Berlin (dpa/SN). Zwjazkowy minister za dźěło Hubertus Heil (SPD) je dźensa na wjerškowym zetkanju z dźěłodawarjemi a dźěłarnistwami wo praktiskich prašenjach integracije ukrainskich ćěkancow na dźěłowych wikach wuradźował. „Smy so hižo wo to postarali, zo bychu ludźo z prawom přebywanja tež prawo na dźěło měli“, rjekny Heil nowinarjam. „Zo by tole tež woprawdźe móžne było, dyrbimy nětko spěšnje a pragmatisce cyle praktiske prašenja rozrisać.“ Rěčeć chcychu wo rěčnych kursach za ćěkancow, wo připó­znawanju powołanskich kwalifikacijow a wo dalekubłanjach. Nimo toho chcychu wo spušćomnym wothladanju dźěći wuradźować, dokelž wšak předewšěm žony z dźěćimi do Němskeje přińdu. Na zarjadowanje přeprošeni běchu šef dźěłarnistwa DGB Reiner Hoffmann, prezident zwjazka dźěłodawarjow Rainer Dulger a prezident zwjazka industrijnych a wikowanskich komorow Detlef Scheele kaž tež zastupnicy zwjazkowych krajow.

Zwjazkowy zarjad za migraciju a ćěkancow je sej wěsty, zo maja ćěkancy dosć móžnosćow, so na rěčnych a integraciskich kursach wobdźělić.

Tak prawje předstajić sej hišće njemóžu, zo nimaja wot přichodneje njedźele nimale wšitke wobmjezowanja koronawirusa dla wjace płaćić, byrnjež ličby nowych infekcijow dale na wysokim niwowje wostali. Někak smy so samo hižo na to zwučili, zo nam wirusa dla předpisaja, što je dowolene, što nic a kak mamy so zadźeržeć. Nětko połoža tutu zamołwitosć do rukow ludźi. Mnozy drje swobody dla wyskaja, druzy wostanu kedźbliwi a zaso druzy drje so runjewon toho boja, što maja nětko wočakować. Naprawy njejsu zběhnjene, dokelž je pandemija nimo, ale dokelž zakonje to předpisaja. Wosobinsce sym měnjenja, zo je spodźiwna swoboda tež wuraz wěsteje rezignacije ze stron politiki po dwěmaj lětomaj pandemije: Čińće, štož chceće! Tež připowědźenje knježerstwa, zo chce połoženje běžnje posudźować a po trěbnosći wobmjezowanja zaso wukazać, dyrbimy drje chutnje brać. Nazymu widźimy, hač je swoboda woprawdźita abo nachwilna. Marko Wjeńka

Berlin (dpa/SN). Fachowcy konferency kultusowych ministrow Němskeje radźa, z Ukrainy ćeknjenych dźěći a młodo­stnych spěšnje w pěstowarnjach a šulach Němskeje zaměstnić. „Wšitke dźěći a wšit­cy młodostni dyrbjeli bórze po přichadźe pěstowarnju abo šulu wopytać“, rjekny městopředsyda stajneje wědomostneje komisije Olaf Köller wčera nowinarjam. Tam móhli dźěći němčinu nawuk­nyć, swój dotalny kubłanski puć dale wjesć, kontakty k runje tak starym nawjazać a pomoc k přewinjenju trawmatiskich dožiwjenjow namakać. Köller je tež wědomostny direktor Leibnitzoweho instituta za pedagogiku přirodnych wědomosćow a matematiki.

Komisija, kotraž je ze 16 kubłanskimi slědźerjemi najwšelakorišich disciplinow wobsadźena, je wčera stejišćo k integra­ciji dźěći a młodostnych z Ukrainy předpołožiła. Gremij běchu loni załožili, zo bychu zwjazkowe kraje při dalšim wu­wiću kubłanskeho systema poradźowali. Naposledk běchu wo tym diskutowali, hač měli dźěći a młodostnych do němskeho kubłanskeho systema integrować abo po ukrainskim přikładźe kubłać.

Waršawa (dpa/SN). Po ruskim nadpadźe na Ukrainu je sej nimale 2,35 milionow ludźi do Pólskeje wućeknyło. Tole zdźěli pólski pomjezny škit we wčerawšej informaciji. Jeno póndźelu su po tym 21 000 ludźi z Ukrainy zličili. To je 22 procentow mjenje hač dźeń do toho. Z Pólskeje do směra na Ukrainu je po zahajenju wójny 24. februara něhdźe 364 000 ludźi mjezu překročiło. Pola tutych pućowacych jedna so po informacijach pomje­zneho škita přewažnje wo ukrainskich staćanow, kotřiž so do swojeje domizny nawróća. Mužojo, ale tež žony, chcedźa so tam ukrainskemu wójsku přizamknyć a přećiwo ruskim wojakam wojować. Druzy so nawróća, zo bychu so tam wo dźěći a hladanja potrěbnych starali.

Tuchwilu njeje žanych oficialnych informacijow, kelko wójnskich ćěkancow je w Pólskej wostało a kelko je hižo do druhich krajow EU dale jěło. Ukraina – po płoninje najwjetši kraj Europy, měješe do spočatka ruskeho nadpada 44 milionow wobydlerjow. Pólsku a Ukrainu zwjazuje wjace hač 500 kilometrow dołha statna mjeza. Nawal ćěkancow je w Pólskej hobersku žołmu pomocliwosće zbudźił.