Wot lěta 2008 přewjeduje Spěchowanske towarstwo kulturneho města Zhorjelca (FVKS) zhromadnje z partnerami mjezynarodne fotowe wubědźowanje „Po Puću“ – lětsa sedmy raz, ale prěni raz tež w serbskej rěči.
Zhorjelc (SN/CoR). W swojim sedmym přeběhu wěnuje so fotowe wubědźowanje „Po Puću 2015“ temje „industrija“ w euroregionje Nysa a w južnym euroregionje Sprjewja-Nysa-Bóbr. Motiwy, kaž na přikład z industrijnych stawiznow, industrijnych krajinow, z industrijneje kultury a techniki, su witane.
Wobdźělić móža so fotowi entuziasća wšěch starobow, myta budu spožčene w kategorijach „dorosćeni“, „młodostni“, „fotowa reportaža“ a „lubušk publikuma“, a to w cyłkownym wobjimje 1 500 eurow. Fota maja so do interneta stajić. Hač do 7. septembra móža so zajimcy přizjewić. Wšitke informacije a wobšěrne wuměnjenja za wobdźělenje namakaja na wjacerěčnej internetnej stronje www.fotowewubedzowanje.fvks.eu. Prěni króć njewupisa towarstwo wubědźowanje jenož w němskej, ale tež serbskej a čěskej rěči a nimo toho w pólšćinje a jendźelšćinje.
Dohromady 5 000 ludźi je sej w nachilacej so hrajnej dobje 73 serbskich předstajenjow NSLDź wobhladało, kaž zastupjerka intendanta za serbske dźiwadło Madleńka Šołćic zdźěli.
Budyšin (SN/CoR). Po ličbje najwuspěšnišej běštej inscenaciji klankodźiwadła za serbske dźěći „Mały wódny muž“ z 1 140 wopytowarjemina 23 předstajenjach a jubilejna prapremjera składnostnje 50lětneho wobstaća Serbskeho dźěćaceho dźiwadła při NSLDź „W putach Čorneho pana“. Z 1 020 přihladowarjemi na wosom předstajenjach bě dorostowy kruch z pjera Lubiny Hajduk-Veljkovićoweje dohromady lěpje wopytany hač hłowna serbska inscenacija hrajneje doby „Mój wuměrjeny kraj“. 929 ludźi je kruch Jurja Kocha na šěsć předstajenjach widźało. Nowu inscenaciju Lutza Hillmanna nimale 40 lět stareho klasikarja chcedźa w přichodnej sezonje w němskej rěči pokazać, a to tež na hóstnym předstajenju w Złym Komorowje.
700 aktiwnych ludowych wuměłcow z cyłeho swěta zetka so na XI. mjezynarodnym folklornym festiwalu „Łužica 2015“ – tutu šansu dyrbiš wězo tež wužiwać a sej nazhonjenja wuměnjeć. Tak bě Domowina na kolokwij pod hesłom „Folklora na jewišću – kak awtentiska je dźensa hišće ludowa kultura?“ přeprosyła. Něhdźe 30 zajimcow, zwjetša běchu to zastupjerjo wobdźělenych skupin, zhromadźi so w Chróšćanskej hali „Jednota“, zo bychu zajimcam předstajili, što jich kulturu charakterizuje, što je za jich dźěło wažne a kotre ćeže maja. Předsyda kulturneho wuběrka Jan Bělk moderěrowaše zarjadowanje, kotrež traješe dlěje hač dwě a poł hodźiny – tež to znamjo za to, kak wulka potrjeba je folkloru teoretisce rozumić.
Filmowa chłóšćenka z lěta 1925
Kamjenc a čěski Kolín zhladujetej mjeztym na połsta lět měšćanskeho partnerstwa. Składnostnje jubileja wotewrěchu spočatk měsaca w radnicy Lessingoweho města wustajeńcu „Zwobraznjene refleksije k Lessingej – k aktualiće rozswětlerja“.
Kamjenc (SN). Čłonojo Aliancy noweho wuměłstwa su přehladku přihotowali a wotewrěli, přinošujo tak k złotemu jubilejej stykow mjez łužiskej komunu a kralowskim městom Kolínom.
Štyri dny je 700 sobuskutkowacych z tu- a wukraja, 300 pomocnikow a organizatoriski team k tomu přinošowało, zo so XI. mjezynarodny folklorny festiwal „Łužica 2015“ radźi. Nic jenož hladajo na 20 000 wopytowarjow sćehnjechu organizatorojo přewšo dobru bilancu.
Ćežišćo XI. mjezynarodneho folklorneho festiwala bě imaterielne kulturne herbstwo. Pod režiju Tomasza Nawki předstajichu kulturne ćělesa minjenu sobotu popołdnju na Koklic statoku w Chrósćicach wotpowědny program pod hesłom „Hdźež duša schow swój ma“ .
Chrósćicy (SN/CoR). Ze zwukami čěskich a serbskich dudow zahajištaj Tomasz Nawka a Vojtěch Kouba ze skupiny Lidová muzika z Chrástu wosebite zarjadowanje, skedźbnjejo na to, zo maja dudy w mnohich kulturach swoje krute městno. Mexikanski ansambl Querétaro předstaji na to mariachi-hudźbu, kotraž bu 2011 na UNESCO-lisćinje imaterialneho swětoweho herbstwa přewzata. Typiske za nju je formacija sydom do dwanaće hudźbnikow a zhromadne hraće trompety a trunowych instrumentow – mjez druhim wosebita wulka a mała gitara kaž tež citerje podobny instrument.
Braniborski dźěl lětušeho XI. mjezynarodneho folklorneho festiwala „Łužica“ běchu minjeny pjatk dźěći Witaj-skupiny Hochožanskeje pěstowarnje z Hanamarinej polku na wulkim jewišću za wjesnej cyrkwju zahajili.
Chrósćicy (SN/JaW). „W raju wjesołych dźěći“ bě hesło dźěćaceho popołdnja sobotu na Krawčikec statoku. Nimale 600 ludźi widźeše spodobny program dźěćacych a dorostowych skupin, po kotrymž wjedźeše Weronika Butendeichowa.