Po dobrej tradiciji wotmě naša wjesna Domowinska skupina Šunow-Konjecy njedawno zaso swoju hodowničku, zwjazanu z hłownej zhromadźiznu w Konječanskej Burskej stwě. Pilne žony běchu z wjesnymi dźěćimi tónraz bajku „Připołdnica“ nazwučowali. Wšitko běchu dźěći ze swojimi pomocnicami zhromadnje zmištrowali a sej mjez druhim wosoby wumyslili, teksty zestajeli, kulisy wobstarali a so staru dźěłansku drastu woblekli. Za swoju spodobnu inscenaciju žnějachu młodźi dźiwadźelnicy wulki dźak a připóznaće.
Předsydka Kerstin Mauwowa poda rozprawu wo dźěle skupiny, Andreja Lanzyna rozprawješe wo tuchwilnym stawje našeje skupinskeje pokładnje. Wobě rozprawje čłonojo schwalichu. Zwjeselace je, zo móžachmy kónc minjeneho lěta štyrjoch dalšich wjesnjanow do našeje Domowinskeje skupiny witać.
Při bjesadźe a spěwje rjana hodownička wuklinča. Alojs Langa
Wětošow. Třeće schadźowanje Serbskeho sejma wotměje so jutře, sobotu, na Awgusta Bebelowej 9 we Wětošowje. W 10 hodź. započnje so dźěłarnička wo internej a eksternej komunikacij. Posedźenje zahaji so w 13 hodź. z poskitkom rozmołwy přitomnym hosćom. Dale diskutuja wo naćisku jednanskeho porjada, wo wobsahowych zaměrach sejma a wo lětušich dźěłowych ćežišćach. Hosćo su witani.
Wustajeńca so skónči
Budyšin. Aktualna kabinetna wustajeńca w Muzeju Budyšin z wobrazami Ulriki Mětškoweje budźe njedźelu posledni raz widźeć. Při tej składnosći wěnuje so Erika von Borries zajutřišim w 15 hodź. žiwjenju Wilhelma Müllera (1794–1827), na kotrehož teksty so twórby Ulriki Mětškoweje złožuja.
Wo wukubłanju we wójsku
Budyšin. Informaciske zarjadowanje wo wukubłanskich a studijnych móžnosćach w Zwjazkowej woborje wotměje so póndźelu, 14. januara, wot 14 hodź. w Budyskim powołanskim informaciskim centrumje na Nowosólskej.
Swětło do ćmy stawiznow
Trabant pokradnyli a tčacy wostali
Spale. Na pólnym puću pola Spal su předwčerawšim dopołdnja wopušćeny Trabant wuhladali. Awto bě wočinjene a jedne z kolesow bě skóncowane. Kaž policija pozdźišo wuslědźi, běchu njeznaći kultowe jězdźidło ze zahrody blisko Wojerowskeje Liebknechtoweje pokradnyli. Škoda wučinja něhdźe 150 eurow. Kriminalna policija je pad přewzała a spyta nětko zwěsćić, komu je so oldtimer z časa NDR tak lubił, zo chcyše jón měć.
Jězor bórze zaso přistupny
Rań. Złokomorowski jězor ma wot 1. apryla ludźom zaso přistupny być. To zdźěli Łužiska a srjedźoněmska towaršnosć hórnistwoweho zarjadnistwa wčera nowinarjam w Ranju. Po zesunjenju zemje na mjeńšej kupje loni w septembru běchu zamołwići jězor nachwilnje zawrěli. Kupa njeje přirodoškitnych přičin dla za zjawnosć přistupna.
Železnica zaso po planje jězdźi
Mnichow. Wobchad na železniskimaj čaromaj Drježdźany–Zhorjelc a Biskopicy–Žitawa zaso po planje běži. Wo tym informuje towaršnosć Krajne ćahi – Regentalbahn, wobhospodarjer transportneho předewzaća Trilex, na swojej internetnej stronje. Wjedrowych přičin dla su wčera wjacore jězby dospołnje wupadnyli, nimo toho dóńdźe k mnohim zapozdźenjam.
