Köln (dpa/SN). Wjacori prominentni kaž feministka Alice Schwarzer abo spisowaćel Martin Walser su w zjawnym lisće zwjazkowemu kanclerej Olafej Scholzej (SPD) apelowali, dalše ćežke brónje do Ukrainy njesłać. Ruskemu prezidentej Wladimirej Putinej njesměli žadynžkuli motiw za rozšěrjenje wójny na teritorij NATO dać. Tole móhło k Třećej swětowej wójnje wjesć. Cyłkownje 28 wosobinow je list podpisało. Putin je z nadpadom na Ukrainu ludowe prawo ranił, w lisće rěka. Tole pak njewoprawnja „riziko eskalacije wójny hač k atomowemu konfliktej“.

Kijew/Washington (dpa/SN). Ukraina dóstanje dale masiwnu podpěru z USA. Po tym zo je prezident Joe Biden připowědźił, zo chcył Kijewej dalše 33 miliardow dolarow (31,4 miliardow eurow) přewostajić, je kongres USA wotpowědny zakoń wobzamknył. Z nowej wersiju zakonja „Lend-Lease“ móža USA Ukrainje ale tež dalšim wuchodoeuropskim krajam spěšnje a njeběrokratisce wojersce pomhać. Ukrainski prezident Wolodymyr Zelenskyj so Washingtonej dźakowaše a rěčeše wo „wažnej kročeli“. W swojim wšědnym widejowym poselstwje dźakowaše so Zelenskyj prezidentej Joewej Bidenej kaž tež ameriskemu ludej za pomoc, kotruž kongres „nadźijomnje spěšnje“ přesadźi. Wot spočatka wójny su USA něhdyšu sowjetsku republiku z brónjemi a municiju w hódnoće 3,7 miliardow dolarow (něhdźe 3,5 miliardow eurow) podpěrowali. Z nowym zakonjom móža USA brónje a techniku we wulkich mnóstwach dodawać.

Podstupim (dpa/SN). Ludowemu požadanju přećiwo popłatkam za wutwar pěskojtych šćežkow w Braniborskej pobrachuje 25 000 podpismow podpěraćelow. Po zwěsćenym doskónčnym wuslědku su 55 141 płaćiwych podpismow Swobodnych wolerjow zličili, krajny wólbny nawoda Herbert Trimbach wčera w Podstupimje zdźěli. Za wuspěšne ludowe požadanje bychu aktiwisća znajmjeńša 80 000 podpismow znosyć dyrbjeli. Tak dyrbja wobsedźerjo ležownosćow w Braniborskej dale hač do 90 procentow kóštow přewzać, hdyž komuny pěskojte abo šotrowe šćežki před jich durjemi na dróhi wutwarja.

Swobodni wolerjo pokazuja po swojej poražce na ćeže při zběranju podpismow. Nimale cyłe poł lěta zběranja knježeše lockdown koronawirusa dla ze zawrjenymi radnicami. K tomu přińdźechu problemy w zarjadnistwach. Swobodni wolerjo sej žadaja, zo kraj kóšty za wutwar pěskojtych šćežkow přewozmje, su-li ludźo šćežki hižo do zjednoćenja Němskeje jako bydlenske dróhi wužiwali. W Braniborskej je podźěl pěskojtych dróhow přirunujo z druhim krajemi wosebje wulki.

Z nimale 300 km/h je so šofer w Bayerskej policajskej kontroli wuwinyć spytał. Jako zastojnicy spytachu, jeho na awtodróze A 8 pola Rosenheima zadźeržeć, 48lětny z 220 km/h dale jědźeše. Pozdźišo wotboči muž na A 93 a smaleše z nimale 300 km/h dale, byrnjež tam jenož 130 km/h dowolene byli. Krótko do mjezy k Awstriskej móžachu 48lětneho tola hišće zadźeržeć. Nětko dyrbi smaler ze skóržbu ličić.

Pěstowarske dźěći jako pomocnych policistow zasadźić chce policija w delnjosakskim Hamelnje. Hižo wjacore tydźenje bědźa so tam z wěcami, kotrež njeznaći na kolije kładu: nakupowanske wozy, wobruče abo drjewjane palisady. W měrcu je pjeć króć k zražkam ćahow dóšło. Nětko su dźěći bliskeje pěstowarnje prosyli, kolije wobkedźbować a pěstowarkam rjec, hdyž je jim něšto napadnyło.