Z wudaća: srjeda, 14 nowembera 2018

Myto pěstowarni

Bórkowy/Budyšin. 24. nowembra přepoda zamołwita za naležnosće Serbow w Braniborskej, statna sekretarka Ulrike Gutheil w błótowskich Bórkowach prěni króć myto „Mina Witkojc“. Žylowsku pěstowarnju „Mato Rizo“, kotraž je w nošerstwje Serbskeho šulskeho towarstwa, z nim počesća. W tymle kubłanišću je měł před 20 lětami modelowy projekt Witaj swoju kolebku.

Hilse we fokusu Statneho škita

Berlin. Statny škit zaběra so z Karstenom Hilse (AfD). Wobdźěliwši so na njedawnej demonstraciji je Budyski zapósłanc Zwjazkoweho sejma pječa spěw sobu spěwał, w kotrymž namołwja so k namocy přećiwo kanclerce Angeli Merkel (CDU). W interneće kursěruje wotpowědne widejo, rěka ze stron sakskeje policije.

Doba za próstwy podlěšena

Šulerjo z Budyšina a z Jabloneca su sej domiznu zhromadnje wotkryli

Budyšin/Jablonec (SN/MiR). Na Budyskim Serbskim gymnaziju je wčera a póndźelu knježiła serbsko-čěska atmosfera. Tři Budyske dźewjate lětniki witachu runostarych šulerjow ze zakładneje šule „Na Šumavě“ z Jabloneca nad Nisou na němsko-čěski projekt za wobswěto­we kubłanje „Homo et regio“ (Čłowjek a krajina) z Europskeho fondsa za regionalne wuwiće. Wot oktobra 2016 hač do klětušeho decembra prócujetej so leaderpartner, Towaršnosć za Jizerske hory, a projektowy partner, přirodna stacija „Wuchodna Hornja Łužica“ w Dołhej Boršći (Förstgen) njedaloko Mikowa (Mücka) wo to, šulerjam posrědkować wědu wo žiwjenju w přirodźe. Je to mjezypřekročacy program we wobłuku akcije „Witaj, susodo“ za šule w regionje Liberec a wo-krjesow Budyšin a Zhorjelc.

Mjez třomi delegatami z Budyskeho wo­krjesneho zwjazka CDU, kotřiž wu­zwo­la na zwjazkowym zjězdźe 8. decembra w Hamburgu sobu nowu před­syd­ku abo noweho předsydu strony, je Ro­land Ermer z Njedźichowa. Axel Arlt je z nim porěčał.

Kak sće wokrjesny stronski zjězd minjeny kónc tydźenja w Kumwałdźe dožiwił?

R. Ermer: Čłonojo so wjesela, zo započnje so w CDU něšto hibać. Su wćipni, štó so na zwjazkowym zjědźe přesadźi.

Změja čłonojo wšelakich faworitow?

R. Ermer: Po mnohich rozmołwach mam zaćišć, zo za nas Jens Spahn žanu rólu njehraje. Koho budu delegaća wu­zwolić, Friedricha Merza abo Annegret Kramp-Karrenbauer, njehodźi so hižo rjec. Jeju dožiwili hišće njejsmy. Tohodla streamuja regionalne zetkanja CDU samo online w interneće, zo móhł je kóždy slědować, kiž so wobdźělić njemóže.

A wosobinsce?

Budyšin (SN). Dopomnjenki, z nimi zwisowace začuća a mysle ludźi z našeje srjedźizny je Křesćan Krawc zběrał a napisał do noweje knihi „Sej statok stajili“, wušłeje tele dny w Ludowym nakładni­stwje Domowina. Na zakładźe wuprajenjow portretowanych wosobow – mjez druhim su to Leńka Šołćina-Winarjec, Fryco Wojto, Tomaš Čornak a Brigita Räss­le­rowa – je nastała zajimawa a zabawna kniha. W kapitlu „Naša šula – naš statok“ wěnuje so Krawc „Chróšćan zběžkej“. Skupina tehdyšich wojowarjow a dalši wobdźěleni čitarjej na putace wašnje wone wichorojte dny do pomjatka wołaja.

Braniborska podpěruje prěni króć serbske­ kubłanske poskitki w dźěćacych dnjowych přebywanišćach. To rjekny rěčnica za dźěćacu a młodźinsku politiku braniborskeje Lěwicy Gerrit Große po wuradźowanju wuběrka za ku­błanje, młodźinu a sport nastupajo etat Braniborskeje 2019/2020.

