Balansa wažny zakład wuspěcha
Budyšin (SN). Za čas koronakrizy kroči Budyske předewzaće Deutsche Backofenbau GmbH DEBAG po nowych pućach, zo by swojich přistajenych njeběrokratisce podpěrało. „W dobrych a předewšěm w časach korony měli so dźěłodawarjo wo swojich sobudźěłaćerjow starać“, měni nawodnistwo, kaž w nowinskej zdźělence rěka. Při wšěch wužadanjach je wažne, „wobzor šěrić a předewšěm zrozumjenje za nowe ćežke połoženje kóždeho jednotliwca měć. Chcemy swojim přistajenym pokazać, zo jim cyle pragmatisce při zmištrowanju wšědneho dnja za čas korony pomhamy. Předewšěm hladanje dźěći bě mnohim wažna tema“, rozłožuje jednaćel Debag Jost Straube. Zo móhli starši hladanje dźěći zaručić, je zawod časowe konta přistajenych wulkomyslnje napjelnił. Zdobom zmóžnichu jim dźěłowe časy fleksibelnje wuhotować – potajkim, zo móža dźěłać, hdyž so jim najlěpje hodźi.
Čerstwa zelenina ze skały
Wudźěłki zasadnje regionalni plahowarjo dodawaja
Njebjelčicy (SN/mwe). W Njebjelčicach maja daloko znaty wjesny wobchod, w kotrymž móžeš sej přewažnje bioprodukty kupić. Štyrjo towaršnicy předewzaća zwěsćeja, zo je ličba kupcow w koronakrizy přiběrała.
To drje bě woprawdźe dobry rozsud, zo su někotři jenakozmysleni z Njebjelčanskim wjesnjanostu Tomašom Čornakom (CDU) před něšto časom wo to wojowali, na ležownosći gmejnskeho centruma wjesny wobchod zaměstnić. Jedyn ze sobuwojowarjow bě Hubert Lange. Dźensa ma wón wikowanske naležnosće předawanišća na starosći, kotrež je minjene tydźenje w krizy korony dla wjace kupcow přiwabiło.
Wotprajene wiki dalši ćežki dyr
Choćebuz (SN/at). Tradicionalne nazymske wiki/Choćebuske twarske wiki, kotrež běchu za 24. a 25. oktober planowane, lětsa prěni raz w dotal 23lětnych stawiznach njebudu. Kaž towaršnosć CMT Cottbus Congress, Messe & Touristik GmbH po słowach jednaćelki CMT Daniele Kerzel informuje, wot braniborskeho krajneho knježerstwa hač do 31. oktobra 2020 podlěšeny zakaz wulkopodawkow ze swojimi rjadowanjemi a wuměnjenjemi „nas jako zarjadowarja a wustajerjow we wuhotowanju nazymskich wikow/Choćebuskich twarskich wikow 2020 tak wobmjezuje, zo njeje pod překupskimi aspektami zmysłapołne je přewjesć“.
Hač do kónca minjeneho tydźenja bě CMT wiki hromadźe z wustajerjemi a partnerami planowała a so nadźijała, zo hodźa so z někotrymi wobmjezowanjemi wotměć. Rozsud njebě zamołwitym CMT lochki. Wšako maja jón za dalši ćežki dyr zarjadowanskej branši, kotraž wot lětušeho měrca koronapandemije dla jara ćerpi. Wotprajenje pak zdobom rěka, so rizika natyknjenja wobdźělenych – wustajerjow a wopytowarjow – wzdać.
W boju su přěhračcy
Pjenjezy za zjawny rum
Rakecy (SN/BŠe). Leaderowy region Hornjołužiska hola a haty (OHTL) chce 390 000 eurow wudać a zjawnje přistupne zarjadnišća kaž tež naměsta a swobodne płoniny porjeńšić. Za inwesticije do zarjadnišćow planuja cyłkownje 140 000 eurow, za wróćozdobyće płonin chcedźa 120 000 eurow wudać a za nowowuhotowanje ležownosćow něhdźe 86 000 eurow.
Hač do 7. awgusta smědźa priwatne wosoby, předewzaća, komuny a dalše swoje spěchowanske próstwy regionalnemu managementej w Rakečanskim Leaderowym běrowje zapodać. Projekty měli zaměram a kriterijam wuwićoweje strategije wotpowědować. W běrowje regionalneho managementa smědźa so zajimcy poradźować dać, štož je tež telefonisce móžno.
Tuchwilu ma towarstwo OHTL 48 sobustawow, kotřiž regionalne wuwiće a turizm w regionje podpěruja. Prawidłownje wobhonjeja so woni wo zwoprawdźenju naprawow. Tak budu to tež lětsa činić a přewjedu 7. septembra ekskursiju k projektam. Do toho změja swoju zhromadźiznu.
Hospodarski spěchowar Wojerec ma wulke wizije
Hižo wot apryla nawjeduje Alexander Kühne wobłuk hospodarskeho spěchowanja města Wojerec. Poprawom bě rodźeny Wojerowčan powołanje fyzioterapeuta nawuknył, je jako tajki tež někotre lěta dźěłał a so zesamostatnił. Po studiju zjawneho hospodarstwa na Budyskej powołanskej akademiji bě wón sydom lět projektowy manager Wojerowskeho Łužiskeho technologijoweho centruma Lautech tzwr. Z bywšej hospodarskej spěchowarku města Franzisku Tennhardt je wón wšelake iniciatiwy kaž „hospodarsku snědań“ sobu organizował. Wo nowym dźěle, wo wužadanjach strukturneje změny kaž tež wo hospodarskich wizijach města a wokoliny je so z nim Andreas Kirschke rozmołwjał.
