London (dpa/SN). Strona Labour je wčerawše wólby parlamenta we Wulkej Britaniskej z hoberskim předskokom dobyła. Wona změje po prognozy BBC 410 ze 650 zapósłancow a frakcija konserwatiwnych Torryjow pomjeńši so na 144 čłonow. W Londonje rěkaše, zo kral Charles III. stronskemu šefej Keirej Starmerej připołdnju nadawk da nowe knježerstwo wutworić. Dotalny premjer Sunak je wólbnemu dobyćerjej rano gratulował.

Starmer je po wólbnym dobyću strony Labour nowostart za kraj přilubił. Wužadanjow ma dosć: statne strowotnistwo NHS přewšo chromi, je přemało bydlenjow, marodne jastwa su přepjelnjene, brexit přewinjeny njeje, fachowcy wšudźe faluja, dowěra do politiki je skažena.

Berlin (dpa/SN). Koalicija ample je so na přełamk za zwjazkowy etat 2025 a paket rozrosta dojednała, to je powěsćernja dpa z kruhow koalicije zhoniła. Jednanja kanclera Olafa Scholza (SPD), financneho ministra Christiana Lindnera (FDP) a hospodarskeho ministra Roberta Habecka (Zeleni) trajachu hač do rańšich hodźin.

Dojednanje ke klětušemu zwjazkowemu etatej a financnemu planej hač do lěta 2028 ma za wuměnjenje, zo wobmjezowanje dołha dodźerža. Nuzowe połoženje zwěsćili njejsu, piše dpa.

Paket rozrosta móhł klětu přidatny plus poł procenta wuskutkować, to je 26 miliardow eurow hospodarskeho wukona. Planowane su pospěšene wotpisanja inwesticijow a polěpšena přiražka za slědźenje. Nimo toho chcedźa impulsy za wjace přistajenjow dawać.

Zdobom je so koalicija na zwyšenje dźěćaceho pjenjeza wo pjeć na měsačnje 255 eurow dojednała. Wo samsnu sumu chcedźa hnydomnu přiražku za dźěći swójbow z wobydlerskimi pjenjezami zwyšić. Swobodna suma za dźěći ma so lětsa hišće wo 228 na 9 540 eurow zwyšić, wuchadźa z podłožkow knježerstwa.

Ze změnu jednanskeho porjada sejma wjac wobdźělenja narodnych mjeńšin

Berlin (SN/at). Zajimy narodnych mjeńšin chce parlament Němskeje w přichodźe bóle do swojeho skutkowanja zapřijeć. To wuchadźa z naćiska za reformu jednanskeho porjada zwjazkoweho sejma, kotryž su amplowe frakcije SPD, Zwjazk 90/Zeleni a FDP zapodali. Zapósłancy zaběrachu so předwčerawšim w plenumje z ćišćenku 20/12088, kotruž po debaće do wuběrkow přepokazachu.

Zapósłanc SSW Stefan Seidler skedźbni na „wobkedźbowanje zapósłancow narodnych mjeńšin, štož je so w debaće wospjet wuzběhnyło“. Naćisk koalicionarow ample předwidźi, w paragrafach 61, 69 a 88 jednanskeho porjada móžnosće wobdźělenja za zapósłancow stron narodnych mjeńšin rozšěrjeć. Seidler sam, kotryž swój mandat za stronu danskeje a friziskeje mjeńšiny wukonja, rěči wo „historiskim kroku w stawiznach němskeho parlamenta“ a wo „wažnym wuznaću k našej pluralnej demokratiji“. Lětdźesatki dołho je so praksa w zwjazkowym sejmje bjez reprezentacije mjeńšin wuwiwała.

Što móže jenički zapósłanc mjeńšinoweje strony w zwjazkowym sejmje žno wukonjeć? To běše prašenje, jako je Stefan Seidler za Južnoschleswigski wolerski zwjazk (SSW) 2021 do parlamenta Němskeje zaćahnył. Na přikład je hibićiwy politikar ­sobuiniciator před dwěmaj lětomaj wu­tworjeneho sejmoweho kruha „mjeńšiny“. Pozicije Danow, Frizow, Serbow a Sintow a Romow dyrbja w zwjazkowym sejmje lěpje słyšeć być, je jedyn z narokow frakcije přesahowaceho gremija. Prawdźepodobnje su nastorki, kotrež su tam sobuskutkowace zapósłanče a zapósłancy SPD, FDP a Zelenych do swojich frakcijow sobu wzali, w nich na płódnu pódu padnyli. Parlamentownikam narodnych mjeńšin so wotewrjeć, jim šansu dawać, zo bychu swoje specifiske zajimy w sejmje lěpje tematizowali, to wučitaš z namjeta frakcijow ample za reformu jednanskeho porjada zwjazkoweho sejma. Krok je prawy a wažny. Nawala padow pak so nichtó bojeć njetrjeba. SSW je jenička strona narodneje mjeńšiny z mandatom. Axel Arlt