Ze zawdawkom přezjedni
Budyšin (SN/bn). Lětuši wječorny ptačokwasny program Serbskeho ludoweho ansambla pod nadpismom „To tla wěrno njej’!“ je z wjacorych widow wosebity a budźe so jasnje wot lońšeje inscenacije „Po serbskich slědach“ rozeznawać. Stawizna je w času politiskeho přewróta zaměstnjena, z kotrehož so do přichoda a naposledk samo na druhi planet pleće. „Po wašnju rewije a citujo zabawne telewizijny programy, kaž na přikład ‚Kotoł pisaneho‘, podamy so na jězbu po času. Chcemy dobu přewróta ze wšelakich perspektiwow a zdobom kritisce wobswětlić. Wědomje wužiwamy takrjec historiske kostimy programa z lěta 1989, nimo toho sym serbske teksty na znate spěwy toho časa na přikład Herberta Grönemeyera spisała, kotrež jewišćowu hudźbu wudospołnjeja“, připowědźi dramaturgowka SLA Jěwa-Marja Čornakec, zdobom libretistka programa, na wčerawšej nowinarskej konferency w Röhrscheidtowej bašće. Tema bě jej „nablaku jasna, jako loni nadawk dóstach, program zdźěłać. Podawki kołowokoło přewróta, kotrehož 30.
Krajni radojo, měšćanosća a wjesnjanosća su ći poprawni managerojo Zwjazka a krajow. Štož politikarjo teoretisce wupjeku, maja woni w praksy zwoprawdźić. Runje na tej runinje pak so rozsudźa, hač wobydlerjo politiku akceptuja, abo jako ludnosći njeblisku wotpokazuja. Słowa politikarjow, kaž „my to zhromadnje zdokonjamy“, ničo njepomhaja, jeli komunalni zastupjerjo na kóncu sami „politisku teoriju“ zwoprawdźeja a konfliktow dla často zadwěluja.
Tak mam postupowanje tuchwilneho sakskeho ministerskeho prezidenta Michaela Kretschmera (CDU) za dobre, so rozmołwjeć z wobydlerjemi swobodneho stata – z tak mjenowanym dialogom na jednej runinje, hdźež móža jemu swoje problemy přednjesć. Wón wšak zdobom přiznawa, zo je ćežko w běhu jenož mało časa dobre wuslědki prezentować. Tomu bě na přikład tež w Konjecach tak, hdźež je so Kretschmer z plahowarjemi wowcow zetkał a z nimi wo ćežach z wjelkom rěčał. Po něšto měsacach předleži skónčnje naćisk wjelčeho managementa. Byrnjež hišće ničo rozsudźene njebyło, drje so pomałku něšto hiba.
Přichodne komunalne wólby w Sakskej so bliža. Wólbne zwjazki a cyłki tuž swoje lisćiny kandidatow nastajeja. Wčera činještej to mjez druhim Wolerske zjednoćenstwo Chrósćicy/Prawoćicy a Radworski gmejnski zwjazk CDU.
Chrósćicy/Radwor (KJu/SN/BŠe). Wolerske zjednoćenstwo Chrósćicy/Prawoćicy nastupi ke komunalnym wólbam 26. meje z nowym mjenom. Na to su so jeho čłonojo wčera w Chrósćicach dojednali. Wotnětka wustupuja jako Swobodni wolerjo gmejny Chrósćicy.
Lipsk (LW/SN). Wčerawši dźeń wotewrjenych duri na sakskich uniwersitach a wysokich šulach je zajimcow tež do Instituta za sorabistiku Lipšćanskeje uniwersity wabił. Koordinatorojo a sobudźěłaćerjo instituta su jim na prašenja wotmołwjeli. Wopytowarjo wužiwachu składnosć, wobhladać sej wuwučowarnje, a zhonichu wo tym, po kotrym puću móža so za studij přizjewić a kak so z přidružnikom za powołanje wučerja stać. Njewšědne naprašowanje mějachu ze syće. Zajimc z Londona bě so naprašował, hač móhł na Instituće za sorabistiku studować a kotre wuměnjenja su za to trěbne. Institut poskića tři studijne směry. Su to sorabistika z wotzamknjenjom BA (bachelor) a MA (master), wučerstwo serbšćiny za zakładnu šulu, wyšu šulu abo gymnazij a europske mjeńšinowe rěče z wotzamknjenjom bachelora.