hakle za dwě lěće wotměja.
Zaso prědku do busa zastupić
Kamjenski policajski rewěr z nowym nawodu
Kamjenc (SN/JaW). Wot pjatka, 1. meje, skutkuje policajski wyši rada Michael Kummer jako nawoda Kamjenskeho policajskeho rewěra. To zdźěli wčera nowinski rěčnik Zhorjelskeje policajskeje direkcije Kai Siebenäuger. Kummer naslěduje dotalnu nawodnicu Susann Benad-Uslaub. Wona je do Krajneho kriminalneho zarjada Sakska wotešła a nawjeduje tam wotnětka decernat we wobłuku za wuhódnoćenje statneho škita a policajskeho wotwobaranskeho centruma přećiwo terorizmej a ekstremizmej. Michael Kummer přewozmje zamołwitosć za cyłkownje 142 zastojnikow a zastojničow a dalšich přistajenych rewěra. Zhromadnje z nimi chce so 41lětny přichodnje w Lessingowym měsće a wokolinje wo wěstotu a porjad starać.
W parku móžeš so nětko posydnyć
Policija (05.05.20)
Wopity z awtom do štoma zrazył
Dobrošecy. Wěcna škoda 11 000 eurow, dospołnje skóncowany VW Polo a ćežko zranjeny šofer. To je wuslědk njezboža minjenu sobotu w Dobrošecach (Doberschütz) w Malešanskej gmejnje. 23lětny je tam pod wliwom alkohola ze swojim Polom po puću był, w křiwicy z dróhi zajěł a do štoma zrazył. Zražka běše po wšěm zdaću tak wulka, zo zleća VW wróćo na dróhu a motorowy blok so z jězdźidła pušći. Ćežko zranjeneho šofera dowjezechu do chorownje. Prěni test policije wunjese 1,44 promilow alkohola w kreji.
Zapósłancy wuradźuja
Ćežke časy kiwaja
26. Šćeńčanski ludowy swjedźeń korony dla lětsa wotprajeny
Šćeńca (AK/SN). Za čas koronapandemije dyrbja woblubowane swjedźenje, festiwale a kulturne dny wupadnyć. To płaći tež za znaty Šćeńčanski swjatkowny swjedźeń.
Hižo srjedź apryla su zarjadowarjo swjatk wotprajili. „Smy so hižo zahe z naležnosću zaběrać započeli. Skónčnje nam ničo druhe njezby, hač wotprajić“, wobžaruje předsyda ludowy swjedźeń wuhotowaceho towarstwa Šćeńčanskeje młodźiny a zdobom Łazowski gmejnski radźićel Steffen Münster. Ze stron zarjadow njebě wotwidźeć, zo dowolnosć za swjedźeń njedóstanu. „To a strach masiwnych stratow dla je nas nuzowało, swjedźeń njepřewjesć a towarstwo před wjetšej škodu zachować“, Šćeńčan rozłožuje. Njewěstosće, što koronawirusa dla budźe, njebě tež móžno za swjatk wabić.
