Zhorjelc/Budyšin (SN/MiP). W mjenje rjemjeslnikow wokrjesow Zhorjelc a Budyšin staj wokrjesnaj rjemjeslniskaj mištraj Frank Scholze a Marcel Schulze nowinsku zdźělenku wozjewiłoj. W tutej poćahujetaj so na studiju – a w zwisku z tutej wotpowědny kritiski medijowy wothłós –, kotraž tematizuje „...předewzaćelski angažement za ekstremnych prawicarjow we wuchodnej Sakskej.“
Marcel Schulze, zastupjer Zhorjelskich rjemjeslnikow, praji w zdźělence, „zo su předewzaćeljo zaso jónu pawšalnje podhladni.“ Po jeho měnjenju studija wjesny rum z předsudkom pohódnoći, „kotryž tak realiće njewotpowěduje.“ Wón doda: „W rjemjesle a zjednoćenstwach mamy wšitke politiske směry a towaršnostne skupiny zastupjene.“ Budyski wokrjesny rjemjeslniski mišter Frank Scholze naspomni, zo „tuchwilna kampanja, nikomu njepomha.“ Wón měni, „zo je negatiwne poselstwo, kotrež z městow hladajo na wjesny rum wuchadźa, zahubne a zo je tak jenož prašenje časa, doniž rjemjeslnistwo kaž tež předewzaćelstwo we wjesnych kónčinach krok po kroku njezahinje.“
Čorna Pumpa (JoS/SN). Wulka mjerwjeńca knježeše minjeny kónc tydźenja wokoło železniskeho woza na tak mjenowanym nastupnišću čo. 19 w Čornej Pumpje. Tam prezentowaše so nimale 80 rjemjeslnikow na wosebitych wikach. Wone skićachu přehlad najwšelakorišich rjemjeslniskich powołanjow. Wulki dźěl z nich zasłuža sej z tym swój wšědny chlěb, druzy wukonjeja te abo tamne rjemjesło jako hobby.
Zastupjeni běchu rjemjeslnicy z cyłeje Łužicy a zwonka njeje. Tak wobdźělichu so kamjenjećesar z Jonsdorfa, drjeworězbar ze Steinigtwolmsdorfa, keramiski zawod z bliskosće Lipska a kowar z Picnja. Prěni raz přijěł bě korbyplećer z bliskosće Jüterboga. Wón chwaleše pisanosć zastupjenych rjemjeslniskich powołanjow a wěšćeše wikam dobry přichod, jeli so šěroka paleta dale wobchowa.
Južnje Borborineho kanala mjez Lejnjanskim a Parcowskim jězorom leži Kóšynski nasyp. Za wjacore lěta ma tam atraktiwne prózdninske přebywanišćo nastać.
Hamor (AK/SN). We Łužiskej jězorinje je dale wjele projektow, kotrež maja so zwoprawdźić. Jedyn tajki je nowy dowolowy resort južnje Borborineho kanala, kotryž měł tam w přichodźe nastać. Tomu přihłosowachu zawčerawšim radźićeljo zaměroweho zwjazka Łužiska jězorina Sakskeje na swojim posedźenju w Hamorje. Jednohłósnje wobzamknychu woni cyłoeuropske wupisanje. „Cyłkownje dźe wo płoninu we wobjimje 19,2 hektarow. Z toho su 5,1 hektary we wobłuku wobtwarjenskeho plana hnydom k dispoziciji“, wuswětli projektowy manager zaměroweho zwjazka Christian Kade. Wupisanje zahaja samo hišće tónle tydźeń a wone ma znajmjeńša šěsć měsacow trać.
Choćebuz (SN/at). Skupina LEAG we wobłuku wobnowjomnych energijow z kupju předewzaća Wismar Pellets GmbH dale rosće. Skrućić chcedźa z tym poskitk zlěpšowanskich produktow, kotrež so na brunicu njezłožuja, kaž LEAG wčera wozjewi. Pod třěchu skupiny LEAG hižo dwě předewzaći na třoch stejnišćach pelety z drjewa produkujetej. Peletowni Propell tzwr w saksko-anhaltskim Oranienbaumje a w Lubiju kaž tež towaršnosć Drjewowy kontor a peletownja Schwedt zwr w Braniborskej buchu loni kupjene.
Předewzaće we Wismarje ma něhdźe 110 sobudźěłaćerjow a produkuje na hłownym sydle wob lěto nimale 256 000 tonow wysokohódnotnych peletow, z kotrymiž zelenu ćopłotu a zelenu milinu dobywaja. Nimo toho je Wismar Pellets tzwr na dalšich firmach wobdźělena.
Po słowach předstejićela LEAG za ressort produkcija, dr. Philippa Nellessena, wobłuk wobnowjomnych energijow „wědomje wutwarjamy, zo bychmy stupacej potrjebje na CO2 chudych a klimoneutralnych paliwow wotpowědowali“. Tak kroku po kroku dotal dominowacy podźěl brunicowych wudźěłkow wottwarja.
Choćebuz/Weimar (SN/at). W zjawnym lisće je cyłkowna zawodna rada koncerna Łužiska energija a milinarnje (LEAG) wčera swoje wobdźělenje na dźensa we Weimarje so zahajacej klawsurje frakcije Zwjazka 90/Zelenych w zwjazkowym sejmje cofnyła. Pozadk je kónc tydźenja wozjewjeny wotpohlad Zelenych, z wobzamknjenjom ćišć na dočasny kónc wudobywanja a zmilinjenja brunicy hač do lěta 2030 tež we wuchodnej Němskej zdokonjeć, město 2038. „Sće nas přeprosyli na dypk ,změna strukturow‘, pod kotrymž měli rozprawjeć, kak móhła so tuta za naše koleginy a našich kolegow radźić“, rěka w lisće, podpisanym wot Uwe Teubnera a Toralfa Smitha, předsydy a městopředsydy cyłkowneje zawodneje rady LEAG. „To pak zawěsće nic z tym, zo samowólnje nowy datum wustupa postajiće.“
Wo njemdrosći a rozhněwanju dźěławych rěči Teubner po powěsćerni dpa. Koncernowa zawodna rada nochce sej wumjetować dać, zo na klawsurje ze Zelenymi wo dočasnym kóncu brunicy jedna. Frakciska předsydka Katharina Dröge je wotprajenje wobžarowała, jeje frakcija je k rozmołwje dale zwólniła.