So sam zjebał je wobšudnik w Münsteru, jako nochcyše taksišofera zapłaćić. 19lětny bě so minjenu nóc na wěste městno dowjezć dał. Tam wottorhny durje awta a ćekny. Při tym zaby na swoju móšnju. Šofer namaka w njej wupokaz jebaka a informowaše policiju. Ta je so mjeztym pola 19lětneho přizjewiła.

Homoseksualne amplowe mužiki a lesbiske amplowe žony maja k lětušemu Christopher Street Day 11. julija w Mnichowje ludźom přez puć pomhać. Tole je tamniši wokrjesny wuběrk wčera přećiwo hłosam CDU wobzamknył, kaž rěčnik radnicy zdźěli. Wosebite škleńčane taflički płaća něhdźe 10 000 eurow a su stajnje zaso wužiwajomne. Akcija ma jasny signal přećiwo hidźe na homoseksualnych a za pisanu a wjelestronsku zhromadnosć być. Iniciatiwu za tutón akciju běchu Zeleni w měšćanskej radźe nastorčili.

Pomnik zaso steji

Choćebuz (SN/ch). Zašłu sobotu su so čłonojo Zeleneje ligi wobswětoweje skupiny Choćebuz we Łakomje na dźěłowe zasadźenje zetkali, zo bychu pomnik za wotbagrowane wjeski we Łužicy zaso natwa­rili. Zhromadnje z wobydlerjemi Choćebuza-Rogozna a bywšimi woby­dlerjemi Łakomy su woni dwanaće drjewjanych běłych křižow znowa nastajili. Wot 1994 dopominaja na tymle městnje na zwjazkowej dróze mjez Choćebuzom a Picnjom drjewjane křiže na łužiske wjeski­, kotrež běchu so brunicowych wuhlowych jamow dla zhubili. Dwanaće křižow­ steja symbolisce za cyłkownje 136 dospołnje abo zdźěla zhubjenych wjeskow.

Diskutuja wo reformje

Budyšin (SN/MiR). W Budyšinje přiho­tuja po wutworjenju Hornjołužiskich klinikow kaž tež Powołanskeho šulskeho centruma dalšu wulku inwesticiju. Tu­dyša wotnožka Rothenburgskeje wyšeje policajskeje šule za wu- a dalekubłanje na Budyskej Kantowej hasy ma dóstać wyšu hódnotu. Na tamnišej ležownosći ma nastać nowotwar, treningowy centrum ze zwučowanišćemi za zwěsćenje njezbožow a za wobknježenje połoženja. Nimo toho maja so wobstejace twarjenja wobnowić. Polěpšić maja so tež bydlenske wuměnjenja za šulerjow.