Žane transporty zwěrjatow wjace
Podstupim (dpa/SN). Braniborska zakazuje wójny w Ukrainje dla transporty zwěrjatow do Ruskeje, Běłoruskeje a Ukrainy. Howjada, wowcy abo swinje njesmědźa wjace po tutych krajach transportować, dokelž njeje zastaranje skoćatow wjace zaručene. To je ministerstwo za škit přetrjebarjow dźensa w Podstupimje wukazało. Wokrjesy njesmědźa tuž tajke transporty wjace wuhotować. Jeničke wuwzaće je Kaliningradska kónčina.
„Z ruskim nadpadom a z tym zwjazanym njepřewidnym połoženjom njemóžemy ani za wěstotu šoferow ani skotu garantować, tež hdyž transporty snano ani direktnje po wójnskich kónčinach njewjedli“, zdźěli ministerka za škit přetrjebarjow Anna Heyer-Stuffer (Zeleni). Wójny dla dyrbja po posudku ministerstwa z tym ličić, zo mjezy krótkodobnje zawru a zo dóńdźe tam k njewočakowanym a přewšo dołhim čakanskim časam abo k zawrjenju zastaranskich centrumow. Nimo toho dyrbja z wobchadnymi ćežemi wojerskich kolonow abo na puću so hibacych ćěkancow dla ličić. Tuž njeje zaručene, zo transporty po najkrótšim puću swój cil docpěja.
To a tamne (12.04.22)
Hnydom cyły móst pokradnyła je cwólba paduchow w Indiskej. Něhdźe 18 metrow dołhu železnisku konstrukciju su w běhu třoch dnjow rozebrali a dźěle wotwjezli. Policija je wosom podhladnych zajała a w tym zwisku bager, 247 kilogramow železa a dalši material sćazała. Dźěle mosta běchu wikowarjam šrota předali.
Makabernu zběrku wulkich wutykanych zwěrjatow je španiska policija njedaloko Valencije namakała. Po wotpowědnym pokiwje podachu so zastojnicy k ležownosći w małym měsće Bétera z halemi a wulkej wilu: Tam wuhladachu 1 090 wutykanych elefantow, nosorohačow, běłych mjedwjedźow, lawow, leopardow a tigrow – nastajenych před kulisu afriskeje sawany. Je to najwjetša priwatna zběrka, kotruž su hdy w Španiskej namakali, policija zdźěla. Policija trochuje hódnotu na 30 milionow eurow.
Bamž na kupje Malta
Gharb/Valletta (B/SN). Nimale dwě lěće su wobydlerjo Malty na wopyt bamža Franciskusa korony dla čakali. Něhdźe 2 000 přewažnje młodostnych so na naměsće zhromadźi, zo bychu 85lětneho ze žołto-běłymi chorhojčkami a popowej hudźbu witali. Malta je štwórty najmjeńši kraj Europy a na lisćinje krajow z najwyšim podźělom katolskeho wobydlerstwa na druhim městnje, hačrunjež tež tu wustupy z cyrkwje přiběraja. Prezident Malty George Vella rěčeše při witanju bamža wo problemach kaž wo „chorym, mučnym a surowym planeće“ a wo „njepředstajomnych wójnach, ćěkanjach a migracijach“. Bamž jemu w dalokej měrje přihłosowaše, šwikaše pak tež problem korupcije na kupje a přeješe sej „nawrót k rozswětlenju ewangelija“.
Wobmyslenja k wopytej
Ministerka wo wodaće prosyła
Berlin (dpa/SN). Dosć emocionalny a njewšědny to wustup: Zwjazkowa swójbna ministerka Anne Spiegel (Zeleni) je za swój štyri tydźenje trajacy swójbny dowol po zapławjenskej katastrofje w dole rěki Ahr wo wodaće prosyła. Bywša wobswětowa ministerka Porynsko-Pfalcy wopodstatnja rozsud za dowol ze swójbnymi přičinami a z wulkim poćeženjom. „Bě zmylk, zo smy takle dołho do dowola jěli. Za to prošu wo wodaće.“ Do toho bě sej mjez druhim předsyda CDU Friedrich Merz jeje pušćenje ze zastojnstwa žadał.
