Wćipnosć je ludźi w Radworju sobotu wječor na žurlu hosćenca „Meje“ na nazymski koncert ze spěwnej skupinu Jarobinka přiwabiła, wšako bě to prěni wustup žónskeho chóra we wsy. Na kóncu přesahowaše překwapjenje hladajo na to, štož so jim poskići. Wosom žonow pod nawodom Walburgi Wałdźic zanjese spěwy ze srjedźneje a Delnjeje Łužicy. Štož hnydom napadny, bě wěstota spěwarkow: za projektowy chór, kotryž wobsteji runje štyri lěta a kiž jónu wob lěto zwučuje, bě to wuběrny wukon. Přał bych sej wjace informa­cijow wo tutym zajimawym ćělesu. Wosom spěwarkow a wuběrnje přewodźacu huslerku skrótka předstajić, časowy ramik koncerta tež přežadał njeby.

Na kóncu zwosta debata wo hudźbnym wusměrjenju chóra, kiž wěnuje so bolosćam pod sćěhami brunicy ćerpjaceho dźěla Łužicy a kiž njewuprudźa žiwjensku radosć kaž druhe serbske skupiny. Jarobinka wostanje zajimawy dypk serbskeho hudźbneho žiwjenja. Marko Wjeńka

Mnichow (dpa/SN). Bayerski wobchadny minister Christian Bernreiter (CSU) sej žada, zo zwjazkowe knježerstwo kóšty za cyłoněmsku jězdźenku dołhodobnje stoprocentowsce přewozmje. „Z wida Bayerskeje dyrbi Zwjazk kóšty dospołnje přewzać, wšako bě němski tiket, kaž mjeno hižo praji, přeće Zwjazka“, Bernreiter rjekny. Wón spjećuje so z tym předsydźe CDU a kanclerskemu kandidatej CDU/CSU Friedrichej Merzej. Tón bě rjekł, zo je regionalny wobchad w Němskej w prěnim rjedźe nadawk zwjazkowych krajow. Zwjazk je drje zamołwity, jězdźenku ­sobu financować. Njeje pak winowaty, ­wšitko sam zapłaćić, tak Merz.

Za 2025 je financowanje tiketa zaručene, po tym zo bě so frakcija CDU/CSU zwólniwa wuprajiła, při rozrisanju sobu dźěłać. W druhej połojcy decembra chcedźa wo tym w zwjazkowym sejmje wothłosować. „Chcemy, zo tajke něšto kaž cyłoněmsku jězdźenku zachowamy“, rjekny Merz po wurjadnym posedźenju frakcije CDU/CSU w Berlinje. Jednanja wo financowanju pak budu „chětro wob­ćežne“. Tuchwilu płaći stat połojcu, štož wučinja 1,5 miliardow eurow wob lěto.

Kamjenc (BG/SN). Hnujace zarjadowanje dožiwili su wobdźělnicy knižneje prezentacije minjeny štwórtk w žurli Kamjenskeje radnicy. Kružk awtorow Łužiskeho almanacha z. t. bě na wopominanske zarjadowanje z prezentaciju knihi přeprosył. Žurla bě hač na poslednje městno wobsadźena, jako Norbert Schnabel, předsyda towarstwa, po hudźbnym powitanju k pultej stupi.

W jimacych słowach rysowaše wón stawizny Łužicy mjez 1933 a 1945 a hrózbu wonych lět. Za so tole njezabudźe, za to zasadźa so towarstwo wot swojeho załoženja. Čłonojo podawki swědomiće rešeršuja a předźěłaja, wužiwajo pisomne dopomnjenki a zapiski archiwow. Kóžde lěto wuchadźeja wotpowědne publika­cije. Lětsa prezentuja wurjadne wudaće Łužiskeho almanacha VI, kotryž podawki wójnskich lět zjima. W tymle času je so tež Łužica z bitwišćom a smjertnym pasmom stała.

Swojoraznu wellness je sej nošna kruwa w Jendźelskej popřała. Wona zabłudźi so do płuwanskeho basenka na priwatnej ležownosći a njemóžeše so sama wjace wuswobodźić. Dospołnje překwapjeny wobsedźer wołaše wohnjowu woboru. Ta wotpušći pool a zwěrjo z pasom wućahny. Skótny lěkar zwěsći, zo stej kruwa a jeje njenarodźene ćelo strowej.

Honjeńcu z policiju je sej 15lětny mopedist w Rudnych horinach dowolił. Wobsadka policajskeho awta bě dweju mopedistow zadźeržała. Jako zastojnicy z awta wulězechu, jedyn z njeju na chětro riskantne wašnje wotjědźe. Policisća młodostneho přesćěhowachu. Dyrbjachu pak so toho wzdać, jako moped na wuskich chódnikach ćěkaše. Zastojnicy pak běchu sej čisło napisali a wočakowachu 15lětneho doma. Po prěnim přepytowanju steješe wón pod wliwom cannabisa. Wón dyrbi z čućiwej pokutu ličić.