Srjedź meje poda so chór 1. serbskeje kulturneje brigady z busom do słowjenskeje stolicy Ljubljany. Start pak dyrbjachmy wo dwě hodźinje přesunyć – bus měješe problem z hydrawliku­. Nalada pak bě přiwšěm dobra a předwjeselo něhdźe 70 młodostnych a zamołwitych na dwanaćehodźinsku jězbu bě tak a tak wulke. Jězba so spěšnje miny, tójšto w busu spěwachmy a něhdźe w 22 hodź. ­dojědźechmy do rjaneho hostela „Celica“. Spěšnje běchu stwy rozdźělene, a padnychmy sprócni do łoža.

Wutoru rano čakaše po snědani hnydom ­prěnja proba na zahrodźe trochu zdaleneje ewangelskeje cyrkwje na nas . Zwučowachmy tam za koncert, ale tež za přichodny wulki projekt brigady – nahrawanje oratorija „Žně“. Po wobjedźe a krótkej přestawce podachmy so z powjaznicu na ­srjedźowěkowski hród ­Ljubljany. Wottam ­mějachmy wulkotny ­wuhlad na město, a pu­ćowachmy zaso dele. Po wje­čeri w rjanej korč­mičce při rěce zetkachmy so nimale wšitcy hišće raz na mosće a tworjachmy serbske koło. Spěwachmy a rejo­wachmy k znatym serbskim štučkam, a tak móžachmy hnydom za swój koncert w katedrali wabić.

Hižo štwórty raz su sej serbscy młodostni pod nawodom Serbskeho młodźinskeho towarstwa Pawk na lětuši Roskilde-festiwal dojěli. To je jedyn z najwjetšich hudźbnych festiwalow w Europje, něhdźe 130 000 ludźi je tam přitomnych. Headliner bě lětsa Kendrick Lamar, tež Eminem, Cardi B a Gorillaz běchu w zašłych lětach live na jewišću. A to samo darmotnje! Přetož Serbja su dźěl wulkeje skupiny 30 000 dobrowólnych, kiž so wo to staraja, zo wo­stanje Roskilde ekologiski a socialny. Tak dźiwaja tam wosebje na škit přirody a wuhotuja festiwal z tójšto socialnymi a zhromadnymi akcijemi. Serbja su hromadźe z danskim mjeńšinowym młodźinskim towarstwom GFU za wobhospodarjenje zastawkoweje stacije zamołwići. Tu přiwzaja bleše, tyzy

a nopaški, rjaduja je a zastawk wupłaća. Za to běchu lětsa prěni raz tež wulku zastawkowu mašinu skazali.

Tež klětu chce so Pawk zaso na Roskilde podać a přeproša wšitkich, sej najwjetši hudźbny festiwal sewjerneje Europy lubić dać.

To budźe wot 29. junija hač do 6. julija 2024. Jakub Wowčer

Wjacore sta hosći pobychu kónc tydźenja w Ralbicach na jubilejnym swjedźenju „100 lět sport w Delanach“. Nimo tójšto turněrow za dźěći hrajachu sobotu delanscy młodostni hromadźe ze staršimi přećiwo wubrance ze Spalenych Pořic – to su čěscy přećeljo. Hra skónči so 3:2 za hosći.

W samsnym času wubědźowachu so wolejbulowe mustwa w pěsku wo pokal. Njedźelu popołdnju hraješe potom Serbske mustwo přećiwo tamnišemu prě­njemu mustwu kaž tež teamej z něhdyšich hrajerjow Sokoła. Mały turněr doby prěnje mustwo Sokoła Ralbicy/Hórki. Poslednja hra njedźelu nawječor běše žónska kopańca. B-młodostni z Biskopic hrajachu přećiwo žonam ze Złeho Komorowa. Młode koparki hru z 0:4 přěhrachu.

Tež nowe mjeno nětko stadion w Ralbicach ma. Tón nosy napis „Stadion Jurij Frencl“. Nimo toho pokazachu so koparjo Ralbičanskeho 1. mustwa w nowej „jubilejnej“ sportowej drasće. Na njej je prěni raz

w stawiznach delanskeho sporta serbskorěčny napis „Štó, hdyž nic my!?“ Kosntantin Hrjehor

Ke klasiskej a modernej dujerskej hudzbje swjecili

„Krass Brass“ rěkaše spočatk junija w Hórkach. Swjedźeń zwjazuje młodu a staršu generaciju w zahoritosći k dujerskej hudźbje.

Po tym zo běchu Chróšćanscy muzikanća swjedźeń popołdnju zahajili, smědźeše so publikum tohorunja na kapału Horjany wjeselić. Po nich hrajachu studenća wysokeje šule za hudźbu w Drježdźanach, tak mjenowani „Balkaneros“. Na wšelakich blachowych dujerskich instrumentach a na saksofonach 16čłonowski rytmusowy cyłk publikum wot spočatka sem sobu storhny.

Po krótkej přestawce slědowaše wustup skupiny „Brasswoofer“ z Hannovera. Urban-brass a hiphop-brass stej hudźbnej směraj, kotrymajž so skupina wosebje wěnuje. Wotměnjawy program wuklinča z DJjom „KrassBrass-Plattendreher“. Jeho hudźba je miks mjez klasiskej dujerskej hudźbu a technostilom. Organizatorojo ­swjedźenja Syman a Fabian Hejduška kaž tež Jakub Langa su z cyłkownym wotběhom zarjadowanja přewšo spokojom. tekst a fota: Jan Bogusz