Kampanja ma „łužiskej rybje“ renesansu wunjesć
Rakecy (UM/SN). Franzi je dźewjeć lět stara a rady w přirodźe. Wot najnowšeho wona wopytowarjow – předewšěm swójby z dźěćimi – po dožiwjenskim rybarskim statoku w Małym Holešowje wodźi. Wosebitosć statoka je, zo njenańdźeš jón na žanej karće, ale w interneće. Tež Franzi sama njeje realna wosoba, wona je we wirtuelnym swěće žiwa.
„Storytelling“ je kuzło, z kotrymž chcetaj jednaćel Marketingoweje towaršnosće Hornja Łužica-Delnja Šleska (MGO) Olaf Franke a jeho team na tradicionalne rybarstwo w Hornjej Łužicy skedźbnjeć. Franzi a jeje rybarski statok stej dźěl kampanje, z kotrejž chcedźa znowa etablěrowanu marku „łužiska ryba“ k wuspěchej wjesć. Wčera su ju w Rakecach prěni raz zjawnosći předstajili. Nimo MGO běchu akciju wjacori dalši partnerojo kaž regionalny management Hornjołužiskeje hole a hatow, biosferowy rezerwat, Sakski krajny zarjad za wobswět, ratarstwo a geologiju kaž tež wjacori hosćencarjo sobu wuwili.
Zasydlenja najebać koronu
Po wšěm swěće rozpřestrěwaca so pandemija je wabjenje runje wo wukrajnych inwestorow poćežiła. Najebać to su so loni někotři za stejnišćo Saksku rozsudźili. Z toho njejsu jenož wulkoměsta lěpšinu měli, ale tež Budyšin.
Drježdźany (dpa/SN). Žane wiki, zawrjene mjezy a lědma pućowanskeho wobchada: Koronapandemija je kontakt k inwestoram loni poćežiła. Najebać to je Hospodarske spěchowanje Sakskeje (WFS) 23 nowozasydlenjow kaž tež rozšěrjenja z wobjimom inwesticijow nimale 400 milionow eurow zawjedło, rjekny jednaćel WFS Thomas Horn tele dny powěsćerni dpa. Lońše je třeće najlěpše lěto po 2010. Wjace hač tysac dźěłowych městnow bu wutworjenych, něhdźe 280 zawěsćenych.
Pólscy kolegojo w zawodnych radach aktiwni
Budyšin (SN/at). Dźěłarnistwo IG metal wuchodneje Sakskeje zwěsća zrosćene sebjewědomje dźěłacych w předewzaćach swojeje zamołwitosće. Ludźo so ze mzdami, kotrež su niše hač te kolegow na zapadźe za samsne dźěło, hižo njewotnamakaja. To podšmórnje nowy prěni społnomócnjeny IG metal w regionje Uwe Garbe, kiž je zastojnstwo 29. meje wot Jana Otta přewzał. Minjene lěta běchu sej přistajeni z wutworjenjom zawodnych radow přećiwo spjećowanju jednaćelstwow prawo sobupostajowanja zawěsćili. Zawodnu radu maja na přikład nětko w twornjach Maja w Kulowje-Brěžkach, Birkenstock w Bernstadće a Zhorjelcu abo pola producenta bydlenskich mobilow Capron w sakskim Neustadće. Na docpěte nawjazujo wusměrja so jedne ćežišćo přichodneho skutkowanja tudyšeje IG metal na stabilizaciju a wutwar zrosćenych strukturow w zawodach.
Mylenju so wuwinyć
Partnerstwo z wojerskim zawodom
Kompetencu fachowcow přichodnje we Łužicy zhromadnje skrućić, to wotpohladujetej Łužiska energija a milinarnje (LEAG) a Towaršnosć za logistiku wojerskeho wuporjedźenja zwr (HIL GmbH).
Choćebuz/Dobrjoług-Góstkow (SN). Łužiski energijowy koncern LEAG so nastupajo strukturnu změnu po kóncu zmilinjenja brunicy za dalšimi kooperaciskimi partnerami rozhladuje. Kaž LEAG informuje, je wona z partnerom Zwjazkoweje wobory, Towaršnosću za logistiku wojerskeho wuporjedźenja zwr (HIL GmbH) w Dobrjoługu-Góstkowje (Doberlug-Kirchhain), w zhromadnym wozjewjenju wotpohlad zwurazniła, zo chcetej přichodnje we wobłuku wu- a dalekubłanja kaž tež nastupajo wuporjedźenje wozydłow a techniskeho wuhotowanja hromadźe dźěłać.
Wjacore přičiny k zesunjenju při jězoru wjedli
Drježdźany (SN/JaW). Eksterni fachowcy za geotechniku su prěnje wuslědki wo přičinach zesunjenja přibrjoha 11. měrca při Hórnikečanskim jězoru předpołožili. Kaž nowinski rěčnik Sakskeho wyšeho hórniskeho zarjada Freiberg prof. dr. Bernhard Cramer wčera w nowinskej informaciji zdźěli, je w posudku, kotryž su fachowcy hórniskemu zarjadej kaž tež Łužiskej a srjedźoněmskej towaršnosći hórnistwoweho zarjadnistwa (LMBV) přepodali, rěč wo wjacorych přičinach, kotrež su k zesunjenju wjedli.
Skići potrěbnym wulku pomoc
Posłužbownik Frank Nowak z Łazka ludźi samo na wopyt přiwuznych do Čorneho lěsa abo k Sewjernemu morju wjezł
Mjez nami je dźeń a wjace staršich a starych ludźi. Mnozy z nich su hišće kmani so sami zastarać a sej wšědny dźeń po swojich předstawach zarjadować. Tući poměrnje samostatni pak su tež dźakowni, hdyž so raz wo něšto starać njetrjebaja, ale hdyž jim druzy dźěl prócy a dźěła wotewzaja.
Zajimy a přeća spóznał
Na tajku podpěru wusměrił je so Frank Nowak z Łazka. Hižo mnohe lěta poskića wón najwšelakoriše posłužby starym a potrěbnym. Jeho skutkowanje a te jeho pilnych sobudźěłaćerjow njewobmjezuje pak so jenož na pomoc tym, kiž hižo mobilni njejsu, ale tež tym, kotřiž sej wšelake trěbne wobstaranja wšědneho dnja, jězby abo přijomnosće žiwjenja prosće hižo dowolić njemóža abo sami wjace k tomu kmani njejsu.
W Domanic ratarskim zawodźe wjesela so lětsa nad přewšo bohatymi ...
Nowa pensija nastała
Hibićiwy Radworčan-wuměnkar wosebity projekt zwoprawdźił
Budyšin (CS/SN). Jan Nuk steji tele dny móhłrjec před nowym startom. Kónc junija chce wón prěnich hosći w swojej pensiji „Budissin“ na Budyskej Kamjentnej hasy čo. 23 witać. Štyri dowolowe bydlenja su tak derje kaž hotowe. Nětko dyrbi jenož hišće internetna strona dźěłać započeć, zo móže wón turistow zbliska a zdaloka wo nowej přenocowanskej móžnosći w Budyšinje informować. Srjedź junija dźě móža hotele a pensije zaso turistiskich hosći přijimać. W tym nastupanju měješe Jan Nuk ze swojim časowym planom dobru ručku. Před dokładnje třomi lětami je bywši předsyda Domowiny twarjenje kupił, zo by, kaž sam praji, jako wuměnkar něšto za dźěło měł. Dźensa móže wuwučeny elektrikar hordźe rjec, zo je něhdźe 70 procentow wšěch dźěłow sam zdokonjał.
