Mysle dr. Měrćina Wałdy k pozicijam někotrych zastupjerjow našeho ludu w livestreamach Konrada Adenaueroweje załožby

Pod titulom „Serbja we Łužicy – Drě­macy pokład w Sakskej?“ je Konrada Adenauerowa załožba CDU w štyrjoch wusyłanjach přez livestream aktualne wobstejnosće našeho ludu předstajiła. Štóž woprawdźite połoženje Serbow znaje, dyrbješe so jara dźiwać, kak sej woni sami swoju prekernu situaciju přeco hišće rjanu barbja.

W slědźe online-foruma „Jedyn lud, jedyn hłós!?“ bě rěč wo politiskej partici­paciji našeho ludu. W swojim zawodźe sławješe bywša zapósłanča zwjazkoweho sejma Marja Michałkowa w najróžojćišich barbach zhromadne stawizny Serbow a Němcow. Tysac lět su woni w pječa přikładnej „přezjednosći jako wjetšina a mjeńšina žiwi byli“ a tež dźensa we „wuběrnej zhromadnosći“ we Łužicy sydla. Štóž konfrontacije znaje, kotrež so wšudźe tam jewja, hdźež wjetšina na mjeńšinu storči, dyrbi ze zawisću na paradiziske wobstejnosće Serbow we łužiskej „Šlarafiji“ hladać.

Regina Šołćina z Konjec pisa:

„Serbja, što to dyrbi?“, rěka w žortnym skeču. Haj, to so prašam, myslo na hłowna a wólbnu zhromadźiznu župy „Michał Hórnik“ Kamjenc minjeny pjatk w Chróšćanskej „Jednoće“.

Za ewentualnu legitimaciju natyk­njenja z koronu za strowotniski zarjad dla bu kóždy čłon namołwjeny, wonu „cedlku“ w němskej rěči wupjelnić. Čehodla so potom w zjawnosći wjele lubjacy slogan „Sorbisch? Na klar.“ propaguje? Nažel widźu w tajkim zjawje přisłowo: „Wodu prěd’wać a wino pić.“

Prěnje čisło w 31. lěće wuchadźenja časopisa Česko-lužický věstník je nimale bjezwuwzaćnje hižo dlěje abo hakle njedawno zemrětym wosobinam wěnowane. W prěnim přinošku podawataj Jurij Łušćanski a Radek Čermák hłowne žiwjenske daty a mjenujetaj zasłužby „mištra“ Bjarnata Krawca składnostnje jeho 160. narodnin (5.2.1861–25.11.1948). K tomu wozjewjena je baseń Milana Hrabala „Bjarnat ve V./Bjarnat we W.“ w čěskej a serbskej rěči. Łušćanski spomina w dalšim artiklu na zetkanja z Hanku Krawcec, dźowku Bjarnata Krawca, narodźenej před 120 lětami (13.3.1901– 19.10.1990). Awtor tež pisa, zo bě w interneće w słowjenskim časopisu dotal nje­znate dźěła wuměłče namakał. Molerka, grafikarka Hanka Krawcec je w Budyšinje stajnje w tutymaj dźěłomaj widźeć: na sćěnje při Mosće měra z logom „Serbski ludowy ansambl“ a w Serbskim domje na přizemju w barbnym woknje ze znamješkom Domowiny. (Přispomnjenje MK: W lěće 1950 po wjacorych naćiskach zhotowjene znamješko bu 1951 na 1. zwjazkowym kongresu prěni raz zjawnje předstajene).

K aktualnemu rozestajenju wo kanclersku kandidaturu CDU/CSU měni Eduard Luhmann ze Smjerdźaceje:

Kaž Markus Söder z Arminom Laschetom wobchadźa, njeje jenož čłowjesce šamałe, ale awtoritu Lascheta jako předsydy CDU chětro podrywa. Njemóžu so zaćišćej wobarać, zo so Söder samo trochu wjeseli Lascheta zdemontować.

Ćim bóle mje kaž tež mnohich mojich stronskich přećelow w Sakskej CDU zwjesela, zo je bywši riwala Armina Lascheta we wólbach wo předsydstwo zwjazkoweje CDU Friedrich Merz w tak mjenowanym „K-prašenju“ Laschetej pomocliwje po­boku. To njeswědči jenož wo čłowjeskej přistojnosći, ale runje tak wo politiskej rozhladniwosći. Wšako móhło so Merzej poboku Lascheta poradźić wonych wolerjow zaso za sebje zdobyć, kotřiž su klubu a z přesłapjenja sčasami AfD wolili. Dalši plusdypk je, zo nima Merz jenož nastupajo hospodarstwo a financy jasne a krute měnjenje, ale wě swoje namjety tež zaměrnje zwoprawdźeć.