Łužica móže přidobyć
Twarstwo před ćežkimi časami
Berlin (dpa/SN). Wulkeje ličby nadawkow dla je twarska industrija Němskeje dotal dosć derje přez krizu koronawirusa dla přišła. W přichodnych měsacach pak budźe połoženje widźomnje ćeše. „Dožiwjamy hižo měsac dołho ekstremnje woteběracu ličbu nowych twarskich nadawkow“, rjekny prezident hłowneho zwjazka němskeje twarskeje industrije Peter Hübner wčera w Berlinje. „To njejsu wokomiknje žane dobre wuhlady.“ Po informacijach Hübnera „je ličba twarskich nadawkow w prěnim kwartalu porno lońšemu wo 30 do 40 procentow spadnyła. A bohužel to dale dźe.“
Njewidźany rozmach twarstwa minjenych lět so abruptnje kónči. Zwjazk twarskeje industrije trochuje, zo wobroty firmow lětsa pola 135 miliardow eurow stagněruja. Minjene lěta bě kwota rozrosta zdźěla nad dźesać procentami była. Hišće w prěnim kwartalu běchu dochody branše wo dźewjeć procentow wyše hač loni w samsnym času. Mjeztym, zo drje wostawaja nadawki w bydlenjotwarje dale stabilne, su mnohe priwatne a zjawne nadawki wotpadnyli. Komuny maja krizy dla hoberske straty dawki nastupajo.
Běła flota wohrožena
Drježdźany (dpa/SN). Hižo do koronakrizy zapozdźeneho zahajenja lětušeje sezony dla su so sobudźěłaćerjo Sakskeho łódźnistwa parnikow alarmowani pokazali. Woni maja tradiciske předewzaće za wohrožene, po tym zo njeje swobodny stat přilubjeny kredit w meji přepokazał, wobžarowaše rěčnik předewzaća po krizowym zetkanju sobudźěłaćerjow wčera na łobjowym parniku „Dresden“. Tak njemóže předewzaće mzdy a socialne wotedawki płaćić, łódźe a firmowe wotnožki z wjacorymi stami dźěłowych městnow su wohrožene. Personal kritizowaše wahanje a namołwi swobodny stat, swoje přilubjenje dodźeržeć.
Niłka woda a z njej zwjazane woteběrace dochody běchu Drježdźanskemu tradiciskemu a turistiskemu předewzaću hižo loni deficit wunjesli. Hač do awgusta 2020 maja cyłkowny koncept za nowe wusměrjenje předewzaća zdźěłać. W awgusće 2019 běchu towaršnicy strukturu financowanja změnili. To bě wuměnjenje za dalše pjenjezy bankow a Swobodneho stata Sakskeje. Běła flota wužiwa dźewjeć historiskich parnikow a dwě modernej pasažěrskej łódźi.
W Kašecach sčasom reagowali
Zmjerzki, kotrež mějachmy w času lodowych mužow, su plahowarjam sadu tu a tam wjetše škody načinili.
Budyšin/Kašecy (SN/BŠe). Po wjacorych dnjach ze zmjerzkami hač do štyrjoch stopnjow pod nulu w meji starosća so winicarjo a plahowarjo sadu wo swoje žně. Takle wopisuje jednaćel sakskeho sadoweho burskeho zwjazka Udo Jentzsch tuchwilnu situaciju na polach.
Ze zakonjomaj so njedlijić
Łužiske hospodarstwo a třěšny dźěłaćerski zwjazk DGB tłóča na spěšne wobzamknjenje jězbneho plana za kónc wudobywanja brunicy. Wuslědki strukturneje komisije njeměli změnić.
Choćebuz (SN/at/BŠe). Do zjawneho słyšenja wo naćisku zakonja wo kóncu wudobywanja brunicy, kotrež wotměje hospodarski wuběrk zwjazkoweho sejma dźensa w Berlinje, su komory a zwjazki swoje žadanje za spěšnym schwalenjom toho zakonja kaž tež zakonja wo sylnjenju struktury w brunicowych regionach wospjetowali. „Dalše dlijenje njeje akceptabelne“, w tym su sej Łužiska hospodarska iniciatiwa, Choćebuska rjemjeslniska kaž tež tamniša industrijna a wikowanska komora a Předewzaćelski zwjazk Braniborska-Berlin přezjedne.
Tydźenske wiki z nowej strukturu
Město Wojerecy nětko modelowa komuna
Komuny wobydlerjow, přemysło a industriju z ćopłotu zastaruja. Kak móhli nowe koncepty wuwić a ćopłotne systemy dale zaručić bě tema zwjazkoweho wubědźowanja, na kotrymž je so tež město Wojerecy wobdźěliło.
Wojerecy (AK/SN). Město Wojerecy je so wuspěšnje na zwjazkowym wubědźowanju „Komunalna ćopłotna změna“ wobdźěliło, ke kotremuž běštej agentura za wobnowjomne energije kaž tež Fraunhoferski institut za energijowe hospodarstwo a energijowe systemy namołwjałoj a do přichoda sahace ideje pytałoj. Mjez něhdźe 50 požadarjemi dobychu Wojerecy w Sakskej, Hoya nad rěku Weser (Delnja Sakska) a Regensburg (Bayerska).
Dalši projekt za mjenje zerzawca w Małej Sprjewi
Sprjejcy (JoS/SN). Blisko saksko-braniborskeje krajneje mjezy je Łužiska a srjedźoněmska towaršnosć hórnistwoweho zarjadnistwa (LMBV) projekt nastorčiła, zo by poćeženje ze zerzawcom w Sprjewi a w Małej Sprjewi pomjeńšiła. To je na dobro přewšo poćeženeju wotrězkow Sprjewje wot Rulec młyna hač k předzawěrje Grodkowskeje rěčneje zawěry a Małeje Sprjewje mjez Bórkhamorom a wuliwom do Sprjewje pola Sprjejc. Tak tworja zdobom dalše wěstoty tež za Błóta. Zwoprawdźejo koncept haćenja chcedźa mnóstwo w Sprjejčanskej rynje wotsadźeneho zerzawca krok po krok pomjeńšić.
Sobudźěłaćerjo pućowanskich předewzaćow z Choćebuza a wokoliny ...
Čołmarjo scyła chwile njeměli so přihotować
Wot 9. meje je w Błótach zaso dowolene čołmować. Je to prěni krok, wožiwić turizm, do kotrehož chce Braniborska zajutřišim, 15. meje, startować. Krajni radźa wokrjesow Sprjewja-Nysa (SPD), Hornje Błóta-Łužica (OSL) a Dubja-Błóta (LDS) mjenuja to w času koronapandemije „wažny měznik za regiony“.
Borkowy/Raduš/Lubnjow (SN/at). Padlowych čołmow bě minjeny kónc tydźenja hižo tójšto na błótowskich groblach po puću. Čołmy sy lědma wuhladał. „Překrótkodobnje smy zhonili, zo směmy čołmowanje zaso poskićeć. Tak njejsmy organizować móhli, štož nam Błótowski turistiski zwjazk nastupajo škitne naprawy poruča“, rozłožuje Bernd Lehmann z Čołmownje při Lindobarskej (Leineweber) w Bórkowach. Wón je spokojom, zo móža zaso dźěłać, zo je čas krótkodźěła nimo. Bjez korony bychu sezonu 1. apryla zahajili. „Smy pak tež w měrcu hižo dwě njedźeli zhubili. Rozmach čołmowanja hakle budźe, hdyž hotele zaso wočinja“, skedźbnja Lehmann na to, zo w Błótach jedne z tamnym wusko zwisuje.
