Podstupim (dpa/SN). Braniborska wokrjesna reforma zaběra tónle tydźeń tamniši krajny sejm. Wokrjesy, města a gmejny plany knježerstwa SPD a Lěwicy raznje wotpokazuja. Po słowach sobustawa zwjazka městow a gmejnow Jensa Grafa, kotryž na słyšenju w krajnym sejmje póndźelu rěčeše, měło wuměnjenje za noworjadowanje wokrjesow wobšěrne přenošowanje nadawkow krajow na komuny być. „Doniž wobšěrna funkcionalna reforma njepředleži, kotraž ma města a gmejny zesylnjeć, njeměli plany zwoprawdźeć“, wón zapósłancow krajneho sejma namołwješe.
Po naćisku braniborskeho nutřkowneho ministerstwa maja jenož hišće 400 městnow wšěch sobudźěłaćerjow kraja komunam přeńć. „Štož zwostawa, njezasłuža sej hižo wuraz reformy“, kritizuje prezident braniborskeho sejma wokrjesow Wolfgang Blasig (SPD). W ministerstwach je zwólniwosć woteběrała, nadawki wotedać. Nuznje trěbne pak je zesylnjenje komunalneho samozarjadnistwa, zwurazni jednaćel sejma wokrjesow Paul-Peter Humpert. „Z tym móhli wobydlerjam bliske rozsudy tworić.“
Drježdźany (SN). Swobodny stat Sakska a wójwodstwo Delnja Šleska chcetej we wobłuku inowatiwnych produkciskich technologijow wušo hromadźe dźěłać. Na XII. pólsko-sakskim hospodarskim forumje wčera a dźensa we Wrócławu je sakski hospodarski minister Martin Dulig (SPD) runje tak přitomny kaž pólska wicemaršalka Iwona Krawczyk. Z něhdźe sto pólskimi a sakskimi předewzaćelemi, wědomostnikarjemi a politikarjemi wuswětla na přikład móžnosće kooperacijow a wobstejace hospodarske zwiski.
„Inowacija je wažny kluč přichodneho hospodarskeho wuwića. Znajmjeńša tak wažne je spěchowanje mjezynarodneho dźěła we wobłukomaj wědomosć a hospodarstwo. Kooperaciska kultura njeměła mjezy znać – runje nic hladajo na susoda“, Dulig na wotewrjenju foruma wuzběhny. Potencial zhromadneho dźěła widźi wón předewšěm za mjeńše a srjedźostawske předewzaća. Na zarjadowanju hodźa so zwiski nawjazać. Dale móža so přitomni wo planowanych projektach informować.
Dreux/Budyšin (CS/SN). Składnostnje 25. róčnicy załoženja měšćanskeho partnerstwa poda so delegacija z Budyšina wot 5. do 8. oktobra do francoskeho Dreuxa. Skupina 40 ludźi wobsteješe nimo čłonow partnerskeho towarstwa z hudźbnych šulerjow, wuměłcow, keramikarkow a šachownikow. Nimo toho běchu zastupjerjo z Wulkeje Britaniskeje a Burkina Faso z hosćom. Jendźelske město Evesham swjeći lětsa 40 a afriske Koudougou hižo 45 lět přećelstwa a kooperacije z Dreuxom.
We wobłuku wulkeho swjedźenja su sobotu partnerske zrěčenja znowa wobkrućili. Budyski wyši měšćanosta Alexander Ahrens (SPD), kiž bě sej podawka dla wosebje do centralneho regiona Loiry dolećał, zahori z jimacej a bjez manuskripta swobodnje přednošowanej narěču w perfektnej francošćinje. Nimo njeho podpisa dokument tež předsyda partnerskeho towarstwa Tomasz Nawka.
Je tomu prěni króć, zo twarja w Budyskim wokrjesu nadkomunalny wohnjowoborny depot. To rěka, zo budźetej tón dwě gmejnje přichodnje zhromadnje wužiwać a wudźeržować.
Budyšink (CS/SN). W Budyšinku nastawa twarjenje, w kotrymž změjetej Přiwčanska a wohnjowa wobora z Budyšinka – Malešanska gmejna – kaž tež wohnjowa wobora z Poršic – gmejna Kubšicy – zhromadnje swój domicil. Tuž so komunje z Malešec a Kubšic tež ruku w ruce wo to staratej, zo budu wšitke hašenske a dalše nastroje přeco w najlěpšim stawje a změjetej wudźeržowanje depota zhromadnje w horšći.
Z tejele přičiny staj Malešanski wjesnjanosta Matthias Seidel (CDU) a jeho kolega Olaf Reichert (njestronjan) z Kubšic wutoru w Budyšinku zakładny kamjeń połožiłoj. Nowy depot dyrbja twarić, dokelž je wulka woda w lětomaj 2010 a 2013 na twarjenomaj w Budyšinku a Přiwćicach wulku škodu načiniła. Dźakowano stoprocentnym spěchowanskim srědkam z fondsa za wotstronjenje škodow wulkeje wody móža nětko zhromadnje wužiwajomny skład na wěstym městnje w Budyšinku natwarić. Depot budźe wot wšěch třoch woborow přeco derje docpějomny.
