Nowy wobsedźer železniskeje sparty Alstom swoje plany hišće njewozjewił

Budyšin/Zhorjelc (SN/BŠe). Era sparty kanadiskeho předewzaća Bombardier w Budyšinje a Zhorjelcu je zakónčena. Nowy wobsedźer, francoski koncern ­Alstom, je minjeny pjatk wotpowědne kupne zrěčenje podpisał. Kaž z Parisa zdźělichu, su za němsku železnisku ­spartu Bombardier cyłkownje 5,5 miliardow eurow zapłaćili, štož je trochu mjenje, hač bě poprawom wotpohladane. W Němskej je cyłkownje 9 000 sobudźěłaćerjow wot změny potrjechenych, ně­hdźe 2 000 z nich na Budyskim a Zho­rjelskim stejnišću.

Sakski strowotniski zarjad je na nowše rozšěrjenje afriskeje swinjaceje mrětwy w Zhorjelcu reagował a minjeny štwórtk nowe postajenja wozjewił. Zhorjel­ski krajny rada Bernd Lange (CDU) žada sej mjeztym dalšu podpěru ze stron Zwjazka a Europskeje unije.

Zhorjelc (SN/BŠe). Wot pólskeje mjezy sem so afriska swinjaca mrětwa w Zhorjelskim wokrjesu dale wupřestrěwa. Po tym­ zo su prěni pad loni 31. oktobra blisko­ Krušwicy zwěsćili, je jich mjeztym 19 dopokazanych. Sakski strowotniski zarjad zdobom na najnowše wuwića reaguje. Wšako běchu zahinjene inficěrowane skoćo tež zwonka pasma wohroženja namakali. Škitne a wohroženske pasma su minjeny štwórtk tuž přiměrili. Za plahowarjow swini we wotpowědnej kón­či­nje płaća wosebite postajenja, kotrež je Zhorjelski wokrjes na swojej internetnej stronje wozjewił. Tež hajnicy maja wukaz sćěhować, kotrež w jednotliwych conach kołowokoło namakanišćow płaća. Hońtwa tam tuchwilu žana móžna njeje. Ludźo, kotřiž so ze swojimi psami wuchodźuja, smědźa je jeno za powjazom měć.

Pjenjezy krótkodźěłacym pomhaja w koronapandemiji předewzaćam, zo njetrjebali swojich sobudźěłaćerjow pušćić. Nětko informuje dźěłowa agentura wo konkretnych ličbach wužiwanja.

Budyšin (SN/at). Pjenjezy krótkodźěłacym su wosebje za čas koronapandemije wažny srědk předewzaćam, zo bychu z podpěru stata dźěło zawěsćili, bjezdźěłnosći zadźěwali a wupad mzdy znajmjeńša zdźěla zarunali. Wuměnjenje je, zo dyrbi bytostny wupad dźěła předležeć, kiž je njewobeńdźomny a nachwilneho razu a kotryž złožuje so na ekonomiske přičiny abo na njewotwobroćomny po­dawk. W praksy to rěka, zo maja přede­wzaća krótkodźěło pola přisłušneje agentury za dźěło přizjewić. Wujewi-li pruwowanje pozitiwny wuslědk, wobliči zarjad konkretne naroki a je pozdźišo přepokaza. Tak dźěłodawar pjenjezy najprjedy swojim sobudźěłaćerjam wupłaći, prjedy hač je zwjazkowa agentura za dźěło jemu dodatnje wróći.

Choćebuz (SN/BŠe). Na jednej z rekultiwěrowanskich płonin Janšojskeje bru­nicoweje jamy planuje koncern Łužiska energija a milinarnje (LEAG) swój prěni wětrnikowy park. Cyle w susodstwje je hižo tajki park z mjenom Baršć-Brězynka (Briesnig), kotryž słuša inwestmentowej towaršnosći skupiny LHI. Tuchwilu přihotuje projektny wuwiwar firma EP New Energies předewzaće, kotrež ma potom wětrnikowy park Baršć-Brězynka II rěkać. Předwidźane je 17 hač do 250 metrow wysokich wětrnikow natwarić. Prěnje rozmołwy z Picnjanskimi zarjadami su hižo byli. W přichodnych tydźenjach dale wo projekće informuja. Wotpowědnu přizwolensku próstwu z přepytowanjom wobswětoznjesliwosće chcedźa hišće­ w prěnim połlěće krajnemu wobswětowemu zarjadej zapodać.