To a tamne (17.01.23)

wutora, 17. januara 2023 spisane wot:

48lětny Londonski policist je so před tamnišim sudnistwom winy w dohromady 48 padach wumocowanja kaž tež druhich njeskutkow wuznał. Po zdźělence britiskeje powěsćernje PA je wón hižo před 20 lětami žonu zawlekł a wjacekróć wumocował. Hakle nazymu lěta 2021, po tym zo bu wobskorženy, jeho Londonska policija ze słužby pušći.

Hubjenych wjedrowych prognozow a mało sněha dla dyrbjachu organizatorojo za kónc januara planowane alpinske wubědźowanja w Garmisch-Partenkirchenje wotprajić. Předań zastupnych lisćikow běše derje zaběžała. „Wupad je za nas sportowy a hospodarski dezaster,“ praji Martina Betz, nawodnica organizaciskeho teama, powěsćowej agenturje dpa.

To a tamne (16.01.23)

póndźela, 16. januara 2023 spisane wot:

Po ćežkim njezbožu lětadła w Nepalu z wjacorymi dźesatkami mortwymi wuchowanske jednotki dale pytaja. Wot cyłkownje 72 pasažěrow su dotal 66 ćěłow w rozpadankach namakali a k identifikaciji do chorownje dowjezli. Mašina nepaleziskeje Yeti Airlines znjezboži njedźelu rano na něhdźe połhodźinskim lěće mjez stolicu Kathmandu a druhim najwjetšim městom Pokhara wosrjedź přizemjenja. Přičiny njezboža njejsu tuchwilu znate dokelž Blackboksu hišće namakali njejsu, praji koordinator wuchowanskich jednotkow.

Po třoch lětdźesatkach přesćěhanja poradźi so póndźelu specialnym jednotkam italskeje policije skónčnje Mattea Messina Denara, šefa sicilskeje Cosy Nostry, zajeć. Wón přebywaše w priwatnej klinice w Palermje, hdźež chcyše so lěkować dać.

To a tamne (13.01.23)

pjatk, 13. januara 2023 spisane wot:

Dla hada we wobjedźe dyrbjachu minjenu póndźelu 20 dźěći we wuchodoindiskej šuli do chorownje. Mortwy reptil su w sudobju ze čóčkami namakali, kotrež buchu dźěćom z rajsom serwěrowane, zdźělichu zarjady w distrikće Birbhum w zwjazkowym staće Westbengalen. Jedne z dźěći so hišće lěkuje, jeho staw pak njeje žiwjenjastrašny. Wo kotry had so jedna, njejsu wozjewili.

Wulke dźěle kozy w kófrje pućowaceho je cłownistwo na Mnichowskim lětanišću namakało. Mjaso – 16 kilo z nopami, nutrinami a nohami – bě jako dar zapakowane a njechłódźene, kaž cłownistwo dźensa rano dźěli. Tute pak njebě prawidłow zwěrjaceje mrětwy dla dowožowanja kmane a so tuž sćaza a na kóšty 36lětneho wobsedźerja, kotryž bě z Kameruna po puću, zniči. Podawk sta so hižo spočatk lěta, bu pak hakle nětko znaty.

To a tamne (12.01.23)

štwórtk, 12. januara 2023 spisane wot:

Jědojtu rohowu wiperu nańdźechu wobydlerjo wjaceswójbneho domu wčera w pozaarskim měsće Schiffweiler. Prawdźepodobnje wobsedźer hada dlěje wjace doma był njeje. 16 wobydlerjow dyrbješe twarjenje na to wopušćić, zo bychu za­sadźenske mocy dalše zwěrjata pytać móhli. Po prěnich podaćach namakachu dalšeho jědojteho hada a wjacore po­wšěm zdaću tohorunja jědojte pawki.

Dokelž so za popularnu hólču hudźbnu skupinu BTS z Južneje Koreje zahorjatej, stej dwě 13lětnej holcy z Pakistana chcyłoj so do Južneje Koreje podać. Policija jeju při tym popadny. Po jeje informacijach běštej so holcy nadźijałoj, swojeju pop-idolow zetkać. Skupina ma w Pakistanje wjele fanow. W konserwatiwno-muslimskim Pakistanje płaći spěwanje a rejowanje žonow w zjawnosći na mnohich městnach hišće jako njepřistojne.

To a tamne (11.01.23)

srjeda, 11. januara 2023 spisane wot:

W Bochumje je žona žiwjenje přisa­dźiła, jako so wutoru wječor jeje dom njenadźicy sypny. Po wjacore hodźiny trajacym slědźenju běchu ju wuchowanske jednotki w rozpadankach namakali. Druha wosoba je přežiwiła a so sama wuswobodźiła. Po prěnich dopóznaćach policije běše eksplozija přičina njezboža. Dwuposchodowy wjaceswójbny dom je dospołnje zničeny.

17lětny šuler je prawdźepodobnje swoju 55lětnu wučerku wutoru popołdnju w měsće Ibbenbüren w rjadowni swojeje powołanskeje šule z nožom morił. Po słowach statneho rěčnistwa je šuler po swojim njeskutku sam policiju telefo­nisce informował a so bjez spjećowanja zajeć dał. Druzy we wokomiku nadpada w rjadowni njeběchu. Přepytowanja běža. K motiwam njeskutka nochcyše zastupjer statneho rěčnistwa hišće ničo rjec.

