To a tamne (21.11.22)
Krótko do zahajenja koparskich mišterstwow w Kataru chce hosćićel kompletny zakaz alkohola kołowokoło stadijow přesadźić. Strategija k wudawanju alkohola ma so znowa změnić, we wobłuku wosom stadijow nima so za čas hrow piwo předawać, rozprawja britiska nowina „The Times“. Rozsud su minjeny pjatk něhdźe 48 hodźin do zahajenskeje hry WM mjez hosćićelom Katarom a Ekuadorom oficialnje wozjewili.
Loni na Berlinskich Gendarmowych wikach pokradnjene a zaso našłe bože dźěćatko so zaso na tamniše hodowne wiki nawróći. Tónraz pak postawu lěpje škitaja. Drjeworězbar Ernst Kraus z Oberammergauwa je ju z rjećazom zawěsćił. Boži narodk z dźěćatkom budźe tónraz we wobłuku zachoda postajeny, hdźež změje wěstotny personal stajnje wóčko na dźěćatko. Něhdźe 50 centimetrow wulka a tři kilogramow ćežka figura je po informacijach wobsedźerjow 3 000 eurow hódna.
To a tamne (18.11.22)
Po sudniskim wusudźe smědźa kruwy na pastwje w hornjobayerskej wsy dale zwónčki nosyć. Skóržbu susodow přećiwo ratarjej w Greilingu hary dla je hamtske sudnistwo we Wolfratshausenje wotpokazało, rěčnica wčera zdźěli. Zo móhli sudnicy zwadu mjez burom a mandźelskimaj hódnoćić, dyrbješe mjez druhim fachowc posudk zdźěłać. Wón dyrbješe wujasnić, hač sylnosć zwuka kruwjacych zwonow hraničnu hódnotu dodźerži abo hač njesmědźa hižo wšitke kruwy zwony nosyć.
Pomału wočinjace so durje wobchoda su we westfalskim Beverungen ćěkaceho paducha chětro njenahladnje zadźerželi. 21lětny bě minjeny wutoru w kupnicy cigarety do swojeje toboły tyknył. Tola sobudźěłaćer bě wšo wobkedźbował, štož paduch pytny a ćekny. Tak spěšnje kaž wón pak awtomatiske durje wobchoda njeběchu. Z wotmachom prasny do pomału so wotewrjacych duri a padny.
To a tamne (17.11.22)
Na ćěkańcy před policiju je so pozdatny zadobywar na ležownosći druheho hamtskeho sydła zwjazkoweho prezidenta Franka-Waltera Steinmeiera w Bonnje schował. Krótko po tym začuwaše 28lětny, zo njeje to runjewon najlěpša ideja. Wila z wulkej zahrodu je jedna z najlěpje wobstražowanych imobilijow w Němskej. Tak traješe tež jenož mało mjeńšin, doniž zwjazkowa policija muža w nocy na minjeny pjatk njenańdźe a njezaja.
Krótko do kónca časa w jastwje měješe 26lětny hižo lóšt na swobodu a chcyše karnewal swjećić. Potajkim je wón přiležnosć wužił, jako smědźeše jastwo 11. nowembra raz wopušćić, a so w Euskirchenje wotsadźi. Po někotrych dnjach přizjewi so dobrowólnje pola policije a poda, zo budźe zbytnych 28 dnjow swojeho chłostanja wotsedźeć. Kotre sćěhi karnewalowa party za njeho změje, njeje hišće jasne.
To a tamne (15.11.22)
To a tamne (14.11.22)
Z pomocu zadka su so wjeseli Japanjenjo při hajenju nałožka „popo-sumo“ w „rićnym sumje“ měrili. Na nócnym swjedźenju w prefekturje Shizuoka spytaštaj při tym stajnje dwaj kontrahentaj na myjnym čworje stejo ze zadkom so mjezsobu dele storčić, kaž japanski dźenik „Tokyo Shimbun“ sobotu wozjewi. Dobyćerka lětušeho „rićneho“ wubědźowanja bě dźesaćlětna šulerka.
Na ćěkańcy před přistajenymi wobchoda je pozdatny paduch swój nachribjetnik zawostajił, w kotrymž běchu pjenjezy, pućowanski pas a jězbna dowolnosć. Jako chcyše muž kupnicu w bayerskim Ambergu wopušćić, je wěstotna připrawa reagowała, policija wčera zdźěli. Přistajena jeho narěča, wón přepoda jej nachribjetnik a ćekny. Dokelž pak njeběchu w nachribjetniku žane pokradnjene wěcy, měješe wón twory najskerje při ćěle. Namakane papjery słušeja 35lětnemu. Policisća wzachu nachribjetnik zawčerawšim sobu na rewěr, hdźež móže sej jón wobsedźer wotewzać.
