Njebjelčicy (SN/MiR). Nimale 40 zajimcow bě zańdźeny pjatk składnosć wu­žiło, so wo wotpohledźe Kamjenskeje inicia­­ti­wy „Kleinsteinschule“ za šulu w swobodnym nošerstwje informować. Tak chcyli jeje čłonojo k zahajenju šulskeho lěta 2021/2022 w Njebjelčicach zakładnu šulu wotewrěć. Započeć chcedźa z 1. a 2. lětnikom, wuwučować ma so w starobnje měšanych skupinach. Prěnje přizjewjenja hižo předleža. Nošer kubłanišća ma być hižo wobstejace towarstwo Swo­bodne šule Kamjenc. Susan Pohl z to­war­stwa rjekny: „W našim towarstwje, wopřijacym mjez druhim kubłarjow, mamy wjaco­rych zajimcow, kotřiž chcyli na tutej nowej šuli skutkować. Dźěłać chcemy dale ze socialnymi dźěłaćerjemi.“ Per­­sonal je trěbny, dokelž mataj w kóždej skupinje dwaj fachowcaj dźěłać. Tak je wja­ce chwile za indiwidualne spěcho­wanje šulerja po jeho zajimach. Zaměr towarstwa je wutworić reformopeda­gogisku, dwurěčnu, najprjedy zakładnu a pozdźišo tež wyšu šulu. Wažnosć kładu na cyłotne wuknjenje, na dźěło po wobdarjenosći a na demokratiske wobdźě­lenje při rjadowanju šulskeho dnja. Dźěći maja němčinu a serbšćinu wuknyć.

Slepo (SN/MiR). Zakładnu a wyšu šulu Slepjanskeho Němsko-Serbskeho šulskeho kompleksa „Dr. Marja Grólmusec“ su zańdźeny pjatk swjatočnje wotewrěli. Přeprosył bě na přepodaće wyšeje šule dotalny šulski nawoda Wolfgang Goldstein.

Wjeršk swjedźenskeho šulskeho dnja wotmě so w sportowej hali. „Mamy wokomik swjatočnosće wužiwać a sej wujasnić, kak wulki bě wukon za tónle twar“, Goldstein wróćo zhladujo zwura­zni a poda zdobom nadawk do přichoda. „Dobre mjeno našeje šule z jeje wose­bitym poskitkom bilingualneje wučby a z hajenjom serbskeje rěče w tymle jónkró­tnym sydlenskim rumje ewangelskich Serbow w našej Slepjanskej wo­sadźe su generacije šulerjow nadźěłali a maja je kóžde lěto znowa zakitować.“

Lětuša jubilejna swójbna schadźowanka swójbam jara přiwabliwa

Chrósćicy (MaU/SN). Jubileje swjećić je w Serbach dobra tradicija. Tak běše to tež wčera w Chróšćanskej „Jednoće“. Tam běštej Kamjenska župa „Michał Hórnik“ a Rěčny centrum WITAJ Budyšin na swoju mjeztym dźesatu swójbnu schadźowanku přeprosyłoj.

Nawodnica RCW dr. Beata Brězanowa a regionalna rěčnica za teritorij župy Katharina Jurkowa witaštej wulku syłu swójbow, kotrež běchu přichwatali. A wonej prezentowaštej słódnu překwapjenku – jubilejnu tortu, kotruž přewostaji Zahrodnikec pjekarnja zarjadowarjam jako dar. „Začuwamy, zo je schadźowanka wažne zarjadowanje serbskim a runje tak němskim swójbam“, rjekny Katharina Jurkowa. Zwěsćamy wšak tež, zo su mjezwoča hinaše hač te, kotrež smy před dźesać lětami widźeli. Bohaty wopyt nam pokazuje, zo je zarjadowanje kruće do swójbnych protykow zapisane.“ Zdobom wona wuzběhny, zo je lětsa wjace zajimcow z Delan do Chrósćic přišło. Mnozy wobhladachu sej k zahajenju poskitk Serbskeho ludoweho ansambla „Maks a Moric“ z Pětrom Cyžom.

Nowy zakoń wo šćěpjenju wot 1. měrca po cyłej Němskej płaći

Budyšin/Miłoćicy (CS/SN/MiR). Wot póndźele, 1. měrca, płaći w Němskej nowy zakoń wo škiće přećiwo wosypicam. Strowotniski zarjad Budyskeho wokrjesa informowaše tuž wčera wo stawje přihotow. Zasadnje je tak, zo wobsteji po přepytowanjach w šulskim lěće 2018/2019 mjez dźěćimi a młodostnymi dobra kwota šćěpjenja. Z přepytowanych dźěći w starobje štyrjoch, šěsć a dwanaće lět zwěsćichu kwotu šćěpjenja 95 procentow a wjac.