To a tamne (10.01.23)

wutora, 10. januara 2023 spisane wot:

Dokelž je na nuzniku w lětadle kurił, bu pasažěr při njeplanowanym mjezypřizemjenju w Hannoveru z lětadła wjedźeny. 33lětny je po starće w Hamburgu namołwu přistajeneje ignorował a swoju cigaretu dokurił, zdźěli wčera zwjazkowa policija. Potajkim bu jemu k zahubje, zo bě lětanska towaršnosć rozsudźiła, w Hannoveru přizemić. Tam je mjenujcy lěta­dło techniskich problemow dla wupadnyło. Poprawom měli w Hannoverje pasažěrojo šmórnjeneho lěta přistupić, zo móhli dale do Turkowskeje lećeć. Tola pilot z Hamburga wuzamkny tež kurjaka.

Njewšědne městno je sej njeznaty w Hannoveru wupytał. Elektriski roler wisaše wčera něhdźe dźesać metrow ­wysoko na wuhenju kupnicy. Za wupožčowarja, Berlinske předewzaće Tier, je to pad wandalizma.

To a tamne (09.01.23)

póndźela, 09. januara 2023 spisane wot:

Pjany šofer je sej na křižowanišću w Šwikawje za wodźidłom wusnył. Policisća su 35lětneho na pózdnim pjatku wječor wubudźili, policija zawčerawšim zdźěli. Dokelž w awće za alkoholom wonješe, zastojnicy šofera dokładnišo přepytachu. Prěni test pokaza 1,76 promilow. 35lětny dyrbješe hišće samsny wječor swoju jězbnu dowolnosć wotedać.

W lódzymnej wodźe pod hołym njebjom wosrjedź japanskeho milionoweho města Tokija su dźesatki ludźi Bohow wo strowotu prosyli. Něhdźe štyrceći muži we wosebitych falach a běłych pasach wokoło čoła kaž tež žony w běłym płašću su do wody zalězli a swoje próstwy wótře wołajo přednjesli.

To a tamne (06.01.23)

pjatk, 06. januara 2023 spisane wot:

Pjećlětny je so w Bayerskej sam na wulku jězbu podał – a z tym zasadźenje policije zawinił. Kaž policija wčera zdźěli, přizjewi so zawčerawšim zadwělowana mać z Nördlingena. Jeje syn je so při hrajkanju ze štyrilětnym přećelom zhubił. Policija na to za hólcom z helikopterami, trutami a psyčej staflu pytaše. Něhdźe dwě hodźinje pozdźišo namakachu zastojnicy zwjazkoweje policije hólca při dwórnišću w něhdźe 35 kilometrow zdalenym Aalen. Hólčec je sej z ćahom tam dojěł.

W Japanskej móža dźiwje ptački w zymje w swójskim hosćencu chłóšćić. Před tafličku z japanskim napisom „hosćenc dźiwich ptačkow w zymje“ w přirodoškitnym centrumje prefektury Fukui je „hosćom“ bifej ze słónčnymi róžemi přihotowany, zdźěli dźensa rěčnik centruma. Hłódne ptački přileća z wokolnych horow, kotrež su tuchwilu zasněžene.

To a tamne (05.01.23)

štwórtk, 05. januara 2023 spisane wot:

Durje mjeńšeho lětadła su minjeny pjatk „z njebjes“ do zahrody socialneje stacije w Meckenbeurenje při Bodamskim jě­zoru (Baden-Württembergskej) padnyli. Elektroniski system lětadła je pilota wo wopačnej funkciji durjow hišće do starta informował, policajska rěčnica rozłoži. 45lětny pak je signal ignorował a wot ­bliskeho lětanišća Friedrichshafen star­tował. Na zbožo so nichtó zranił njeje.

Hižo dwójce buchu dźěle čarow Mnichowskeho lětanišća zawrjene, dokelž bě tam psyk z mjenom „Sammy“ po puću, policija zawčerawšim zdźěli. Sammy pochadźa z wukraja, hdźež běše na dróhach žiwy. Póndźelu chcyše jeho nowa wobsedźerka na lětanišću wotewzać, ale psyk je so wuswobodźił a zminył.

To a tamne (04.01.23)

srjeda, 04. januara 2023 spisane wot:

Krótki čas bě něhdyši kanclerski kandidat CDU Armin Laschet na wulkim plakaće w aktualnym Berlinskim wólbnym boju wo dom zapósłancow widźeć. Wčera je to pasantam a šoferam awtow w Berlinskim wobwodźe Steglitz-Zehlendorf napadnyło. Krótko po tym bu plakat zaso wotstronjeny. Za to je tam nětko stary plakat z nětčišej zwjazkowej wonkownej ministerku Annalenu Baerbock připrawjeny. Za darmotne wabjenje je wona zawěsće jara dźakowna. Kotry plakat na tele městno woprawdźe słuša, znate njeje.

Šwicarski cłownik so njemało dźiwaše, jako při kontroli jězdźidła na hranicy k Němskej dźewjeć dorosćenych a 14 dźěći w jednym jězdźidle naliči. Wulkoswójba chcyše do Berna, policija wčera zdźěli. Tola hromadźe dale jěć njesmědźachu.

Serbska debata

nowostki LND