Zrosćene sebjewědomje dźěławych w zawodach, kotrež su po industrijnych hałzach w zamołwitosći dźěłarnistwa IG metal wuchodneje Sakskeje, zwuraznja so w zaměrnišim prócowanju wo sobupo­stajowanje w předewzaćach. Niske mzdy, z kotrymiž su w Sakskej předołho wabili, měli tež tu skónčnje nimo być. Tudyši wosebity puć, sobupostajowanje wuspinkować a płaćiwosć zawodneho wustawoweho zakonja wobeńć, njeje so we wuchodnej Sakskej jako spomóžny wopokazał. Pozdatne wjeselo, přez cyłe lěta dobre, ale špatnje płaćene dźěłowe městno měć, bě wulke mylenje. Jemu měli so wšitcy ­hišće potrjecheni wuwinyć. Dźěłodawarjo ­a dźěłopřijimarjo měli runohódni być, jedyn trjeba tamneho, zo by swój zaměr docpěł. Z wida IG metal wuchodneje Sakskeje maja nawrótnicy ze zapadnych kónčin wulku zasłužbu na wonym zrosćenym sebjewědomju. Ći, kotřiž su wysoke kubło sobupostajowanja dožiwili, je z prawom wjace wotedać nochcedźa. Axel Arlt

Kompetencu fachowcow přichodnje we Łužicy zhromadnje skrućić, to wotpohladujetej Łužiska energija a milinarnje (LEAG) a Towaršnosć za logistiku wojerskeho wuporjedźenja zwr (HIL GmbH).

Choćebuz/Dobrjoług-Góstkow (SN). Łužiski energijowy koncern LEAG so nastupajo strukturnu změnu po kóncu zmilinjenja brunicy za dalšimi kooperaciskimi partnerami rozhladuje. Kaž LEAG informuje, je wona z partnerom Zwjazkoweje wobory, Towaršnosću za logistiku wojerskeho wuporjedźenja zwr (HIL GmbH) w Dobrjoługu-Góstkowje (Doberlug-Kirchhain), w zhromadnym wozjewjenju wotpohlad zwurazniła, zo chcetej přichodnje we wobłuku wu- a dalekubłanja kaž tež nastupajo wuporjedźenje wozydłow a techniskeho wuhotowanja hromadźe dźěłać.

Drježdźany (SN/JaW). Eksterni fachowcy za geotechniku su prěnje wuslědki wo přičinach zesunjenja přibrjoha 11. měrca při Hórnikečanskim jězoru předpołožili. Kaž nowinski rěčnik Sakskeho wyšeho hórniskeho zarjada Freiberg prof. dr. Bernhard Cramer wčera w nowinskej infor­maciji zdźěli, je w posudku, kotryž su fachowcy hórniskemu zarjadej kaž tež Łužiskej a srjedźoněmskej towaršnosći hórnistwoweho zarjadnistwa (LMBV) pře­podali, rěč wo wjacorych přičinach, kotrež su k zesunjenju wjedli.

Posłužbownik Frank Nowak z Łazka ludźi samo na wopyt přiwuznych do Čorneho lěsa abo k Sewjernemu morju wjezł

Mjez nami je dźeń a wjace staršich a starych ludźi. Mnozy z nich su hišće kmani so sami zastarać a sej wšědny dźeń po swojich předstawach zarjadować. Tući poměrnje samostatni pak su tež dźa­kowni, hdyž so raz wo něšto starać nje­trjebaja, ale hdyž jim druzy dźěl prócy a dźěła wotewzaja.

Zajimy a přeća spóznał

Na tajku podpěru wusměrił je so Frank Nowak z Łazka. Hižo mnohe lěta poskića wón najwšelakoriše posłužby starym a potrěbnym. Jeho skutkowanje a te jeho pilnych sobudźěłaćerjow njewobmjezuje pak so jenož na pomoc tym, kiž hižo mobilni njejsu, ale tež tym, kotřiž sej wšelake trěbne wobstaranja wšědneho dnja, jězby abo přijomnosće žiwjenja prosće hižo dowolić njemóža abo sami wjace k tomu kmani njejsu.