Sakski ministerski prezident za mudre wobchadźenje z Ruskej

Drježdźany (dpa/SN). Sakski ministerski prezident Michael Kretschmer (CDU) je wójnu Ruskeje přećiwo Ukrainje z jasnymi słowami zasudźił, zdobom pak namołwjał z Ruskej mudrje wobchadźeć. „Ruska tež po wójnje dale eksistuje“, ­rje­kny premier wčera w swojej knježer­stwowej deklaraciji w Sakskim krajnym sejmje. Za mudre wobchadźenje pak stej sylna Europska unija a NATO trěbnej. Ruska wostanje wojerska supermóc a kraj, kotryž drje so tež přichodne lěta na „čistu demokratiju“ njewuwije. „Najebać to dyrbimy z tym wobchadźeć.“

Při tym njeńdźe wo Rusowki a Rusow abo ruski lud, ale wo jich prezidenta, kiž kraj zhromadnje z oligarchami a gene­ralemi wobknježi, Kretschmer rjekny. „Naprawy přećiwo wójnskim złóstnikam su jedna strona. Na tamnym boku njesměmy ruskich staćanow chłostać. Na polu měšćanskich partnerstwow, wědomosćow a ciwilnych partnerstwow dyrbi wuměna dale wobstać“, sej wón žadaše.

Brüssel (dpa/SN). Zo bychu tomu zadźěwali, zo hišće wjace ludźi na swěće hłód trada, měli ratarjo w Europskej uniji płoniny wužiwać směć, kotrež su poprawom za přirodoškit předwidźane. Tam měli přichodnje žiwidła a picu plahować, zo bychu produkciju rozšěrili, je komisija EU wčera zdźěliła. Nimo toho chce EU rata­rjow z nimale 500 milionami eurow podpěrać. Tak chcedźa zaručić, zo so přiběrace płaćizny za bencin a hnojiwa negatiwnje za wěstotu zastaranja ze žiwi­dłami njewuskutkuja.

Ratarjow, kotřiž naslědnje produkuja, měli prěnjorjadnje spěchować. Ruskeho nadpada na Ukrainu dla boja so zahubnych sćěhow předewšěm w chudych kra­jach­, žita dla. Ukraina a Ruska stej wažnej producentaj žita. Wobaj krajej dodawatej po informacijach EU 34 procentow wšeho žita na swětowych wikach.

Wobswětoškitarjo a politikarjo SPD a Zelenych kritizuja, zo je naprawa na wopačnym městnje zapołožena. Wunoški na přidatnych ratarskich płoninach su skerje snadne. Lěpje by było přestrjenje za plahowanje žiwidłow wužiwać a nic za picu, štož 70 procentow wučinja.

Rozžohnowanje nježenjenca je njedaloko Mnichowa zasadźenje policije zawiniło a samo specielne zasadźenske komando alarmowało. Zakukleni mužojo běchu do toho nježenjencej měch přez hłowu sćahnyli, zo móhli jeho na Mallorcu „za­wlec“. 80lětny bě to wobkedźbował a policiju zawołał. Zastojnicy awto na Mnichowskim lětanišću zadźeržachu a zwěsćichu, zo jedna so wo žort. Tón wšak móhł so jako wjacore tysacy eurow drohi wukopać. Lětadło su mužojo hišće docpěli.

Na ponyju je 15lětna holca do kupnicy žiwidłow w sewjerorynsko-westfalskim Attendornje jěchała. Jako so wona pola přistajeneje wobhoni, hač smě kóń sobu nutř, so tón wolóži, zawostajejo swoje kutle we wotrjedźe sadu a zeleniny. Nimo toho storči do wahi a ju wobškodźi. Po wuměnje personalijow smědźeše holca z ponyjom domoj hić.

Drježdźany (dpa/SN). Sakski ministerski prezident Michael Kretschmer (CDU) je dźensa w krajnym sejmje knježerstwowu deklaraciju k wójnje w Ukrainje podał. W stejišću pod hesłom „Swoboda a měr stej najwažnišej kuble – suwerenu Ukrainu podpěrać“ wón nadpad Ruskeje na susoda zasudźi, přilubjejo Ukrainje solidaritu Sakskeje. Kretschmer chwaleše tež wulku zwólniwosć ludźi w Sakskej, ukrainskich ćěkancow přiwzać.

Płaćizny energije wobmjezować

Brüssel (dpa/SDN). Hladajo na raznje přiběrace płaćizny energije planuje komisija EU rjad nuzowych naprawow za čłonske kraje Europskeje unije. Tak chcedźa hornje hranicy płaćiznow wukazać a płun zhromadnje nakupować, zo bychu rabat wuzbytkowali. To wuchadźa z dokumenta, kotryž chcychu w běhu dnja w Brüsselu schwalić. Wuraznje na to pokazuja, zo nimaja žadyn idealny srědk a zo maja wšitke planowane naprawy lěpšiny a njelěpšiny.

Wichory sej wopory žadali