Dale a mjenje železa w Sprjewi
Zły Komorow/Grodk (SN/at). Zežołtnjena Sprjewja wosebje ludźi w Delnjej Łužicy starosći. Techniske připrawy južnje Rulec młyna abo blisko Noweje Wsy (Burgneudorf) wjazaja železowy oksid a redukuja žołte brěmjo w rěce. Łužiska a srjedźoněmska towaršnosć hórnistwoweho zarjadnistwa (LMBV) je wčera rozprawu lěta 2023 wo monitoringu poćeženja ze železom Sprjewje a w Grodkowskim spjatym jězoru předstajiła a při tym redukowanje železa zwěsćiła. Cyłkowna koncentracija je přerěznje 0,5 miligramow na liter wučiniła. Wot hraničneje hódnoty dweju miligramow železo we wodźe widźiš. Rěka so wobruni jako dołhodobny sćěh wudobywanja brunicy.
Technisku připrawu je LMBV 2014 na přitoku Sprjewje k Grodkowskemu spjatemu jězorej twariła. W prěnim kroku wodu Sprjewje wapnuja, w dalšim srědk přidadźa, tak zo so wulke mnóstwa železoweho błóta wotsadźeja. 43 procentow železa we wodźe je tale připrawa wufiltrowała. To je na dobro wody, kotraž čeće do směra na Błóta. Železowe brěmjo na pegelu Grodk/Wylemojce je wot lětnje něhdźe 5 500 kg na 3 800 kg woteběało.
Tesla hišće cyły tydźeń zlemjena
Po nadpadźe na milinowe zastaranje debatuja wo wěstoće infrastruktury
Grünheide (dpa/SN). Po atentaće na milinowe zastaranje twarca elektroawtow Tesla z USA w Grünheide pola Berlina wostanje produkcija awtow prawdźepodobnje hač do kónca přichodneho tydźenja přetorhnjena. Tole zdźěla předewzaće na naprašowanje medijow.
Nadpad je debatu wo tym nastorčił, kak móhli sensibelnu infrastrukturu w Němskej lěpje škitać. „Politika a hospodarstwo stej zhromadnje wužadanej, wěstotu milinowych syćow a kritiskich techniskich připrawow zaručić“, rjekny hłowny jednaćel Němskeje industrijneje a wikowanskeje komory Martin Wansleben wčera w Berlinje. Zwjazkowe knježerstwo dyrbjało wotpowědne zakońske rjadowanja skónčnje předpołožić.
Nawoda zawoda Tesla André Thierig rjekny. „Nadźijamy so, zo wěstotne zarjady Braniborskeje a tež Němskeje wo tym rozmysluja, kak móhli zawod zawěsćić.“ Krajne knježerstwo chcyło škitne naprawy zesylnić, pokazuje pak zdobom na to, zo njeje stoprocentowski škit móžny.
Niwow do korony nimale docpěty
Marketingowa towaršnosć Hornja Łužica-Delnja Šleska zhladuje na wuspěšne turistiske lěto. Přiwšěm je hišće dosć rezerwow, na kotrymž měło so zaměrnje dale dźěłać.
Nikriš (AK/SN). Lěto 2023 bě za turistisku branšu w Hornjej Łužicy wuspěšne lěto. Hladajo na cyłu Saksku je region nastupajo ličbu přenocowanjow třeće městno docpěł. Tole wuswětli předwčerawšim w Nikrišu (Hagenwerder) krajny rada Zhorjelskeho wokrjesa dr. Stephan Meyer (CDU), kiž je zdobom prezident euroregiona Nysa. W „Hotelu zmysłow“ při Bartonskim jězorje (Berzdorfer See) je Marketingowa towaršnosć Hornja Łužica-Delnja Šleska (MGO) minjene turistiske lěto bilancowała. Wuslědki loni běchu samo lěpše hač lěto do toho. Z tym je so nimale niwow do korony docpěł. Za branšu je tole dobre znamjo.
Prěni zaryw za wulku halu Choćebuskeje porjedźernje železnicow su ...
Dny zymy su cyle oficialnje zašłe. Nalěćo na nas čaka a z tym ...
Wobydlerjo aktiwistow podpěruja
Grünheide (dpa/SN). Škitarjo wobswěta su braniborske knježerstwo namołwjeli, planowane rozšěrjenje twornje Tesle w Grünheide zadźeržeć. „Što dyrbi so hišće stać, doniž politikarjo njereaguja“, wuzběhny Lou Winters. Wona angažuje so w zwjazku, kotryž so přećiwo planam Tesle zasadźa. Předewšěm aktiwistka kritizuje, zo dźe politikarjam jenož wo profit. Twornja njeměła hižo žane spěchowanske srědki ze stron braniborskeho knježerstwa dóstać. Po słowach wobswětoškitarjow předewzaće přirodu masiwnje wohrožuje. To nastupa mjez druhim pitnu wodu. Tež hódnoty wopłóčkow, kotrež so z twornje do systema dóstanu, su přewysoke. Zastupjerjo gmejny w Grünheide njesmědźa tole ignorować. Kaž z naprašowanja wuchadźa, je wjetšina wobydlerjow tohorunja přećiwo planowanemu rozšěrjenju twornje za elektroawta.
Protesty burow špatny přikład
Dialog a wola pomhać
Busy zaso njepojědu
Robert Habeck iniciatiwu łužiskich komunow chwalił
Hač do lěta 2030 ma so w Němskej wěsty podźěl miliny, mjenujcy 80 procentow, z wobnowjomnych energijowych žórłow produkować. Kak móhli tole docpěć, bě tema wčerawšeje konferency w Choćebuzu.
Choćebuz (SN). Wutwar ekomiliny po cyłym Zwjazku po słowach zwjazkoweho hospodarskeho ministra Roberta Habecka (Zeleni) derje postupuje. To wuswětli wón wčera na energijowej konferency w Choćebuzu. „Jelizo dale takle pokročujemy, smy zaměry bórze docpěli“, wón zwurazni. Tuchwilu wučinja podźěl miliny wobnowjomnych energijow něhdźe 40 procentow. Za dalše wuwiće njejsu w přichodźe jenož solarne parki a wětrniki trěbne, ale tež milinowe syće. Tak měli so milinowody twarić. Dokelž pak su powody pod zemju předrohe, dyrbja wone nad zemju nastać.
Habeck chwaleše wčera iniciatiwu łužiskich komunow. Minjeny tydźeń je Łužiski kruh požadanje wo prěni „Net Zero Valley“ (dolina nettoweje nule) Europy w Brüsselu wotedał. Rěčnica kruha, Grodkowska měšćanostka Christine Herntier (njestronjanka) bě ministra wčera informowała.