Čehodla trjeba město Wojerecy hospodarskeho spěchowarja?
Nowe areale sej wotkrywać
Choćebuz/Běła Woda (SN). Dalši dźěl znowawužiwajomneje pohórnistwoweje krajiny je předewzaće Łužiska energija a hórnistwo (LEAG) wčera při Ćežkej horje na kromje Běłeje Wody za wopytowarjow wotewrěła. Kaž koncern zdźěli, wjedu wot tamnišeje wuhladneje wěže bjezbarjerne puće po hižo lěta 2015 zapołoženych terasach do noweje prioritneje přirodoškitneje kónčiny. Tafle skedźbnjeja wopytowarjow na to, što maja na dale pod hórniskim dohladom stejacym terenje wobkedźbować. Areal twori nowowutworjenu južnu skłoninu Ćežkeje hory, kotraž bu Wochožanskeje jamy dla w lětach 2006 do 2008 po dwěmaj třećinomaj wotbagrowana.
Rekultiwowana kónčina na juhu Běłeje Wody wobsteji ze sto hektarow emisiskeho škitneho lěsa z tudyšimi družinami štomow a kerkow a z 340 hektarow wulkeje płoniny z wotewrjenej krajinu. Z njeje móžeš sej z hórskimi terasami nětko nimale 10,5 hektarow wulki areal pěši wotkryć. Terasy su z drjewinami zwosadźane, kaž su to dorničel, dźiwja róža a jałorc. Rozšěrjene wobłuki, mjez druhim z pěskowej holu, je dominuja.
„Poslednju milu“ přewinyć
Choćebuz (SN/at). Łužiska agentura mobility móže komuny we wjesnych kónčinach podpěrać, „poslednju milu“ přewinyć. To wuchadźa ze studije, zdźěłaneje w nadawku Hospodarskeho regiona Łužica we wobłuku projekta Łužiskeje dźěłarnje přichoda. „Poslednju milu“ mjenuja wotrězk, kotryž njeje hižo na zjawny bliskowobchad přiwjazany. Na wsach z toho njelěpšiny wurostu, dokelž su wobydlerjo na swójske wozydło pokazani.
Awtorojo studije namjetuja Łužisku agenturu mobility, kotraž wobchadne zwjazki přesahujcy w Sakskej a Braniborskej skutkuje. Agentura móhła na městnje gmejny nastupajo naležnosće mobility poradźować a je podpěrać konkretne naprawy zeskutkownić. Nastać ma regiony přesahowacy atraktiwny wobchadny poskitk. Studija wuchadźa za tajku agenturu z lětnych kóštow 1,6 milionow eurow. Dołhodobnje poručeja samostatnu towaršnosć krajow Sakskeje a Braniborskeje.
Prěnje testy w praksy běchu lětsa wot januara hač do meje we wokrjesomaj Dubja-Błóta a Zhorjelc a wunjesechu komunam rjad jednanskich poručenjow.
Po krizy z efektiwnišej strukturu
Z efektiwnišimi strukturami chcedźa turistikarjo w Hornjej Łužicy po ćežkim času korony dla na wuběrne wuwiće spočatk lěta nawjazać. Za to rozpušća Turistiski zwjazk Hornja Łužica-Delnja Šleska a přenjesu jeho nadawki regionalnej marketingowej towaršnosći.
Budyšin (SN/at). Dwójna struktura efektiwnemu dźěłu lědma polěkuje. A zo je přewšo wunošne za jedyn cil mocy wjazać, to su w Rudnych horinach z jeničkim turistiskim zwjazkom dopokazali. Budyski krajny rada Michael Harig (CDU), zdobom předsyda Turistiskeho zwjazka Hornja Łužica-Delnja Šleska (TVO) a dohladowanskeje rady Marketingoweje towaršnosće Hornja Łužica-Delnja Šleska (MGO), mjenowaše tónle přikład na njedawnej nowinarskej rozmołwje MGO takrjec mosćik k temje, kotraž tudyšim zamołwitym za turizm hižo dlěši čas pod nochćemi pali. Wot lěta 2016 běchu so z njej zaběrali.
Plany Tesle zjawnje wupołoža
Podstupim (dpa/SN). Změnjene twarske podłožki za planowanu twornju awtotwarca Tesla z USA w juhobraniborskej Grünheidźe we wokrjesu Wódra-Sprjewja chcedźa wot jutřišeho zjawnje wupołožić. To je braniborske wobswětowe ministerstwo wčera zdźěliło. Dohlad do podłožkow změja ludźo na krajnym zarjedźe za wobswět we wotnožce Frankfurt nad Wódru, w radnicy gmejny Grünheide, w radnicy w Erkneru a na hamće Spreenhagen. Wobmjezowanjow koronapandemije dla pak dyrbja so zajimcy do toho telefonisce přizjewić. Tak chcedźa zaručić, zo njeje přewjele ludźi w samsnym času na samsnym městnje.
Je to hižo druhe wobdźělenje wobydlerjow w procesu přizwolenja po zwjazkowym emisiskim zakonju. Změny planow za twar tak mjenowaneje gigafabriki chcedźa w hamtskim łopjenu wozjewić. Hač do 3. septembra 2020 maja wobydlerjo składnosć, swoje wobmyslenja zapodać. Tesla bě w zwisku z procesom přizwolenja twarske plany na dobro přirody we wjacorych dypkach změniła. Wšitke podłožki planowanje nastupajo su tež internetnje přistupne.
