Bjedrichecy (AK/SN). Łužiska a srjedźoněmska towaršnosć hórnistwoweho zarjadnistwa (LMBV) Slěborny jězor w přichodnych lětach dale cyle zaměrnje saněruje. To nam sobudźěłaćerka za zjawnostne dźěło LMBV Kathleen Hofmann- Mitschke na naprašowanje zdźěli. Wona doda: „Prěni wotrězk je přibrjóh pola Bjedrichec. Za to připrawimy tuchwilu přestrjeń za test, na kotrejž přepytujemy, što je najeficientniša metoda zahusćenja z wulkim ćišćom. Ručež změjemy wuslědki, budźemy wot nazymy lěta 2023 z dźěłami započinać a chcemy je hač do kónca lěta 2025 zakónčić. Tajki je naš plan.“ Mjenowany wotrězk přibrjoha budźe so potom zaso turistisce wužiwać móc. Dalše wotrězki Slěborneho jězora móže LMBV hakle po dowolnosći sakskeho hórnistwoweho zarjada planować a skrućeć.

Slěborny jězor je wobstatk Łužiskeje jězoriny a słuša do Łazowskeje gmejny. Leži z tym wosrjedź Łužicy w Sakskej a ma wšelakore wažne funkcije za tutu kónčinu. Wón nješkita ludnosć jenož před wulkej wodu abo je wobstatk regulowanja wysokosće wody cyłkowneje jězoriny, ludźo jón tež jako bliske wočerstwjenišćo lubuja.

Potrjeba fachowcow wuchodosakske předewzaća dale wužada. Dopokaz toho su zdobom swobodne dźěłowe městna, kotrež su tudyše firmy Budyskej wotnožce zwjazkoweje agentury za dźěło w nowembrje přizjewili.

Budyšin (SN/at). Dźěłowa agentura rěči we wuchodnej Sakskej wo stabilnych dźěłowych wikach. Bjezdźěłnosć je w nazymniku wo 2,2 procentomaj resp. 371 wosobow na 17 571 stupała. Porno lońšemu nowembrej pak je to přirost wo 1 358 resp. 8,4 procenty.

Naprašowanje za dźěłowymi mocami je porno oktobrej w nowembrje woteběrało. Kaž dźěłodawarski serwis informuje, su twornje 675 nowych socialneho zawěsćenja winowatostnych dźěłowych městnow přizjewili, štož je ze 162 jobami něhdźe pjećina mjenje. Tele wuwiće nimale wšitke branše jenak potrjechi, rěka w měsačnej dźěłowičnej rozprawje Budyskeje agentury za dźěło. Jenož we wobłukach wobchad a składowanje, kubłanje a zdźěłowanje, w swobodnopowołanskich, wědomostnych a techniskich posłužbach kaž tež w gastronomiji je wjace wakantnych dźěłowych městnow. Po­dobne bě połoženje hižo w oktobrje.

Drježdźany (SN). Najebać hubjene konjunkturne wuhlady wostanje wukubłanje kruty wobstatk we wuchodosakskich rjemjeslniskich zawodach. Cyłkownje 484 žonow a 1 687 muži je hač do nowembra wukubłanje w rjemjeslniskim předewzaću Drježdźanskeho komorneho wobwoda zahajiło. Ličba nowych zrěčenjow wotpowěduje tym minjenych lět. Loni bě ze spočatkom nowembra dohromady 2 135 žonow a muži wukubłanje na wuchodźe Sakskeje zahajiło. „Wukubłanje je puć, z kotrymž rjemjeslniske zawody w regionje swojich fachowcow přichoda dóstanu“, zwurazni hłowny jednaćel Drježdźanskeje rjemjeslniskeje komory Andreas Brzezinski. „Při tym su šansy w rjemjesle jara dobre. Kročele wot wučomnika k mištrej, k firmowemu šefej, njejsu w rjemjesle rědke.“

K Drježdźanskemu komornemu wobwodej słušeja wokrjesy Mišno, Budyšin, Zhorjelc, Sakska Šwica-Wuchodne Rudne horiny kaž tež stolica swobodneho stata.