Za wukaz zajeća přećiwo Putinej
Ascona (dpa/SN). Bywša hłowna wobskóržbnica UNO Carla Del Ponte je swoje žadanje potwjerdźiła, mjezynarodny wukaz zajeća přećiwo ruskemu prezidentej Wladimirej Putinej wobzamknyć. Putina móža drje hakle před Mjezynarodny chłostanski tribunal stajić, hdyž njeje hižo w zastojnstwje, tola justica je sćerpna. Złóstnistwa njezalětnjeja a Putin njewostanje wěčnje prezident, wona rjekny. Del Ponte bě hłowna wobskóržbnica w procesach złóstnistwow w Juhosłowjanskej.
Spjećuja so namjetej
We wjacorych městach Němskeje – kaž tule w Hannoveru – je ...
Pjenjezy EU za ćěkancow
Za dalšu pomoc
Macron a Le Pen hišće raz nastupitaj
Paris (dpa/SN). W Francoskej dyrbitaj prezident Emmanuel Macron a toho kontrahentka, prawicarska kandidatka Marine Le Pen do rozsudneho wólbneho koła prezidentskich wólbow. Tole je nutřkowne ministerstwo wčera wječor po wuličenju nimale wšitkich hłosow zdźěliło. Po tym je Macron ze 27,4 procentami wólby dobył, Le Pen ma 24,3 procenty. Politikar Lěwicy Jean-Luc Mélenchon je sej z 21,3 procentami třeće městno zdobył. Po tym amtěrowacy statny šef a Le Pen 24. apryla přećiwo sebi nastupitaj. Prawicarski ekstremist Éric Zemmour bě sej ze 6,9 procentami wjace hłosow zdobył hač konserwatiwna Valérie Pécresse, kiž nima wjace hač 4,8 procentow. Socialistiska kandidatka Anne Hidalgo dósta runje 1,7 procentow, kandidat Zelenych Yannick Jadot dósta 4,4 procenty.
Francoski statny šef ma daloko sahace prawa a je na pjeć lět woleny. Něhdźe 48,7 milionow Francozowkow a Francozow bě we wolerskich lisćinach zapisanych. Wólbne wobdźělenje wučinješe po prěnich wozjewjenjach 74,0 procentow.
„Wšitko činić, štož je móžne“
Awstriski zwjazkowy kancler Nehammer pola ruskeho prezidenta Putina
Wien (dpa/SN). Awstriski zwjazkowy kancler Karl Nehammer chcyše so dźensa w Moskwje z ruskim prezidentom Wladimirom Putinom zetkać. Nehammer je tak třeći zapadny politikar, kiž je so po wudyrjenju wójny k Putinej do Moskwy podał. Konserwatiwny knježerstwowy šef bě wčera wječor zjawnosć wo swojich planach informował, zo chcył z Putinom wo móžnym skónčenju wójny rěčeć. Rěčnik Krjemla Dmitrij Pjeskow je krótko po tym wobkrućił, zo je zetkanje wobeju politikarjow dźensa popołdnju w Moskwje planowane.
Hłowny zaměr jězby k Putinej je zarjadowanje humanitarnych pasmow, po kotrychž móhli ludźo wójnske kónčiny wopušćić, přiměr a dospołne wotkryće wójnskich złóstnistwow. Ukrainske knježerstwo wočakuje přichodne dny „wulku bitwu“ na wuchodźe kraja. Tuž je jara wažne, tajke pasma zarjadować. Nimo toho Nehammer rjekny, zo chcył dialog mjez Ukrainu a Ruskej spěchować. Wón nochcył Putinej „moralisce neutralnje“ napřećo stupić. „Rěčeć njerěka, so swojich pozicijow wzdać, nawopak, ja jemu swoju rjeknu.“