Trjebin (AK/SN). Při dalewjedźenju planow Wochožanskeje wuhloweje jamy měli so w kóždym padźe naležnosće wobydlerjow Miłoraza wobkedźbować. K tomu je na posedźenju Trjebinskeje gmejnskeje rady wčera wječor wjetšina radźićelow přihłosowała. Brunicowy plan měł so hakle potom schwalić, předleži-li za Miłoraz podpisane přesydlenske zrěčenje, kotrež hodźi so juristisce tež wobskoržić. Přesydlenje měło socialnje znjesliwe a zawěsćene być a so po móžnosći tak zahe kaž móžno zeskutkownić.
Za to widźi gmejnska rada wjacore přičiny. Wobydlerjo dźěla Miłoraza dyrbja so tak a tak přesydlić. Tak to w lěće 1994 wobzamknjeny brunicowy plan předwidźi. „Někotři su hižo ležownosće kupili a chcedźa klětu w nalěću z twarom domskeho započeć. Swójby so při tym rozdrěja“, w stejnišću gmejnskeje rady rěka. Potrjecheni wobydlerjo maja dźěl Miłorazskeje wjesneje zhromadnosće wostać. A to w nowym zhromadnym sydlišću z tamnymi Miłoraženjemi.
Na slědach prjedownikow
Wojerecy. K 105. jubilejej załoženja Domowiny poskićuje Cornelia Schnippa z LAUSITZleben jutře, 13. oktobra, wot 17 do 19 hodź. wosebite wodźenje po Wojerecach. Popłatk na wosobu wučinja sydom eurow. Zajimcy měli so nanajspěšnišo pod telefonowym čisłom 035722/ 37 401 abo 0157/850 938 69 přizjewić.
Regionalna konferenca
Rakecy. Póndźelu, 16. oktobra, su zajimcy wot 13 do 17 hodź. na regionalnu konferencu 2017 a zhromadnu busowu jězbu k LEADER-projektam po Hornjołužiskej holi a krajinje hatow přeprošeni. Poslednje přizjewjenja su pod adresu hišće móžne.
Sej dopomnjenku paslić
Budyšin. Štóž ma wotpohlad sej rjanu dopomnjenku paslić, ma tomu sobotu, 14. oktobra, přiležnosć. A to wot 10 do 17 hodź. w Budyskim Serbskim muzeju, hdźež wotměje so dźěłarnička „Rjekojo z filca“. Pod nawodom Reginy Herrmannoweje móža zajimcy ručne klanki bajowych postawow paslić. Regina Herrmannowa je wuměłča, kotraž je jónkrótne figury za muzej w Budyšinje kaž tež za Chóćebuski Serbski muzej zhotowiła.
Nazymski swjedźeń wohenja
Wojerecy (SN/mwe). Hač do 7. nowembra su pod titulom „Fabulieren in Farbe“ ilustracije a rysowanki zemrěteho Mišnjanskeho wuměłca Lothara Sella w geriatriskej dnjowej klinice Łužiskeho jězorinoweho klinikuma wustajene. Kaž nam dźensa z jednaćelstwa chorownje zdźělichu, je ekspozicija tójšto připóznaća dóstała. Nimo pacientow a wopytowarjow chorownje bě sej ju tež tójšto wobydlerjow města a wokoliny wobhladało. „Dźensa sej zajimc mólbu kupi“, rěkaše. Geriatriska dnjowa klinika w přizemju, blisko hłowneho zachoda klinikuma, je wotydźenja wot 9 do 16 hodź. spřistupna.
Torhošćo bórze přetworjene
12.10.2017 – 18.10.2017 Budyski filmowy palast: Vorwärts immer!: wšědnje 18:00 a 20:15 | pj a so 23:00 Captain Underpants – Der suppertolle erste Film w 3D: wšědnje 15:45 | so 12:00 Captain Underpants – Der suppertolle erste Film: wšědnje 14:00 (nimo pó a srj) Blade Runner 2049 w 3 D: wšědnje 20:00 | pj a so 22:30 My Little Pony: wšědnje 16:00 (nimo štw) ES: wšědnje 16:45 a 19:45 | pj a so 22:30 Cars 3 – Evolution: wšědnje 14:30 (nimo pó a srj) | so 11:45 Cars 3 – Evolution w 3D: wšědnje 17:45 Rock My Heart: wšědnje 13:45 (nimo pó a srj) a 18:15 (nimo pó) The Lego Ninjago Movie w 3 D: srj, štw, so, nj 13:45 The Lego Ninjago Movie wšědnje 16:00 (nimo pj a pó) | so 12:15 Kingsman – The Golden Circle: štw a so 20:30 Annabelle 2: pj a so 22:45 High Society: pj a srj 20:30 Bullyparade: wu a so 20:30 Ich – Einfach unverbesserlich pj 13:45 Ostwind 3 – Aufbruch nach Ora: pj 16:00 Emoji: so 10:00 Bigfoot Junior: pó 16:00
Kino-ekstra: Die Erfindung der Wahrheit: srj 17:15 a 20:15