Wandalizm w jězorinje přiběra
Zaměrowy zwjazk namołwja ludźi wobkedźbowanja přizjewić
Kamjenc (AK/SN). Wandalizm we łužiskej jězorinje bohužel přiběra. To rjekny jednaćel zaměroweho zwjazka Łužiska jězorina Sakskeje Daniel Just na zańdźenym posedźenju w Kamjencu. Hižo štyri škitne domčki su njeznaći z grafitijemi pomórali. Na šěsć blakach zwěsćichu zamołwići wobškodźene ławki, blida a psyče nuzniki. Wěcna škoda je wulka, jednaćel wuzběhny, wšako płaći zwuporjedźenje jedneje kombinacije z ławki a blida něhdźe 450 eurow. Zo bychu jedyn informaciski domčk wobnowić móhli, ma zaměrowy zwjazk něhdźe 500 eurow nałožić. Tohodla prosy wo to, zo měli hosćo łužiskeje jězoriny wobkedźbowanja wandalizma přizjewić. Wšitcy dźě z dobrych wuměnjenjow w turistiskej kónčinje čerpaja.
Projekt elektrotechnikarjow
Bus w Budyskim wokrjesu ma na wukubłanske móžnosće skedźbnjeć
Budyske zjednoćenstwo elektrotechnikarjow nowe puće kroči. „Elektronikar je dale woblubowane wukubłanske powołanje, kóžde lěto 25 do 35 nowych wučomnikow swoje wukubłanske zrěčenje podpisa“, rozłožuje wyši mišter zjednoćenstwa Torsten Schölzel. Naposledk su zaso lochki postup zwěsćili. Wot ličbow prjedawšich lět, hdźež je kóžde lěto wjace hač sto młodostnych wukubłanje w elektrorjemjesle zahajiło, pak su nadal jara zdaleni.
Loni mjenje insolwencow
Kamjenc (SN). W Sakskej přizjewichu loni 5 929 insolwencnych jednanjow. Kaž statistiski krajny zarjad wčera w Kamjencu zdźěli, je to mjenje hač lěta 2015 z hišće 6 272. Ličba firmowych insolwencow pak je loni prěni raz po lěće 2010 zaso rozrostła. Woteběrali su insolwency přetrjebarjow, k tomu słušeja tež priwatne insolwency.
1 069 předewzaćow je loni wozjewiło, zo hižo płaćić njemóža – to je 56 padow wjace hač lěta do toho. 41 procentow potrjechenych firmow běchu towaršnosće z wobmjezowanym rukowanjom (tzwr). Zawody jednotliwcow wučinjachu 53 procentow. Wjetšina płaćenjanjekmanych předewzaćow je z twarstwa. Wulki dźěl (58 procentow) bě za čas insolwency nimo toho mjenje hač wosom lět hospodarsce skutkował.
Statistikarjo zwěsćichu, zo bu z 3 387 jednanjemi trójce telko insolwencow přetrjebarjow přizjewjenych hač pola firmow. W Lipsku bě jich najwjace.
Zo bychu ludźo přeco derje kusać móhli
Druhdy je proteza abo narunanje kusadła jenička móžnosć, ludźom ze zubnymi problemami dale zaručić, zo móhli so dosć derje zežiwić. Wolóženja kaž implantaty abo kumštne zuby přińdu z rukow nazhonitych zubnych technikarjow, kotrež je w dentalnych laborach swědomiće a za kóždeho jednotliwca wotpowědnje předstawam zubneho lěkarja zhotowjeja. Zubny lěkar a technikar skutkujetaj zhromadnje na dobro pacienta. Zubny lěkar pak móže pacienta jenož potom zaso do wšědneho dnja pósłać, hdyž je tež technikar derje a swědomiće dźěłał.
Dentalny labor Tomaša Mjetaša na Wojerowskej Cyrkwinskej je regionalnym zubnym lěkarjam hižo přez lěta dobra adresa. Tam zhotowja Sulšečan hromadźe z dalšej mišterku a jědnaće přistajenymi zubnymi technikarjemi wšo to, štož zubny lěkar za swojich pacientow jako dobre a spomóžne wobhladuje.
Zajim budźić
Zwjetša derje wopytany bě minjenu sobotu a njedźelu tež w ...
Zakładny kamjeń połožili
Kodersdorf (SN/at). – Nimale 120 nowych dźěłowych městnow nastanje na Kodersdorfskim industrijnišću blisko awtodróhi A 4. Předewzaće Aircraft Composites Sachsen GmbH, wotnožka firmy Łobjowe lětadłowe zawody Drježdźany (EFW), je tam dźensa zakładny kamjeń za nowy zawod połožiło. Na ceremoniji wuzběhny ministerski prezident Stanisław Tilich (CDU) wuznam powětroweje a swětnišćoweje industrije za hospodarske stejnišćo Saksku. „Wuwiće tu na stejnišću su zdobom wuspěšne stawizny z Hornjeje Łužicy, kotrež pokazuja, što je na wsach Sakskeje móžne“, wón chwaleše. Industrijnišćo je dobry přikład za to, zo je swobodny stat tež zwonka wulkoměstow industrijny kraj.
Inwestor twari w bjezposrědnim susodstwje towaršnosće CCI Assembly GmbH, štož je tohorunja stoprocentowska wotnožka EFW, a chce w nowej tworni systemy za špundowanje kaž tež wupaženja za nakładowe rumy lětadłow typa Airbus A320/A321 produkować, kaž rěčnik předewzaća Christopher Profitlich zdźěli.
Park „Trixi“ je cyłoněmske wočerstwjenišćo
Wulki Šunow (Großschönau) (AK/K). Wulkošunowski park „Trixi“ z kupjelu, dowolowymi domčkami, gastronomiju a campingownišćom je dale bóle cyłoněmske wočerstwjenišćo. „Hłownje drje su hosćo ze Sakskeje, spochi wjac pak tež z Braniborskeje, Berlina a samo Bayerskeje“, powěda jednaćelka parka Annette Scheibe. Loni wopyta park 20 200 ludźi. Přerěznje pjeć dnjow su wopytowarjo w dowolowych domčkach abo na campingownišću přebywali. Tuchwilu ma Trixi-park 96 dowolowych domčkow, 600 łožow za dowolnikow a campingownišćo ze 100 městnami za stany a caravany.
Pućowanje po přirodźe a kolesowanje stej hłownej motiwaciji, w kónčinje přebywać. Přiwšěm wužiwaja předewšěm w pódlanskej sezonje tež šulske rjadownje poskitki přebywanišća. Tole přinošuje k intensiwnišemu wućeženju.
Přehladka trendej přiměrjena
Šnajdrec kuchinski wobchod změje wot jutřišeho nowu wustajeńcu
Wulka Dubrawa (SN/MWj). Hižo wot januara 1990 zastaruja Křesćan Šnajder a jeho sobudźěłaćerjo hornjołužiske domjacnosće z modernymi kuchnjemi. Tež mjez serbskimi wobydlerjemi ma jeho kuchinske studijo tójšto kupcow. Předewzaće ma swoje sydło mjeztym 20 lět we Wulkej Dubrawje. „W tym času smy wjacore dźěle přehladki zas a zas přetwarjeli. Nětko pak bě raz cyłkowny přetwar trěbny“, powěda firmowy šef. Hižo loni w decembru započachu nowe špundowanje kłasć, wšitke nutřkowne sćěny přestajeć a nowe kuchnje zatwarjeć. Wonkownje błyšći so Šnajdrec dom z nowej fasadu.
