Žohnowanje sej wuprosył
Sakski krajny sejm ministrow noweho krajneho knježerstwa spřisahał
Drježdźany (dpa/SN). Po znowawuzwolenju ministerskeho prezidenta Michaela Kretschmera (CDU) su dźensa dopołdnja čłonow noweho knježerstwa w krajnym sejmje spřisahali. Do toho bě Kretschmer nowym ministram w statnej kencliji wopismo powołanja přepodał. Bjezposrědnje po tym zeńdźe so nowy kabinet na prěnje posedźenje. Medije běchu spekulowali, kajke zasadne personalne změny Kretschmer přesadźi. Zwoprědka bě jasne, zo dotalny hospodarski minister Martin Dulig (SPD) zastojnstwo přisadźi.
Po spřisahanju knježerstwa je krajny sejm ze swojim dźěłom pokročował. W aktualnej hodźinje wobjednawachu zaručenje socialnych poskitkow za dźěći a młodostnych, namóc přećiwo žonam kaž tež zapłaćomne podruže. Po tym zasadźichu na próstwu mjeńšinoweje koalicije CDU a SPD enquetowu komisiju za předźěłanje koronapandemije. Přepytowanski wuběrk za tutu temu bě krajny sejm hižo zasadźił.
Serbska rada Sakskeje wolena
Ruska cofa ze Syriskeje
Damaskus (dpa/SN). Ruska je po powalenju swojeho zwjazkarja Bashara al-Assada swój powětrowy škit ze wšelakich dźělow Syriskeje cofnyła. Tež tankowe jednotki su swoje zepěranišća wopušćili. Pječa pohibuja so ruske jednotki do směra na Libysku. Tam knježi po powalenju mócnarja Muammara al-Gaddafija w oktobru 2011 chaos a wobydlerska wójna. Zapadne kraje wobkedźbuja minjeny čas dokładnje, kak Ruska na nowe poměry w Syriskej reaguje.
Trump žada sej blokadu
Washington (dpa/SN). Přichodny prezident USA Donald Trump zadźěwa krótko do postajeneho termina schwalenju přechodneho etata. Tak hrozy dospołna blokada dźěła knježerstwa. Trump namołwja wšěch republikanskich zapósłancow, z demokratami hižo dojednany etat wotpokazać. Elon Musk, kotryž změje w knježerstwje Trumpa wažnu funkciju, republikanow tohorunja k tomu namołwja. By-li showdown wudyrił, móhł Trump prezidentej Bidenej winu připisać.
20 lět jastwa za wumocowarja
Iniciatiwa swoje mjeno změni
Lóšt kupować dale słaby
Ukrainu na nowe časy přihotować
Brüssel (dpa/SN). Wodźacy zastupnicy čłonskich krajow NATO su so měsac do spřisahanja Donalda Trumpa za noweho prezidenta USA na dowěrliwe rozmołwy wo komplikowanym połoženju w Ukrainje a dalšej podpěrje zešli. Na wot generalneho sekretara NATO Marka Rutteho organizowanym zetkanju w Brüsselu wobdźělichu so wčera wječor tež zwjazkowy kancler Olaf Scholz (SPD) kaž tež statni a knježerstwowi šefojo Pólskeje, Italskej, Danskeje a Nižozemskeje. Nimo toho běchu ukrainski prezident Wolodymyr Zelenskyj, prezidentka komisije EU Ursula von der Leyen a prezident Rady EU António Costa přitomni. Francoski prezident Emmanuel Macron a britiski premier Keir Starmer njejstaj přijěłoj.
Pozadk zetkanja bě wobćežne wojerske połoženje ukrainskeho wójska na wuchodźe kraja a strach, zo móhł nowy prezident USA Ukrainu a Rusku k měrowym jednanjam nuzować. W Kijewje so boja, zo Trump Ukrainje hrozy a wojersku pomoc přetorhnje, jeli so kraj měrowym jednanjam spjećuje.
Serbske zrowastanjenje
Truty přećiwo paducham
Choćebuz (dpa/SN). Energijowy zastaraćel LEAG we Łužicy chce swoje industrijne objekty z pomocu trutow lěpje před paduchami a wandalizmom škitać. Lětace nastroje maja samostatnje na patruljowe lěty nad zawodom startować a móžne strachi spóznać. To zdźěla předewzaće. Stajnje zaso so paduši na ležownosće energijoweho zastaraćela měrja, zo bychu kopor a diesel kradnyli. Přećiwnicy wuhla běchu so minjeny čas husćišo na teren zawoda předrěli a w brunicowych jamach bagry a běžite pasy wobsadźili. Priwatna stražowanska słužba je z tym stajnje zaso přežadana. Dalši problem su njejapke nadběhi demonstrantow, kotřiž sej městnosće swojich akcijow dokładnje dorěča a chětro spěšnje a njewočakowano postupuja.
Truty móža daty na ležownosći zawoda a wokoło njeho spěšnje zběrać, dale sposrědkować a samo alarm zbudźić, LEAG nastupajo nowy projekt zdźěla. Nastroje maja sensory, kamery a analyzowe kompjutery, kotrež dźěłaja z pomocu kumštneje inteligency. Prěnje pospyty z trutami běchu wuspěšne. Truty chcedźa přichodne měsacy husćišo zasadźić.
Historiska wěža ponowjena
To a tamne (19.12.24)
Hodowne žiwidła pokradnyli su paduši we wobchodźe w Drježdźanach. Kaž policija zdźěla, spakosćichu woni mjaso kački, kołbaski k praženju a čerwjene wino. Rubizna je něhdźe 250 eurow hódna. Dokelž njejsu paduši durje chłódźaka zaso začinili, dyrbjachu přistajeni žiwidła w hódnoće 800 eurow preč ćisnyć. Nimo toho wobškodźichu paduši wokno.
Wólby najrjeńšeje žony w Nižozemskej po 35 lětach skónča. Wubědźowanje njehodźi so hižo do noweho časa, su sej organizatorojo wěsći. Město miss-wólbow zarjaduja internetnu platformu wokoło psychiskeje strowoty, socialnych medijow a mnohotnosće. Nastała je myslička, miss-wólby wotstronić, na zjawnej diskusiji wo prašenju, čehodla towaršnosć přeco hišće mjeztym dawno zestarjene ideale wo rjanosći a towaršnostnych wočakowanjach na jednotliwca pěstuje.
