Drježdźany (dpa/SN). Policija je připowědźiła, zo chcyła nowy zakaz nožow na sakskich hodownych wikach kontrolować. Po tym dyrbja wopytowarjo z tym ličić, zo zastojnicy toše a nachribjetniki přepruwuja a tež wosoby bjez wosebiteje přičiny přepytuja. Tole zdźěla sakske nutřkowne ministerstwo. Zakazane wěcy policisća sćazaja. Nimo móžnych chłostanskich jednanjow hroža pjenježne pokuty hač do 10 000 eurow. Štóž sej na wikach nóž kupi, dyrbi jón w originalnym zapakowanju transportować.

Zakaz potrjechi zasadnje wšitke družiny a tuž tež kapsne nože. Wuwzaći su rjemjeslnicy kaž tež wuchowarjo. Při wšěm zwjazkowy kriminalny zarjad zdźěla, zo nimaja konkretnych pokiwow na móžne wohroženja hodownych wikow a dohodownych zarjadowanjow.

Naprawy su dźěl noweho zakonja wo brónjach k polěpšenju nutřkowneje wěstoty. Po tym zo bě zakoń po schwalenju w zwjazkowym sejmje w oktobrje płaćiwosće nabył, je jón sakske krajne knježerstwo nětko z wukazom přesadźiło.

Sakski ministerski prezident prócuje so dale wo mjeńšinowe knježerstwo

Drježdźany (dpa/SN). Sakski ministerski prezident Michael Kretschmer nochce so po wólbach zwjazkoweho sejma znowa wusměrić a snano tola do Berlina woteńć. W rozmołwje ze žurnalistami Süddeutsche Zeitung wotmołwi politikar CDU na prašenje, hač zwjazkoweho ministra Kretschmera po wólbach wuzamkuje: „Haj. Bych so jara wjeselił, bychmy-li koaliciske jednanja w decembru zakónčić a nowe knježerstwo wutworić móhli.“ CDU a SPD so wo to prócujetej, mjeńšinowe knježerstwo wutworić.

Kretschmer w tym zwisku znowa zhromadne dźěło w AfD wuzamkny, byrnjež knježerstwo CDU a SPD w krajnym sejmje na hłosy opoziciskich stron pokazane było. „Z tymi njebudźe žanoho zhromadneho dźěła. To su ludźo, kotřiž našemu krajej zeškodźa, rjekny 49lětny hladajo na AfD. Zdobom pak je trjeba, z nimi rěčeć, „dokelž so jim tak nimbus martrarstwa bjerje“.

Prašenje za přichodom serbskeje narodneje drasty pači ludźi. K 150. jubilejej schadźowanki namołwještaj režiseraj Katka Pöpelec a Syman Hejduška, w narodnej drasće pak tradicionalnje pak w kreatiwnej, modernej formje być. Někotři přeću sćěhowachu, tola wjetšina preferowaše normalnu wječornu garderobu. To pokazuje: Drasta polarizuje. Wšitko dźe z časom, tola płaći to tež za našu narodnu drastu? Nowe kreacije móhli snano při tym pomhać, ju zaso do wšědneho dnja integrować. Runočasnje wobsteji pak wulki strach, zo zhubi so přez wotměnu prěnjotny charakter drasty a z tym tež wulki podźěl toho, štož nas Serbow wučinja. Balansu mjez wobchowanjom a modernymi kreacijemi namakać wostanje wužadanje – je pak tež šansa, zo stanje so narodna drasta ze žiwym dźělom serbskeje identity, město toho zo je relikt zašłosće. Jubilej dopokaza, zo je wšelakorosć drasty na kóždy pad pisana a wotměnjawa. Vanessa Žurec

Wulět 13lětneje z awtom kubłarki z domu młodźinskeje pomocy w Porynsko-Pfalcy je so bjez škody skónčił. Jězdźidło, w kotrymž bě młodostna hišće dweju hólcow w starobje wosom a jědnaće lět sobu wzała, wosta z techniskej panu na dróze stejo. Swědkej awto „z třomi dźěćimi“ napadny. Policisća dowjezechu wobsadku zaso do dźěćaceho domu. Klučik awta bě 13lětna z kabata kubłarki wzała.

Wopiteho šofera nakładneho awta ze strašnej maćiznu je policija we wuchodnej Sakskej lepiła. Nakładne awto bě zastojnikam w tunlu pod Limasom napadnyło, dokelž tam z tutym strašnym wjezwom poprawom scyła jěć njesmědźeše. Při kontroli policisća pola 43lětneho šofera wóń alkohola zwěsćichu. Test wunjese 1,44 promilow. Muž njesmědźeše dale jěć. Jemu hroža konsekwency, dokelž je jemu alkohol dospołnje zakazany.