Senatorka zludana
To a tamne (16.01.24)
Bjez jězbneje dowolnosće je policist w Jendźelskej na dźěło jěł. Tež w běhu někotrych zasadźenjow je wón policajske awto wodźił. Kaž so wukopa, su mužej z města Kidderminster loni w meji někotrych wobchadnych přeńdźenjow dla jězbnu dowolnosć sćazali. Před někotrymi tydźenjemi je 26lětny muž swoju słužbu pola policije zakónčił. Nětko je jeho sudnik wospjetnych přeńdźenjow dla z dwanaće tydźenjemi jastwa pochłostał. Tohorunja ma wón hakle za połdra lět swoju jězbnu dowolnosć wróćo dóstać
Italske knježerstwo wabi tuchwilu za „cucina italiana“ – italsku kuchnju. Tak sej politikarjo přeja, zo maja so italske chłóšćenki z imaterielnym swětowym kulturnym herbstwom stać. Za to nětko intensiwnje wabja, mjez druhim z wosebitej akciju. Astronawća na mjezynarodnej swětnišćowej staciji maja nětko italske nudle dóstać.
Prěni wopyt bamža
Vatikan (B/SN). W lěće 1964 poda so 262. naslědnik swjateho Pětra, bamž Pawoł VI. prěni raz na putnisku jězbu do Swjateho kraja, a to pod politisce brizantnymi wuměnjenjemi, dokelž knježeše tam wójna. Z tohole historiskeho podawka wuchadźachu wažne impulsy za ekumenu a za kontakty k židowstwu a islamej. Bamž Pawoł VI. je tehdy na woběmaj stronomaj israelsko-arabskeje mjezy prěni króć zjawnje wo měrje rěčał.
Předmjeno Jězus jara rědke
Bonn (B/SN). W Němskej a wjele dalšich krajach swěta dźěći na mjeno Jězus wukřćić dać je njepředstajomne, ale zakonsce móžno. W lěće 2022 dósta jědnaće hólcow w Němskej předmjeno Jězus. W Španiskej, Portugalskej a we Łaćonskej Americe je to wjele bóle z wašnjom. Hakle wot 16. lětstotka smě so mjeno Marija jako předmjeno wužiwać.
Knježny do Vatikana zaćahnyli
Hladarjo dale pobrachuja
Hamburg (dpa/SN). Najwjetši dźěl chorownjow po najnowšim přepytowanju z toho wuchadźa, zo so problem pobrachowacych hladarjow dale přiwótřa. 86 procentow wšěch woprašanych klinikow rjekny, zo so wobsadźenje powšitkownych stacijow chorownjow přichodne lěta dale pohubjeńši. Woprašała bě so pruwowanska towaršnosć BDO w nadawku instituta chorownjow Němskeje. „Přichod chorownjow je zaćěmnjeny.“
Žadaja sej pušćenje zastajencow
Tel Aviv (dpa/SN). Sto dnjow po zawlečenju něhdźe 240 ludźi z Israela do Gazaskeho pasma žadaja sej přiwuzni razniše prócowanja wo pušćenje zastajencow. W israelskej stolicy Tel Avivje je so wčera 24 hodźin trajaca demonstracija skónčiła, na kotrejž su přiwuzni a swójbni zawlečenych rěčeli. Na kóncu porěča israelski prezident Jitzchak Herzog k wobdźělnikam. Wón chce so wosobinsce wo to postarać, zo so dóńt zastajencow z domjaceje a globalneje politiki njezhubi.
Kandidat AfD jasnje prědku
USA hněwne na Israel
Bohačkojo dale zbohatnyli
Přećiwo prawicarjam demonstrowali
Podstupim (dpa/SN). Dźesaćitysacy ludźi su wčera w Podstupimje a Berlinje přećiwo prawicarstwu demonstrowali. Jeničce w Berlinje je so něšto dnjow po rozprawach wo zetkanju radikalnych prawicarjow něhdźe 25 000 demonstrantow před Braniborskimi wrotami zešło. W Podstupimje porěča wyši měšćanosta Mike Schubert (SPD), kiž bě k protestnej akciji namołwjał, k 10 000 wobdźělnikam na Starym torhošću. W braniborskej krajnej stolicy bě so zetkanje prawicarjow ze zastupnikami AfD wotměło.
W Podstupimje mějachu demonstranća plakaty z hesłami kaž „Podstupim je pisany“ abo „Stejimy zhromadnje“ sobu. Mjez wobdźělnikami běštaj tež zwjazkowy kancler Olaf Scholz (SPD) a zapósłanča zwjazkoweho sejma, wonkowna ministerka Annalena Baerbock (Zeleni).
Nastork zarjadowanja běchu rozprawy wo zetkanju w Podstupimje, na kotrymž běchu wo planach k masowemu wuhnaću migrantow rěčeli. „Njedamy sej demokratiju wot nowych nacijow kradnyć“, wyši měšćanosta Schubert rjekny.
Wjeršk protestow w Berlinje
5 000 traktorow w stolicy Němskeje – tež łužiscy ratarjo wobdźěleni
Berlin (dpa/SN). Na zakónčacu wulku demonstraciju přećiwo planowanemu šmórnjenju dawkowych lěpšinow za ratarske zawody wočakowachu dźensa w Berlinje tysacy ratarjow ze wšeje Němskeje. Hižo wčera wječor dyrbješe policija wulkeje ličby přichwatanych wobdźělnikow dla dróhi w centrumje němskeje stolicy zawrěć. Nimo zastupnikow ratarskich zwjazkow chcyše tež financny minister Christian Lindner (FDP) k ratarjam porěčeć. Hižo zwoprědka pak wón wočakowanja wosłabi, zo chce šmórnjenje subwencijow dospołnje zběhnyć. Podobnje wuprajichu so wodźacy zastupnicy tamneju stron amploweje koalicije SPD a Zelenych. Woni pokazachu na wjerškowe zetkanje knježerstwa ze zastupnikami ratarjow, kiž bě tež dźensa planowane.
Strach mjez linkami
Planuja zhromadnu wodźikowu syć
Drježdźany (dpa/SN). Sakska a Čěska planujetej natwar mjezy překročaceje syće wodźika. Přidatnje chcedźa wuměnu a kooperaciju slědźenskich zarjadnišćow a zawodow wobeju krajow na tutym polu zesylnić, zdźěli sakske ministerstwo za hospodarstwo zašły štwórtk.
Za Saksku a Čěsku je natwar pipelinoweje infrastruktury za transport wodźika jara wažny. Wobaj krajej chcetej za to prěnjotnje hižo wobstejace roły za zemski płun přetwarić. Tole ma zastaranje z wulkimi mnóstwami wodźika z wuchodneje a južneje Europy hač do kónca lěta 2029 zaručeć. „Přez Čěsku wjedu hižo dźensa wažne transportne roły za płun, kotrež móhli so perspektiwisce tež za wodźik wužiwać“, ministerstwo zdźěla.
