Myslu sej, zo nic. Tajke přirunanje je tež hódnoćenje jedneje wěcy. Při tym kóždy/kóžda swój wid zastupuje. Tak tež nastupajo dalekubłanje kubłarkow a kubłarjow. W Delnjej Łužicy zajimuja so wone – tam maja tuchwilu jeno žony-kubłarki w dnjowych přebywanišćach (žłobik, pěstowarnja, hort), kotrež so z dźěćimi w delnjoserbšćinje zaběraja – za třidnjowske poskitki Rěčneho centruma WITAJ. A nošerjo kubłanišćow čas jako dźěłowy čas připóznawaja. Tajke postupowanje by tež w Sakskej móžne było, sej myslu. Tu chodźa kubłarki, kubłarjo, wučerki a wučerjo tohorunja na dalekubłanja, kotrež Budyska wotnožka Sakskeho krajneho zarjada za šulu a kubłanje poskića. Te pak wotměwaja so předewšěm po wječorach, to rěka po dźěle. Tež to ma swoju lěpšinu. Wšako njetrjeba nawodnistwo kubłanišća personal narunać, kiž na kursach swoje kmanosće při rozšěrjenju znajomosćow serbšćiny pohłubša. Milenka Rječcyna

Drježdźany. (SN/MiR). Ludowa uniwersita w Drježdźanach poskići wot lětušeho nowembra kurs serbšćiny za započatkarjow pod titlom „Hornjoserbšćina – přistup k słowjanskej rěči“. To zdźěli předsydka Drježdźanskeho towarstwa Stup dale Jadwiga Pjacec. Zajimcy móža so na internetnej stronje zarjadnišća www.vhs-dresden.de přizjewić. Dalši kurs přewjedźe Institut za slawistiku na Drježdźanskej Techniskej uniwersiće wot oktobra, kotryž nawjeduje Lubina Hajduk-Veljkovićowa, a to online za schodźenki A1, B1 a B2. Wučbu změja stajnje pjatk. Pilotowy projekt, kiž je wšěm zajimcam přistupny, chcedźa wotwisnje wot ličby wobdźělnikow dale wjesć. Zajimcy njech přizjewja so e-mejlnje pod . Wona trjeba k tomu informacije wo tym, kak dołho zajimc abo zajimča hižo serbšćinu wuknje a na kotry stopjeń swoje znajomosće zarjaduje.

„Poskitkaj stej dospołnje nowy a wažny za zajimcow w sakskej stolicy. Na on­line-kursu móža so wšitcy wobdźělić, kotřiž­ chcedźa serbšćinu wuknyć. Kurs je takrjec swětej wotewrjeny“, Jadwiga Pjacec dodawa.

Wot lěta 2001 hižo wuchadźa w Rěčnym centrumje WITAJ časopis „Lutki“. Najprjedy w hornjoserbšćinje koncipowany ma wón mjeztym tež w Delnjej Łužicy swojich swěrnych woteběrarjow.

Budyšin (SN/MiR). Časopis měri so na dźěći, kotřiž su maćernorěčneho pochada, abo kotřiž serbsce wuknu, kaž tež na jich staršich. Štyri razy wob lěto pu­blikacija wuchadźa. Za kubłarki a ku­bła­rjow přida RCW přiručku z didaktisko-metodiskimi pokiwami, kotrež w „Lutkach“ zapřijate temy pohłubšeja. Tež w zakładnych šulach a hortach zešiwk rady wužiwaja. Něhdyša sobudźěłaćerka RCW, Sylwija Wjeńcyna, běše „Lutki“ hač do lěta 2013 wudała. Mjeztym wuchadźeja hižo 19. lěto. Weronika Butendeichowa, kotraž so jako wobdźěłarka projektow wo „Lutki“ stara, wobsah časopisa lětnje planuje. Za dźěl, kotryž měri so na star­šich, su to předewšěm rěčno-kubłanske temy. Dźěl za dźěći je so w zašłych lětach na serbskich nałožkach orientował. Tak zaběra so tež přichodne wudaće z woblubowanym nałožkom, swjedźenjom swjateho Měrćina. Dale změja interview wo poskitkach serbskich babow w Swinjarni.

Budyšin (SN/bn). Rěčny centrum WITAJ a Domowina stej w Ludowym nakładni­stwje Domowina wučbnicu „Pućowanje po stawiznach 4 – Stawizny widźeć, słyšeć, rozumić“ wudałoj. Kniha budźe wot přichodneho šulskeho lěta nowa standardna wučbnica předmjeta stawizny za 8. lětnik serbskich wyšich šulow. Publikacija wuńdźe jako sakskemu wučb­nemu planej wotpowědowace licencne wudaće nakładnistwa Klett. Zeserbšćiłoj stej je Rejza Šěnowa a Lubina Hajduk-Veljkovićowa. Zajimcy zwonka šule dóstanu knihu mjez druhim w Budyskej Smolerjec kniharni abo online přez RCW.