Prěni wotrězk projekta za renaturěrowanje Sprjewje su wčera mjez Lemišowom a Połpicu zakónčili. Při tak mjenowanym Lemišowskim starym promjenju je bager Nade­borec wodotwarskeje firmy z Krušwicy wodźe puć runał, zo móhła Sprjewja nětko zaso po wožiwjenym starym rěčnišću ćec. W minjenych pjeć měsacach njejsu tam jenož za přirodnosć Sprjewje dźěłali, wjesela so zamołwići projektnych part­nerow DBU herbstwo přirody, zarjadnistwa Biosferoweho rezerwata Hornjołužiska hola a haty a Krajneho zarjadnistwa rěčnych zawěrow Sakskeje. Zdobom je w Poł­picy 500metrowska škitna sćěna před wulkej wodu nastała. Projekt chcedźa klětu z dal­šimi naprawami mjez Połpicu a Nowej Wsu zakónčić. Foto: Steffen Unger

Berlin (dpa/SN). Zwjazkowe knježerstwo přilubja ludźom, zo změja wot lěta 2015 zakonske prawo na spěšny internet. Hač do toho chcedźa z wutwarom škleńčno­nićoweje syće hotowi być, rjekny nawoda kanclerskeho zarjada Helge Braun dźensa w rańšim magacinje ARD. Potom maja ludźo prawo, sej přizamknjenje k syći sudnisce wunuzować. Zwjazkowe knježerstwo wuradźuje dźensa a jutře na klawsurnym posedźenju wo digitalizaciji.

Z Brüsselom so dojednali?

London (dpa/SN). Britiske knježerstwo je so po swójskich wuprajenjach ze zastupnikami Europskeje unije wo wustupje kraja z EU dojednało. Hižo dźensa popołdnju chcychu z ministrami wo dalšim postupowanju wuradźować, knježerstwo zdźěla. Samsny čas chcychu so w Brüsselu pósłancy 27 zbywacych čłonskich statow EU zeńć. Zdobom móhło dźensa w britiskim parlamenće k roze­stajenjam přińć. Zastupnicy wjacorych stron běchu připowědźili, zo njebudu dojednanju z Brüsselom přiłosować.

Lěwica kritizuje Merkel

Sportowa skała w nastawacym Krušwičanskim „Wólnočasnym swěće“ je hotowa. Zo móhli kumštnu skału natwarić, dyrbjachu tójšto zemje zwuzběhać. Tak nasta nasyp, kotryž chcedźa jako sankowanišćo wužiwać. Do nasypa wjedźe wuska betonowa roła. Sobudźěłaćerjo Choćebuskeho zawoda ju tuchwilu dotwarjeja. Foto: Joachim Rjela

Drježdźany/Choćebuz (dpa/SN). Rjemjeslniskej komorje w Drježdźanach a Choćebuzu parujetej před zakónčenjom brunicoweho zmilinjenja strukturne wuwiće we Łužicy. W zjawnym lisće wobroćatej so na zwjazkoweho hospodarskeho ministra Petera Altmaiera (CDU), čłonow brunicoweje komisije a zapósłancow zwjazkoweho sejma. Tam wuprajitej so gremijej za wosebitu hospodarsku conu, hdźež móhło so hospodarske wuwiće zmóžnić. Runje tak měli so zwjazkowe zarjady we Łužicy zaměstnić a kónčinu z modernej infrastrukturu wuhotować. Wustup z brunicy měli jenož­ wobzamknyć, je-li perspektiwa regiona zaručena, zwurazni prezident Drježdźanskeje rjemjeslniskeje komory Jörg Dittrich. Po jeho słowach pobrachuje za Łužicu jasny jězbny plan.

W dwaceći centimetrow hłubokim betonje ze swojim awtom třacy wostał je 57lětny šofer w Stuttgarće. Zawčerawšim njebě wón twarnišćo při kolijach měšćanskeje železnicy spóznał, hdźež běchu twarscy dźěłaćerjo beton kidali. Na zbožo njebě twarska maćizna hišće wuschnyta, tak zo móžachu jězdźidło zaso z twar­nišća wućahnyć. Beton móžachu samo tež hišće zhładkować.

Z črjódu kruwow so spřećelił je łós w Coswigu. Wšědnje tam ze swojimi dołhimi nohami płót wokoło pastwy přewinje. W nocy so potom zaso zhubi. Zadźerženje wulkeho zwěrjeća njemóže sej bur Hartmut Schröter wuswětlić, tuka pak na to, zo chce rólu howjada přewzać. Na swojej pastwje dźě so tuchwilu jenož kruwy pasu. Přichodnje maja skoćeća přećahnyć. Hač chce jim njewšědny hósć sćěhować, budźe tuž napjata naležnosć.