To a tamne (11.11.22)
Wosebity swětowy rekord docpěštaj wčera mužej w Hamburgu, jako rozbištaj kokosowe worjechi a napojowe tyzki. Tři nowe swětowe rekordy buchu tak w hanseatiskim měsće nastajene, zdźěli Němski institut rekordow, kotryž płaći jako němskorěčny pendant ke „Guinnessowej knize rekordow“.
Město Köln dźěli so wot hoberskeho přestrjenca, na kotrymž staj w 1960tych lětach na swjatočnych přijećach w radnicy Queen Elizabeth II. kaž tež prezident USA John F. Kennedy stałoj. Nětko ma awkciski dom přestrjenc 17. nowembra přesadźić.
To a tamne (10.11.22)
Štóž je lózy, njeje witany: Hamburgska Reeperbahn je sej nowe hesło dała. Za wopytowarjow štwórće płaći předewšěm prawidło: Štóž chce tu wjeselo měć, dyrbi „Luby być!“, zdźěli kwartěrowy management BID Reeperbahn srjedu w Hamburgu. Pozadk kampanje je, zo bě w zašłym času po cyłym Zwjazku wjacekróć k rasistiskim, homofobnym a seksualnym nadpadam dóšło.
Swój stolětny jubilej swjeći jedyn z najsławnišich lětanskich čołmow swěta. Lětadło „Wal“ firmy Dornier startowaše před 100 lětami swój prěni lět, kaž rěčnik Dornieroweho muzeja w Friedrichshafenje rozłoži. Wosebitosć na lětanskim čołmje je, zo je koncipowany za startowanje a přizemjenje na wodźe. Tehdy bě najwjace městow přez wodu docpějomnych.
To a tamne (09.11.22)
W Indiskej je wosomlětny hólc po medijowej rozprawje jědojtu kobru kusnył, kotraž je na to zemrěła. Had bě so wokoło jeho ruki zwił a kusnył, na čož měješe hólčec wulke bolosće. Jako njeje so had hibał, je wón dwójce kruće do njeho kusnył, kaž rozprawja. Swójba hólca je jeho po podawku do chorownje dowjezła, hdźež dósta napřećiwny jěd. Wón so spěšnje zhraba, dokelž jednaše so na zbožo wo suchi kus, pola kotrehož had žadyn jěd njerozpušći. Tajke kusnjenja su drje bolostne, symptomy pak su potom lokalne.
Z pomocu nalěpkow poskićeja dealerojo w Amsterdamje mjeztym swoju tworu. Zajimcy trjebaja jenož QR-code zaskenować a hižo maja „menijowu kartu“ ze syntetiskimi drogami, ale tež z kokainom a konopju na swojim šmóratku. Předewšěm kołowokoło barow, klubow a kofejownjow su nalěpki připrawjene.
To a tamne (08.11.22)
Transporter z wodźerjom je so w Karlsruhe do rěčki sunył, na čož bě muž w nocy na póndźelu wjace hač pjeć hodźin w jězdźidle zajaty, wohnjowa wobora a policija zdźělištej. Muž bě transporter wječor na parkowanišću wotstajił a zabył, ručne borzdźidło přićahnyć. W nakładowarni spicy wón wosrjedź nocy pytny, kak so transporter do rěčki suwaše.
Stupaca mórska hładźina, suchota a horcota změja tež za město Hamburg sćěhi. Tamniša měšćanska železnica je tuž składnostnje swětoweje klimoweje konferency zastanišća nachwilnje přemjenowała. A tak přistupja ludźo na přikład w Seychellingenje město Stellingenje abo w Kuala Schlumpurje město Schlumpje.
To a tamne (07.11.22)
W Japanskej bu policist dla delikta přećiwo druhemu zastojnikej zajaty. Kaž japanske medije dźensa wozjewichu, je wobchadny policist za čas słužby priwatne awto kolegi pokradnył a wikowarjej předał. Wěstotna kamera bě to připadnje natočiła, tak zo móžachu pad rozrisać.
Pjany muž je w sewjerohessenskim Eschwege starušku w jeje bydlenju chětro nastróžił. Tak njebě 34lětny na dompuću zawčerawšim rano swójski dom spóznał. Dokelž swój kluč njenamaka, rozbi wón škleńcu durjow bydlenja, hdźež 78lětna žona sama bydli. Tuta poćerpi šok a sej přiwšěm zwaži zadobywarja narěčeć, jako chcyše so pola njeje lehnyć. Muž ma nětko z chłostanskim jednanjom kaženja domjaceho měra dla ličić.
